.jpg)
គ្រូពេទ្យពិនិត្យអ្នកកើតជំងឺផ្សិតខ្មៅ។ រូបថត AFP
ក្រសួងសុខាភិបាលឥណ្ឌារាយការណ៍ថា គេបានរកឃើញករណីជំងឺផ្សិតខ្មៅដែលកើតឡើងជាង ៤៥ ០០០ ករណី ក្នុងរយៈពេល ២ ខែចុងក្រោយនេះ ខណៈដែលការរាលដាលកើតមានឡើងនៅទូទាំងប្រទេស។
រដ្ឋមន្រ្តីក្រសួងសុខាភិបាលវ័យក្មេង គឺ លោក Bharati Pravin Pawar បានបកស្រាយប្រាប់សភា កាលពីថ្ងៃអង្គារទី ២០ ខែកក្កដា ថា មានមនុស្សជាង ៤ ២០០ នាក់ បានស្លាប់ដោយសារជំងឺផ្សិតនេះ ដែលមានឈ្មោះបែបវិទ្យាសាស្ត្រថា mucormycosis។
ការឆ្លងនេះពីមុន ត្រូវបានគេចាត់ទុកថា កម្រមានណាស់ ប៉ុន្តែករណីឆ្លងបានផ្ទុះឡើងក្នុងអំឡុងពេលមានរោគរាតត្បាតកូវីដ ១៩ ដែលធ្វើឱ្យអ្នកជំងឺដែលបានជាសះស្បើយ ពីជំងឺកូវីដ ១៩ មានការភ្ញាក់ផ្អើល បន្ទាប់ពីដឹងថាខ្លួនបានកើតជំងឺផ្សិតខ្មៅនោះ។
វាគឺជាជំងឺ ដែលមានភាពកាចសាហាវ ហើយគ្រូពេទ្យត្រូវធ្វើការវះកាត់ ដោយបង្ខំឱ្យយកភ្នែក ច្រមុះ និងថ្គាម ចេញពីអ្នកជំងឺ ដើម្បីបញ្ឈប់វាកុំឱ្យរាលដាលទៅខួរក្បាល។ គួរបញ្ជាក់ផងដែរថា អត្រាមរណភាព គឺច្រើនជាង ៥០ ភាគរយ។
យោងតាមទិន្នន័យរបស់រដ្ឋាភិបាល ចំនួនករណីខ្ពស់បំផុតត្រូវបានគេរាយការណ៍នៅរដ្ឋ Maharashtra ភាគខាងលិចដែលមានចំនួន ៩ ៣៤៨ ករណី ។ ក្រុមអ្នកជំនាញ បានសន្មតថា ការកើនឡើងថ្មីៗនេះគឺដោយសារការប្រើប្រាស់ថ្នាំ ស្តេរ៉ូអ៊ីតច្រើនពេកក្នុងការព្យាបាលកូវីដ ១៩៕
មឹង ច័ន្ទសុម៉ានីតា
