កាលពីថ្ងៃព្រហស្បតិ៍ សប្ដាហ៍មុន នាយកប្រចាំតំបន់របស់អង្គការសុខភាពពិភពលោកនៅទ្វីបអាហ្វ្រិក បានក្រើនរំឭកពីស្ថានភាពនៃរលកទី៣នៃកូវីដ ១៩ នៅអាហ្រិកគឺមិនទាន់បញ្ចប់នៅឡើយទេ។ ស្ថានភាពកូវីដ ១៩ នៅទ្វីបអាហ្វ្រិក នៅតែបន្តមានការកើនឡើងជាបន្តបន្ទាប់នាប៉ុន្មានសប្តាហ៍ថ្មីនេះ ដែលបណ្តាលមកពីមានករណីឆ្លងវីរុសកូវីដ ១៩ បំប្លែងថ្មីប្រភេទ Delta និងចំនួនអ្នកទទួលបានការចាក់វ៉ាក់សាំងគឺនៅមានទាបនៅឡើយ។
យោងតាមគេហទំព័រផ្លូវការរបស់អង្គការសហប្រជាជាតិនាយកប្រចាំតំបន់របស់អង្គការសុខភាពពិភពលោកប្រចាំទ្វីបអាហ្វ្រិក លោកស្រី Matshidiso Moeti បាននិយាយថា៖ «រលកទី៣នៃកូវីដ១៩ នៅក្នុងទ្វីបអាហ្រ្វិកមិនទាន់បានបញ្ចប់នៅឡើយទេ»។
លោកស្រី Moeti បានបន្តនិយាយថាប្រទេសជាច្រើននៅក្នុងទ្វីបអាហ្រ្វិក នៅតែស្ថិតក្នុងហានិភ័យខ្ពស់ហើយរលកទី៣ នៃកូវីដ ១៩ នេះមានការកើនឡើងលឿនខ្ពស់ជាងពេលណាៗទាំងអស់។ ការប្រារព្ធពិធីបុណ្យ Eid ដែលនៅសប្តាហ៍នេះក៏អាចបណ្តាលឱ្យមានការកើនឡើងករណីមួយចំនួនផងដែរ។
យោងតាមប្រភពគេហទំព័រដដែលអង្គការសុខភាពពិភពលោកបាននិយាយថា ប្រទេសចំនួន ២១ នៅទ្វីបអាហ្រ្វិកមានករណីវិជ្ជមានកូវីដ ១៩ កើនឡើងជាង ២០ភាគរយក្នុងរយៈពេល២សប្តាហ៍ជាប់គ្នាដែលចំនួននេះច្រើនជាង ៣សប្តាហ៍មុន។
បន្ថែមពីការកើនឡើងនៃករណីវិជ្ជមានកូវីដ ១៩ នៅក្នុងប្រទេសចំនួន ២៦ នៅក្នុងទ្វីបអាហ្រ្វិកក៏មានករណីឆ្លងវីរុសបំប្លែងថ្មីប្រភេទ Delta។ ចំពោះវីរុសបំប្លែងថ្មីប្រភេទ Alpha និង Beta ក៏ត្រូវបានគេរាយការណ៍ថាមានឆ្លងក្នុងទ្វីបអាហ្រ្វិកផងដែរ។
យោងតាមការរាយការណ៍របស់សារព័ត៌មាន BBC នៅក្នុងទ្វីបអាហ្រ្វីកប្រទេសដែលមានចំនួនអ្នកស្លាប់ខ្ពស់បំផុតរួមមានប្រទេសណាមីប៊ី អាហ្រ្វិកខាងត្បូង ទុយនីស៊ី អ៊ូហ្គង់ដា និងហ្គំប៊ី។
អ្នកជំងឺកូវីដ ១៩ ដែលត្រូវសម្រាកព្យាបាលនៅមន្ទីរពេទ្យនៅជុំវិញប្រទេសចំនួន ១០ នៅក្នុងទ្វីបអាហ្រ្វិកបានកើនឡើងយ៉ាងឆាប់រហ័សដែលមានប្រទេសចំនួន ៦ កំពុងប្រឈមនឹងកង្វះគ្រែសម្រាប់ព្យាបាលអ្នកជំងឺ។ បន្ថែមពីនេះ តម្រូវការអុកស៊ីហ្ស៊ែន ត្រូវបានគេប៉ាន់ស្មានថា មានតម្រូវការខ្ពស់ជាង ៥០ ភាគរយពីលើតម្រូវការនៅក្នុងឆ្នាំមុន។
ការកើនឡើងនាពេលបច្ចុប្បន្ននេះ កើតឡើងនៅពេលអត្រានៃការចាក់វ៉ាក់សាំងរបស់ទ្វីបមួយនេះ នៅមានកម្រិតទាបនៅឡើយ។ប្រជាជនចំនួន ១៦ លាននាក់បានទទួលការចាក់វ៉ាក់សាំងការពារកូវីដ ១៩ ទាំង ២ ដូសដែលចំនួននេះគឺតិចជាង ២ ភាគរយនៃប្រជាជនអាហ្វ្រិកសរុប។ ចំពោះប្រជាជននៅអាហ្វ្រិកខាងត្បូងប្រមាណជាង ៤ លាននាក់ឬប្រហែល ៦,៥ ភាគរយ ទើបតែទទួលបានការចាក់វ៉ាក់សាំងកូវីដ ១៩ ចំនួន ១ ដូសតែប៉ុណ្ណោះ។
យោងតាមសារព័ត៌មាន Associated Press ក្រុមអ្នករិះគន់បាននិយាយថាទោះបីជាប្រធានាធិបតីអាហ្វ្រិកខាងត្បូងលោកCyrilRamaphosaបានឆ្លើយតបទៅនឹងស្ថានការណ៍កូវីដ ១៩ ហើយបានបិទខ្ទប់ប្រទេសខ្លួនកាលពីខែមីនាឆ្នាំមុនក៏ដោយ ប៉ុន្តែលោក Ramaphosa មានការយឺតយ៉ាវក្នុងការបញ្ជាទិញវ៉ាក់សាំងការពារកូវីដ ១៩ មកចែកចាយនៅក្នុងប្រទេសខ្លួន។
គួរបញ្ជាក់ផងដែរ រលកទី៣នៃការឆ្លងក្នុងសហគមន៍នៅក្នុងទ្វីបអាហ្វ្រិកនេះ បណ្តាលមកពី ការប្រើប្រាស់ វិធានការសុខភាពសាធារណៈមិនមានប្រសិទ្ធភាព ការរក្យាគម្លាតសង្គមមិនបានត្រឹមត្រូវ អត្រាការចាក់វ៉ាក់សាំងនិងការរីករាលដាលនៃវីរុសបំប្លែងថ្មីៗ។ នេះបើយោងតាមការបកស្រាយរបស់អង្គការសហប្រជាជាតិ៕