ប្រធានាធិបតីបារាំង លោក អេម៉ានុយអែល ម៉ាក្រុង ចេញសេចក្តីថ្លែងការណ៍ ១ ទៅកាន់នាយករដ្ឋមន្រ្តីអ៊ីស្រាអែល គឺលោក ណាហ្វតាលី បេននីត ដើម្បីធានាឱ្យបានថា រដ្ឋាភិបាលអ៊ីស្រាអែលនឹងស៊ើបអង្កេតយ៉ាងល្អិតល្អន់លើករណីមួយ ហើយប្រធានាធិបតីបារាំង ចោទប្រកាន់ថា ខ្លួនក្លាយជាគោលដៅចារកម្មរបស់ក្រុមហ៊ុនបច្ចេកវិទ្យាអ៊ីស្រាអែល។ នេះបើតាមការឱ្យដឹងពីសារព័ត៌មាន The Guadian កាលពីពេលថ្មីៗនេះ។
លោក ម៉ាក្រុង បង្ហាញការព្រួយបារម្ភថា ខ្សែទូរស័ព្ទរបស់លោកជាមួយនឹងគណៈរដ្ឋមន្រ្តីភាគច្រើនអាចឆ្លងមេរោគ Pegasus ជាកម្មវិធីលួចស្តាប់ព័ត៌មានតាមទូរស័ព្ទបង្កើតឡើងដោយក្រុមហ៊ុនឃ្លាំមើលអ៊ីស្រាអែល NSO អាចឱ្យប្រតិបត្តិករនៃកម្មវិធីនេះដកស្រង់សារ រូបភាព និងអ៊ីមែល កត់ត្រាការហៅទូរស័ព្ទ និងបើកមីក្រូហ្វូនដោយសម្ងាត់លើឧបករណ៍ដែលមានវីរុស។
ទិន្នន័យ database ដែលបានបែកធ្លាយចេញពីគម្រោង Pegasus មានរួមបញ្ចូលទាំងលេខទូរស័ព្ទដៃរបស់លោក ម៉ាក្រុង ផងដែរ។
យ៉ាងណាមិញ ក្រុមហ៊ុន NSO បាននិយាយថា លោក ម៉ាក្រុង មិនមែនជាគោលដៅរបស់អតិថិជនខ្លួនណាមួយទេ ពោលក្រុមហ៊ុនបដិសេធថា ខ្លួនមិនបានជ្រើសរើសលោក ម៉ាក្រុង ដើម្បីជាគោលដៅក្នុងការឃ្លាំមើលដោយប្រើមេរោគ Pegasus នោះទេ។ ក្រុមហ៊ុននិយាយថា ការពិតដែលថា លេខរបស់លោកមានវត្តមាននៅក្នុងបញ្ជី គឺមិនមានន័យថា លេខនោះត្រូវបានជ្រើសរើសសម្រាប់ការឃ្លាំមើលដោយប្រើ Pegasus ទេ។
គម្រោង Pegasus មិនអាចពិនិត្យមើលទូរស័ព្ទចល័តរបស់មេដឹកនាំ និងអ្នកការទូតបានទេដូច្នេះមិនមានភ័ស្ដុតាងណាមួយ ដែលអាចបញ្ជាក់ថា តើក្រុមហ៊ុននេះមានការប៉ុនប៉ងដំឡើងមេរោគនៅលើទូរស័ព្ទរបស់គោលដៅពួកគេ ឬយ៉ាងណាទេ?
ទោះយ៉ាងណា ការិយាល័យនាយករដ្ឋមន្រ្តីបានបដិសេធមិនធ្វើអត្ថាធិប្បាយលើការហៅទូរស័ព្ទ ឬការសន្ទនារបស់មេដឹកនាំទាំង ២ ឡើយ។ តែបើយោងតាមប៉ុស្តិ៍លេខ ១២ របស់អ៊ីស្រាអែល ដែលបានរាយការណ៍អំពីសន្ទនាតាមទូរស័ព្ទរវាងមេដឹកនាំទាំង ២ ប្រភពមិនបញ្ចេញឈ្មោះម្នាក់បាននិយាយថា លោក បេននីត បានសង្កត់ធ្ងន់ថា ព្រឹត្តិការណ៍ដែលបានចោទប្រកាន់បានកើតឡើងមុនពេលគាត់ចូលកាន់តំណែងនៅខែឧសភា ហើយគណៈកម្មការរបស់ខ្លួនកំពុងពិនិត្យមើលថា តើច្បាប់ស្តីពីការវាយលុកតាមអ៊ីនធឺណិតរបស់អ៊ីស្រាអែលដូចជាគម្រោង Pegasus គួរតែត្រូវរឹតបន្តឹងបន្ថែមដែរ ឬយ៉ាងណា?
គម្រោង Pegasus ដែលមានសម្ព័ន្ធភាពជាមួយប្រព័ន្ធផ្សព្វផ្សាយ ១៧ រួមទាំងកាសែត The Guardian ផងនោះ បានបង្ហាញកាលពីសប្តាហ៍មុនថា រដ្ឋាភិបាលដែលជាអតិថិជនរបស់ខ្លួននៅជុំវិញពិភពលោក បានប្រើប្រាស់សូហ្វវែរទិញពីក្រុមហ៊ុន NSO ដើម្បីតាមដានលើសកម្មជនសិទ្ធិមនុស្ស អ្នកសារព័ត៌មាន និងមេធាវីនានា។
ការស៊ើបអង្កេតធ្វើឡើងដោយផ្អែកលើការវិភាគកោសល្យវិច័យលើទូរស័ព្ទ និងការវិភាគទិន្នន័យ ដែលបានលេចធ្លាយលេខទូរស័ព្ទចំនួន ៥ ម៊ឺន ក្នុងនោះរាប់បញ្ចូលទាំងលោក ម៉ាក្រុង និងប្រមុខរដ្ឋមន្ត្រីរដ្ឋាភិបាលជាន់ខ្ពស់មន្ត្រីការទូត និងយោធានៅក្នុងប្រទេស ចំនួន ៣៤ លើពិភពលោក។
បើទោះជាក្រុមហ៊ុន NSO តែងតែធានាថា លេខទូរស័ព្ទដែលត្រូវបានលេចធ្លាយនេះ មិនត្រូវបានប្រើប្រាស់ជាគោលដៅនៃមេរោគ Pegasus ក្ដី ក៏បញ្ជីនេះត្រូវបានគេជឿជាក់ថា ផ្តល់នូវព័ត៌មានអំពីអ្នកដែលត្រូវបានកំណត់អត្តសញ្ញាណជាមនុស្សដែលត្រូវបានគេកំណត់គោលដៅដោយអតិថិជនរបស់ក្រុមហ៊ុន NSO។
បញ្ជីនេះរួមបញ្ចូលទាំងលេខទូរស័ព្ទរបស់បុគ្គលដែលត្រូវបានតាមដានដោយកម្មវិធីចារកម្មលួចទិន្នន័យតាមទូរស័ព្ទរបស់ក្រុមហ៊ុន NSO។ នេះបើយោងតាមការវិភាគពីឧបករណ៍ Pegasus របស់ពួកគេ។ ការវិភាគនេះ ត្រូវបានធ្វើឡើងដោយមន្ទីរពិសោធន៍សន្តិសុខរបស់អង្គការលើកលែងទោសអន្តរជាតិដែលបានរកឃើញដានទាក់ទងនឹងសកម្មភាពរបស់ឧបករណ៍ Pegasus លើទូរស័ព្ទចំនួន ៣៧ ក្នុងចំណោម ៦៧ ដែលខ្លួនបានវិភាគ៕