ការតវ៉ា និងអំពើហិង្សាតាមដងផ្លូវស្តីពីកង្វះទឹកនៅភាគនិរតីអ៊ីរ៉ង់ បានបន្តអស់រយៈពេល៦យប់ហើយ ខណៈពេលប្រជាពលរដ្ឋនៅរដ្ឋធានីតេអេរ៉ង់ បានស្រែកពាក្យស្លោកប្រឆាំងនឹងរដ្ឋាភិបាលទាមទារដំណោះស្រាយ។ នេះបើយោងតាមវីដេអូដែលបានផ្សព្វផ្សាយនៅលើបណ្តាញសង្គមនៅថ្ងៃពុធសប្ដាហ៍មុន និងបណ្តាញព័ត៌មានអ៊ីរ៉ង់។
វីដេអូជាច្រើន ត្រូវបានបង្ហោះដោយអ្នកប្រើបណ្តាញសង្គម បានបង្ហាញពីកម្លាំងសន្តិសុខ ប្រើឧស្ម័នបង្ហូរទឹកភ្នែកដើម្បីបំបែកក្រុមអ្នកតវ៉ា ហើយទីភ្នាក់ងារព័ត៌មានពាក់កណ្តាលផ្លូវការហៅថាFars ហៅសកម្មភាពនេះថាជា«សកម្មភាពកុបកម្ម» ដោយប៉ូលិសម្នាក់ ត្រូវបានគេបាញ់សម្លាប់ និងម្នាក់ទៀតរងរបួសនៅក្នុងទីក្រុងកំពង់ផែ Mahshahr ក្នុងខេត្ត Khuzestan ដែលជាតំបន់កង្វះទឹកដ៏អាក្រក់បំផុត។
កម្លាំងសន្តិសុខបានពង្រឹងវត្តមានរបស់ពួកគេនៅក្នុងទីក្រុងតេអេរ៉ង់នៅទីលាន Azadi នៃរដ្ឋធានី។នៅពេលយប់ មនុស្សមួយចំនួននៅក្នុងរដ្ឋធានីបានបញ្ចេញកំហឹងរបស់ពួកគេ ដោយស្រែកប្រឆាំងនឹងមេដឹកនាំកំពូលAyatollah Ali Khamenei។ មានយុវជនយ៉ាងតិច ២នាក់ ត្រូវបានបាញ់សម្លាប់នៅក្នុងការតវ៉ានេះ។
មន្ត្រីប៉ូលិស បានស្តីបន្ទោសក្រុមបាតុករប្រដាប់អាវុធ ប៉ុន្តែក្រុមសកម្មជន បាននិយាយនៅលើបណ្តាញសង្គមថា ពួកគេក៏ត្រូវបានសម្លាប់ដោយកម្លាំងសន្តិសុខដែរ។
គួរបញ្ជាក់ផងដែរថា ប្រទេសអ៊ីរ៉ង់កំពុងប្រឈមមុខនឹងគ្រោះរាំងស្ងួតដ៏អាក្រក់បំផុតក្នុងរយៈពេល ៥០ ឆ្នាំហើយវិបត្តិកង្វះទឹកនេះ បានជះឥទ្ធិពលដល់គ្រួសារកសិកម្មនិងការចិញ្ចឹមសត្វនិងបណ្តាលឱ្យដាច់ចរន្ត អគ្គិសនីទៀតផង។
យ៉ាងហោចណាស់មានការតវ៉ាចំនួន ៣១ នៅទូទាំងប្រទេសអ៊ីរ៉ង់ នៅថ្ងៃចន្ទ និងថ្ងៃអង្គារសប្ដាហ៍មុន រួមទាំងការប្រមូលផ្តុំគ្នាដោយកម្មករនិងកសិករផងដែរ។ប្រព័ន្ធផ្សព្វផ្សាយរដ្ឋ ពាក់កណ្តាលផ្លូវការ ISNA បានរាយការណ៍ថាអភិបាលខេត្ត Khuzestan គឺលោក Qasem Soleimani Dashtaki ធ្លាប់បានសន្យាថា នឹងកាត់បន្ថយការ ខ្វះខាតទឹកក្នុងរយៈពេល១ឆ្នាំដែលបានធ្វើឱ្យប៉ះពាល់ដល់យ៉ាងហោចណាស់ចំនួន ៧០២ ភូមិនៅក្នុងខេត្តនេះ៕