កាលពីថ្ងៃសៅរ៍ទី ២៤ កក្កដា ប្រជាជនហុងគ្រីរាប់ពាន់នាក់ បានដើរហែក្បួនតាមដងផ្លូវនៅទីក្រុងរបស់ប្រទេសហុងគ្រី ដើម្បីជាការគាំទ្រសិទ្ធិរបស់ក្រុមអ្នកស្រឡាញ់ភេទដូចគ្នានៅក្នុងការដង្ហែក្បួនប្រចាំឆ្នាំរបស់ Budapest Pride។
អ្នករៀបចំព្រឹត្តិការណ៍នេះបានអំពាវនាវឱ្យអ្នកចូលរួមសម្តែងការប្រឆាំង របស់ពួកគេចំពោះ ជំហានថ្មីៗ របស់រដ្ឋាភិបាលរបស់នាយករដ្ឋមន្រ្តី លោក Viktor Orban ដែលក្រុមអ្នករិះគន់ និយាយថា ធ្វើឱ្យមាន ការរើសអើងក្រុមអ្នកស្រឡាញ់ភេទដូចគ្នានៅក្នុងប្រទេសអឺរ៉ុបកណ្តាលនេះ។
លោក Jojo Majercsik អ្នកនាំពាក្យក្បួន Budapest Pride បាននិយាយថាការហែក្បួន នៅឆ្នាំនេះ មិនមែនគ្រាន់តែជាការអបអរសាទរនិងការរំឭកពីការតស៊ូជាប្រវត្តិសាស្រ្ត នៃចលនាក្រុមអ្នកស្រឡាញ់ ភេទដូចគ្នាប៉ុណ្ណោះប៉ុន្តែក៏ជាការតវ៉ាប្រឆាំងនឹងគោលនយោបាយបច្ចុប្បន្នរបស់លោក Orban ដែលផ្តោត លើអ្នកស្រឡាញ់ភេទដូចគ្នា ក៏ដូចជាអ្នកប្តូរភេទ។
លោក Majercsik បាននិយាយថា៖«អ្នកស្រឡាញ់ភេទដូច គ្នាភាគច្រើនភ័យខ្លាចហើយមានអារម្មណ៍ ថា ពួកគេមិនអាចចុះសម្រុងនៅក្នុងប្រទេសនេះទៀតទេ» ។
ការដង្ហែក្បួននេះបានកើតឡើងបន្ទាប់ពីច្បាប់មួយត្រូវបានអនុម័តដោយសភារបស់ប្រទេសហុងគ្រីកាលពីខែមិថុនា បានហាមឃាត់ការបង្ហាញមាតិកាដែលពណ៌នាអំពីការស្រឡាញ់ភេទដូចគ្នា ឬការផ្លាស់ប្តូរភេទ ទៅដល់អនីតិជន។ វិធានការត្រូវបានភ្ជាប់ទៅនឹងច្បាប់នេះដែលអនុញ្ញាតឱ្យមានការដាក់ទណ្ឌកម្មតឹងរ៉ឹងចំពោះណាដែលរួមភេទជាមួយអនីតិជន។
រដ្ឋាភិបាលហុងគ្រីនិយាយថា គោលនយោបាយនេះគឺធ្វើឡើងដើម្បីស្វែងរកការការពារទៅលើកុមារ។ ប៉ុន្តែក្រុមអ្នករិះគន់នៃច្បាប់នេះបានប្រៀបធៀបច្បាប់នេះទៅនឹងច្បាប់ឃោសនាស្រឡាញ់ភេទដូចគ្នារបស់ប្រទេសរុស្ស៊ីកាលពីឆ្នាំ ២០១៣ ហើយនិយាយថា ច្បាប់នេះរួមបញ្ចូលការស្រឡាញ់ភេទដូចគ្នាដែលជា ផ្នែកមួយនៃយុទ្ធនាការឃោសនាបោះឆ្នោតដើម្បីប្រមូលសំឡេង របស់អ្នកអភិរក្សមុនមាន ការបោះឆ្នោត នាពេលខាងមុខ។
លោក Orban បាននិយាយថាច្បាប់នេះមិនមែននិយាយអំពីការរំលោភលើសិទ្ធិរបស់អ្នកស្រឡាញ់ភេទ ដូចគ្នានោះទេប៉ុន្តែផ្តោតទៅលើការការពារសិទ្ធិរបស់ឪពុកម្តាយក្នុងការជ្រើសរើសវិធីដើម្បីអប់រំកូនៗ របស់ពួកគេ។
អ្នកនយោបាយជាច្រើននៅសហភាពអ៊ឺរ៉ុបបានប្រឆាំងយ៉ាងខ្លាំងទៅនឹងច្បាប់នេះ។ គណៈកម្មការប្រតិបត្តិ នៃប្លុកប្រទេសទាំង ២៧ បានចាប់ផ្តើមដំណើរការនីតិវិធីច្បាប់ ២ ដាច់ដោយឡែកពីគ្នាប្រឆាំងនឹង រដ្ឋាភិ បាលរបស់ប្រទេសហុងគ្រីកាលពីសប្តាហ៍មុនដោយហៅច្បាប់នេះថា ជាការរំលោភលើសិទ្ធិរបស់ក្រុម អ្នកស្រឡាញ់ភេទដូចគ្នា។
ច្បាប់ថ្មីនេះចែងថាថ្នាក់អប់រំផ្លូវភេទនៅតាមសាលារៀនត្រូវបង្រៀនដោយក្រុមមនុស្សដែលបានចុះបញ្ជីដោយរដ្ឋាភិបាលដោយមានហាមឃាត់គ្រូមិនឱ្យបង្រៀនសៀវភៅដែលមានមាតិការទាក់ទងនឹងក្រុមអ្នក ស្រឡាញ់ភេទដូចគ្នា។
ច្បាប់នេះក៏ហាមឃាត់មាតិកាអ្នកស្រឡាញ់ភេទដូចគ្នានៅលើកញ្ចក់ទូរទស្សន៍ក្នុងអំឡុងពេលថ្ងៃត្រង់ និងរសៀលផងដែរ៕