.jpg)
អាមេរិកប្រឈមនឹងការរឹតត្បិតថ្មី ក្រោយពីមានការរីករាលដាលវ៉ារ៉្យង់ Delta ថ្មី។ រូបថត AFP
សហរដ្ឋអាមេរិកត្រូវប្រឈមនឹងវិធានការបម្រាមគោចររឹតបន្តឹងថ្មី ក្រោយមានការរីករាលដាលនៃវ៉ារ៉្យង់ Delta ថ្មីមានការកើនឡើងយ៉ាងខ្លាំង ធ្វើឱ្យមានការអំពាវនាវបន្ថែមទៀត សម្រាប់អ្នកដែលមិនទាន់បានចាក់វ៉ាក់សាំងក្នុងបំណងធ្វើឱ្យស្ថានភាពត្រឡប់ទៅធម្មតាក្នុងពេលឆាប់ៗនេះ។ នេះបើតាមការឱ្យដឹងពីសារព័ត៌មាន Al Jazeera កាលពីពេលថ្មីៗនេះ។
ក្រោយពេលសហរដ្ឋអាមេរិកបន្ធូរបន្ថយពាក់ព័ន្ធនឹងវិធានការពាក់ម៉ាស់ និងអនុញ្ញាតឱ្យបើកអាជីវកម្ម និងការធ្វើដំណើរឡើងវិញ ការកើនឡើងនៃករណីកូវីដ ១៩ បានកើតឡើងជាថ្មីបណ្ដាលឱ្យមានការរឹតត្បិតសាជាថ្មី។
កាលពីថ្ងៃចន្ទ លោកអភិបាលរដ្ឋកាលីហ្វ័រនីញ៉ា លោក Gavin Newsom បានប្រកាសថា រដ្ឋដែលមានប្រជាពលរដ្ឋច្រើនជាងគេបំផុតរបស់ប្រទេសនេះនឹងតម្រូវឱ្យបុគ្គលិករដ្ឋ និងបុគ្គលិកថែទាំសុខភាពទាំងអស់បង្ហាញបណ្ណវ៉ាក់សាំង ឬធ្វើតេស្តរៀងរាល់សប្តាហ៍ ដោយការអនុវត្តនេះនឹងចាប់ផ្ដើមនៅខែក្រោយនេះទៅ។
លោក Newsom បាននិយាយថា៖ «សេចក្តីប្រកាសនៅថ្ងៃនេះ មានលក្ខណៈទូលំទូលាយខ្ញុំជឿជាក់ថា យើងអាចនឹងក្លាយជារដ្ឋដំបូងគេដែលមិនត្រឹមតែតម្រូវឱ្យមានបុគ្គលិករដ្ឋទាំងអស់ធ្វើដូចនេះទេ ថែមទាំងចូលរួមក្នុងភាពជាដៃគូឯកជនសាធារណៈជាមួយគ្រឹះស្ថានសុខាភិបាលរបស់យើងទៀតផង»។
ទាក់ទិននឹងស្ថានភាពបច្ចុប្បន្ន លោក Anthony Fauci អ្នកជំនាញខាងជំងឺឆ្លងកំពូលរបស់ប្រទេសបានប្រាប់សារព័ត៌មាន CNN ថា សហរដ្ឋអាមេរិកដើរផ្លូវខុសក្នុងការប្រយុទ្ធប្រឆាំងរលកថ្មីនៃជំងឺកូវីដ ១៩ ហើយការចាក់វ៉ាក់សាំងដូសទី៣ ប្រហែលជាចាំបាច់ខ្លាំងសម្រាប់បុគ្គលងាយរងគ្រោះក្នុងប្រទេស។
ដោយសារប្រជាពលរដ្ឋជាងពាក់កណ្ដាលប្រទេសនៅមិនទាន់បានចាក់វ៉ាក់សាំងពេញលេញនៅឡើយគួបផ្សំជាមួយនឹងការរីករាលដាលវ៉ារ៉្យង់ Delta ថ្មី សហរដ្ឋអាមេរិកកំពុងប្រឈមនឹងសេណារីយោដ៏អាក្រក់បំផុតជាមួយនឹងករណីស្លាប់ប្រចាំថ្ងៃឡើងដល់ ៤ ០០០ នាក់ ក្នុង ១ ថ្ងៃ (ជាកម្រិត ១ ស្មើនឹងករណី កាលពីចុងឆ្នាំមុន និងដើមឆ្នាំនេះ)។
លោកបាននិយាយថា៖ «ខ្ញុំមិនប្រាកដទេថា តើវាជាសេណារីយោដ៏អាក្រក់បំផុត ឬយ៉ាងណាទេ ប៉ុន្តែខ្ញុំគិតថា សេណារីយោនេះនឹងមិនល្អទេ។ យើងកំពុងដើរផ្លូវខុសហើយ»។
គាត់បានលើកយកបញ្ហាដែលកំពុងកើនឡើងករណីឆ្លងកូវីដក្រោយចាក់វ៉ាក់សាំងពេញលេញ និងតម្រូវការចាំបាច់នៃការចាក់វ៉ាក់សាំងដូសទី៣ សម្រាប់អ្នកដែលមានប្រព័ន្ធភាពស៊ាំខ្សោយ ពោលគឺអ្នកមានជំងឺមហារីក ឬអ្នកប្តូរសរីរាង្គជាដើម។
លោកបាននិយាយថា សេចក្ដីសម្រចក្នុងការចាក់វ៉ាក់សាំងដូសទី៣ ត្រូវបានលើកយកមកពិភាក្សាកាលពីថ្ងៃទី ២២ ខែកក្កដា ដោយគណៈកម្មាធិការប្រឹក្សាស្តីពីការអនុវត្តការចាក់ថ្នាំបង្ការរោគ ដែលបញ្ហានេះ នឹងត្រូវបន្តពិនិត្យឡើងវិញថា តើអាមេរិកត្រូវដើរទៅផ្លូវនេះ ឬយ៉ាងណា?
យោងតាមសារព័ត៌មាន National Post លោក Scott Gottlieb អតីតស្នងការគណៈកម្មការរដ្ឋបាលចំណីអាហារ និងឱសថអាមេរិក (FDA) បាននិយាយថា៖ «វាជាការងាយស្រួលសម្រាប់វ៉ារ៉្យង់ Delta ក្នុងការបន្ថយសមត្ថភាពកម្រិតអង្គបដិបក្ខប្រាណឱ្យទាប ហើយនោះជាមូលហេតុដែលយើងកំពុងពិចារណាថា តើប្រជាជនត្រូវការវ៉ាក់សាំងដូសទី៣ ដើម្បីជួយដែរ ឬយ៉ាងណា?»។
ក្នុងអត្ថបទដដែលនេះ លោក Fauci ក៏បានការពារការសម្រេចចិត្តរបស់រដ្ឋ Los Angeles និងក្រុង St. Louis ក្នុងការដាក់វិធានការនៃការពាក់ម៉ាស់បើទោះបុគ្គលនោះចាក់វ៉ាក់សាំងហើយក៏ដោយ។ រដ្ឋាភិបាលក្នុងរដ្ឋបានចេញវិធានការប្រុងប្រយ័ត្នក្នុងការវាយតម្លៃ និងណែនាំវិធានការនានាដែលសមស្របនឹងស្ថានភាពជាក់ស្តែងនៅឯមូលដ្ឋាន បើទោះសកម្មភាពទាំងនោះមិនដូចនឹងអ្វី ដែលមជ្ឈមណ្ឌលត្រួតពិនិត្យ និងបង្ការជំងឺ (CDC) កំពុងណែនាំក៏ដោយ។
ប្រធានមជ្ឈមណ្ឌល CDC លោក Rochelle Walensky បាននិយាយនៅថ្ងៃទី ២២ ខែកក្កដាថា ស្ថាប័ននេះ ប្រកាន់ខ្ជាប់នូវអនុសាសន៍របស់ខ្លួនដែលថា អ្នកចាក់វ៉ាក់សាំងពេញលេញមិនតម្រូវឱ្យពាក់ម៉ាស់ទៀតនោះទេ។
លោកស្រីបន្ថែមថា ការពាក់វាអាចមានគុណប្រយោជន៍ខ្លះក៏ដោយ។ អ្នកជំនាញសុខភាពសាធារណៈមួយចំនួនបានជំរុញឱ្យមជ្ឈមណ្ឌល CDC ណែនាំឱ្យមនុស្ស ដែលបានចាក់វ៉ាក់សាំងរួចពាក់ម៉ាស់នៅទីសាធារណៈជានិច្ចដោយសារមានការរីករាលដាលវ៉ារ៉្យង់ Delta ថ្មី។
ដោយសារស្ថានភាពនៃការរីករាលដាលនៅអាមេរិកបច្ចុប្បន្នកំពុងមានហានិភ័យនៅឡើយ សហរដ្ឋអាមេរិកសម្រេចមិនទាន់ដកការរឹតត្បិតការធ្វើដំណើរទៅបរទេសនៅឡើយទេ ដោយសារមានការព្រួយបារម្ភពីការរីករាលដាលនៃវ៉ារ៉្យង់ថ្មី។ នេះបើយោងតាមមន្រ្តីសេតវិមានប្រាប់សារព័ត៌មានរ៉យទ័រ។
សហរដ្ឋអាមេរិកបច្ចុប្បន្នកំពុងហាមឃាត់ការធ្វើដំណើរចូលប្រទេសពីជនជាតិ ដែលមិនមែនជាពលរដ្ឋខ្លួនក្នុងរយៈពេល ១៤ ថ្ងៃសិន សម្រាប់ប្រទេសនៅសហភាពអឺរ៉ុប អៀរឡង់ ចិន ឥណ្ឌា អាហ្វ្រិកខាងត្បូង អ៊ីរ៉ង់ និងប្រេស៊ីល៕
