ក្រុមតវ៉ានៅប្រទេសគុយបា មានការភ័យខ្លាចបន្ទាប់ពីអាជ្ញាធរចាប់ផ្តើមបង្រ្កាបការតវ៉ាដោយចាប់ខ្លួនអ្នកតវ៉ា។
តាមការរាយការណ៍របស់សារព័ត៌មាន The New York Times អង្គការសិទិ្ធមនុស្សបានឱ្យដឹងថា ប្រជាជនគុយបាប្រមាណ ៧០០ នាក់ កំពុងត្រូវបានរដ្ឋាភិបាលឃុំខ្លួន។ ចំពោះក្រុមអ្នកតវ៉ាផ្សេងទៀតត្រូវបានផ្តន្ទាទោសនៅក្នុងការកាត់ក្តីរហ័សដែលមិនតម្រូវឱ្យមានមេធាវីការពារក្តីឡើយ។
តាមការរាយការណ៍របស់ប្រភពដដែល ប្រជាជនដែលបានធ្វើការតវ៉ា និងសាច់ញាតិរបស់ពួកគេមានការព្រួយបារម្ភអំពីសុវត្ថិភាពរបស់ពួកគេ។ អ្នកដែលមានសាច់ញាតិកំពុងជាប់ឃុំបានសម្តែងការភ័យខ្លាចថា ការនិយាយស្តីរបស់ពួកគេនឹងនាំឱ្យសាច់ញាតិរបស់ពួកគេមានការលំបាកបន្ថែមនៅអំឡុងពេលឃុំឃាំងនោះ។
បន្ទាប់ពីមានការតវ៉ានៅប្រទេសគុយបា អស់រយៈពេល ២ សប្តាហ៍មកការឆ្លើយតបរបស់អាជ្ញាធរមានភាពធ្ងន់ធ្ងរដោយប្រព័ន្ធផ្សព្វផ្សាយដែលគ្រប់គ្រងដោយរដ្ឋបានថ្កោលទោសក្រុមអ្នកតវ៉ាថា ជាជនបោកប្រាស់ និងចោរ។ ក្រុមសកម្មជនសិទ្ធិមនុស្ស និងក្រុមអ្នកតវ៉ាបាននិយាយថា មន្រ្តីប៉ូលិសបានទៅធ្វើការឃុំខ្លួនពួកគេពីផ្ទះមួយទៅផ្ទះមួយ។
កាលពីថ្ងៃទី ២៧ កក្កដា សហរដ្ឋអាមេរិក និងប្រទេស ២០ ផ្សេងទៀត បានថ្កោលទោសប្រទេសគុយបា ចំពោះការបង្ក្រាបរបស់ខ្លួនលើក្រុមអ្នកតវ៉ា និងបានអំពាវនាវឱ្យប្រទេសគុយបា ដោះលែងក្រុមអ្នកតវ៉ា។
តាមការស្រង់សម្តីរបស់សារព័ត៌មាន VOA រដ្ឋមន្រ្តីក្រសួងការបរទេសសហរដ្ឋអាមេរិក លោក AntonyBlinken បាននិយាយនៅក្នុងសេចក្តីថ្លែងការណ៍មួយថា៖ «សព្វថ្ងៃលទ្ធិប្រជាធិបតេយ្យនៅជុំវិញពិភពលោកកំពុងជួបជុំគ្នា ដើម្បីគាំទ្រប្រជាជនគុយបាដោយអំពាវនាវឱ្យរដ្ឋាភិបាលគុយបាគោរពការទាមទាររបស់ប្រជាជនគុយបាចំពោះសិទ្ធិមនុស្សជាសកល»។
សេចក្តីថ្លែងការណ៍រួមរបស់ប្រទេសដែលធ្វើការថ្កោលទោសគុយបាបាននិយាយថា ប្រជាជនគុយបារាប់ពាន់នាក់ដែលបានធ្វើដំណើរតាមដងផ្លូវកាលពីថ្ងៃទី ១១ ខែកក្កដា បានអនុវត្តសេរីភាពខាងបញ្ចេញមតិ និងការជួបប្រជុំគ្នាដែលជាសិទ្ធិដែលមានចែងក្នុងធម្មនុញ្ញសិទ្ធិមនុស្សអន្តរជាតិ។
សេចក្តីថ្លែងការណ៍រួមនេះបានបន្តសរសេរថា៖ «យើងជំរុញឱ្យរដ្ឋាភិបាលគុយបាយកចិត្តទុកដាក់ស្តាប់សំឡេង និងការទាមទាររបស់ប្រជាជនគុយបា»។
គួរបញ្ជាក់ផងដែរថា ការតវ៉ានៅប្រទេសគុយបា បានកើតឡើងដោយសារកង្វះទីជម្រក អាហារ និងថ្នាំពេទ្យក៏ដូចជាការដាច់ចរន្តអគ្គិសនីជារឿយៗនៅក្នុងប្រទេសនេះ ក្នុងអំឡុងពេលមានការរាតត្បាតជំងឺកូវីដ ១៩៕