វិបត្តិនយោបាយនៅទុយនីស៊ី បានជំរុញឱ្យមានកំណើននៃការឃោសនា និងការកេងយកប្រយោជន៍តាមប្រព័ន្ធផ្សព្វផ្សាយសង្គមពីបរទេស ដោយព្យាយាមបំភ្លៃរឿង ដើម្បីឱ្យការសម្រេចចិត្តរបស់ប្រធានាធិបតីទុយនីស៊ីលោក Kais Saied ដែលបណ្តេញនាយករដ្ឋមន្រ្តីចេញពីតំណែង និងបង្កកសភាមានភាពសមហេតុផល។
សារព័ត៌មានកាតា គឺ Al Jazeera ហាក់មានទំនោរលើបក្សរដ្ឋាភិបាលទុយនីស៊ី Ennahda បានចុះផ្សាយថា ក្រោយព័ត៌មានស្ដីពីការសម្រេចចិត្តរបស់លោក Saied ដែលមិនធ្លាប់មានពីមុនមកក្នុងប្រទេសបានសាយភាយកាលពីថ្ងៃអាទិត្យ ហាសថេគ (Hashtag) «ទុយនីស៊ីបះបោរប្រឆាំង ភាតរភាព» ដែលសំដៅលើក្រុមនយោបាយភាតរភាពមូស្លីម (Muslim Brotherhood) បានចាប់ផ្តើមផ្ទុះឡើងនៅលើបណ្តាញសង្គមធ្វីធើរ។
ការវិភាគមួយអំពីទិន្នន័យ និងការសន្ទនាតាមបណ្តាញសង្គម អាចបង្ហាញពីការយល់ដឹងជាច្រើនដូចជាអ្នកណាកំពុងសរសេរអំពីប្រធានបទជាក់លាក់មួយហើយសំឡេងរបស់ពួកគេមានឥទ្ធិពលលើប្រធានបទនោះ។ វាក៏អាចចង្អុលបង្ហាញពីកន្លែងដែលមនុស្សទាំងនោះស្ថិតនៅ និងថា តើពួកគេប្រើគណនីពិត ឬក្លែងក្លាយការសន្ទនាជាសាធារណៈតាមរយៈការត្រួតពិនិត្យ និងការបំភិតបំភ័យ និងការរៀបចំអ្វីមួយឱ្យក្លាយជារឿងពេញនិយម។
ជាមួយគ្នានោះ ការវិភាគលើធ្វីតចំនួន ១២ ០០០ ពីគណនីធ្វីធើរចំនួន ៦ ៨០០ ដែលភ្ជាប់ជាមួយនឹង Hashtag «ទុយនីស៊ីបះបោរប្រឆាំងភាតរភាព» បានបង្ហាញពីកិច្ចខិតខំប្រឹងប្រែងរួមគ្នាដោយអ្នកមានឥទ្ធិពលលើបណ្ដាញសង្គមពីប្រទេសក្នុងឈូងសមុទ្រពែរ៍្ស ដើម្បីបង្ហាញពីសកម្មភាពរបស់ប្រធានាធិបតីថា ជាការបះបោរទុយនីស៊ីដ៏ពេញនិយមប្រឆាំងនឹងក្រុមអ៊ិស្លាមដូចជា Muslim Brotherhood។
អ្នកប្រើប្រាស់ធ្វីធើរដែលធ្វីតភ្ជាប់ជាមួយនឹង Hashtag បែប នេះភាគច្រើនមកពីអារ៉ាប៊ី សាអូឌីត និងអេមីរ៉ាតអារ៉ាប់រួម។ គេកត់សម្គាល់ថា ក្នុងនោះមានទាំងអ្នកមានឥទ្វិពលម្នាក់ឈ្មោះ Al-Shaykh ដែលត្រូវបានគេស្គាល់ថា ជាមេខ្លោងធំមួយនៅលើធ្វីធើរក្នុងពិភពអារ៉ាប់។
ក្នុងការវិភាគអំពី Hashtag ក្រោយអ្នកកាសែតអារ៉ាប៊ី សាអ៊ូឌីត លោក Jamal Kha-shoggi ត្រូវបានសម្លាប់ក្នុងឆ្នាំ ២០១៨ ការសិក្សាមួយរបស់លោក Alexei Abrahams និងលោក Andrew Leber ដែលជាអ្នកសិក្សានៅសាកលវិទ្យាល័យ Harvard បានចងក្រងថា នៅលើ Hashtag ទាក់ទងនឹងការស្លាប់របស់លោក Khashoggi ធ្វីតរបស់លោក al-Shaykh បានរួមចំណែក ៨ ភាគរយនៃធ្វីតទាក់ទងទាំងអស់។
ភាគច្រើននៃគណនីផ្សេងទៀតដែលផ្សព្វផ្សាយអំពីទុយនីស៊ីក៏ជាអ្នកចូលរួមទៀងទាត់ក្នុងយុទ្ធនាការផ្សព្វផ្សាយព័ត៌មានមិនពិតក្នុងតំបន់ផងដែរក្នុងនោះរួមមានទាំងគណនីក្លែងក្លាយ និងគណនីដែលត្រូវបានគេលួច។ ការប្រើប្រាស់គណនីដែលត្រូវបានគេលួចយកទៅផ្សព្វផ្សាយពាណិជ្ជកម្ម ឬទីផ្សារជារឿងមួយធម្មតាទៅហើយ ប៉ុន្តែលើសពីនេះ គណនីទាំងនេះ ក៏ត្រូវបានប្រើសម្រាប់ចែករំលែកព័ត៌មានមិនពិតក្នុងប្រទេសមជិ្ឈមបូព៌ា និងអាហ្រ្វិកខាងជើង ជាពិសេសនៅពេលមានព្រឹត្តិការណ៍នយោបាយធំៗ។
តាមរយៈនេះ អ្នកឃោសនាបានប្រើ Hashtag «ទុយនីស៊ីបះបោរប្រឆាំងភាតរភាព» ក្នុងនាមប្រជាជនទុយនេស៊ី ដោយព្យាយាមបញ្ចុះបញ្ចូលអ្នកតាមដានក្នុងស្រុក និងអន្តរជាតិថា ក្រុម Muslim Brotherhood តំណាងឱ្យការគំរាមកំហែងហើយអាចពង្វក់ប្រទេសឱ្យវិលត្រឡប់ទៅរករបបផ្តាច់ការវិញ។
យោងតាមការចុះផ្សាយរបស់កាសែតវ៉ាស៊ីនតោនប៉ុស្តិ៍ ៣ ថ្ងៃ មុនការប្រកាសរបស់លោកប្រធានាធិបតី Saied លោក Dhahi Khalfan Tamimអនុប្រធានប៉ូលិសនៃទីក្រុងឌូបៃ បានសរសេរសារបែបកំប្លែងថា៖ «ដំណឹងល្អការវាយលុកថ្មីខ្លាំងនឹងមករក Brotherhood»។ នៅក្នុងបទសម្ភាសមួយជាមួយសារព័ត៌មានរបស់តួកគី TRT កាលពីថ្ងៃចន្ទ លោក Rachid Ghannouch ប្រធានសភា និងជាមេដឹកនាំបក្ស Ennahda ដែលហៅសកម្មភាពរបស់លោក Saied ថា ខុសពីរដ្ឋធម្មនុញ្ញ និងជាការធ្វើរដ្ឋប្រហារបានចោទប្រកាន់ប្រព័ន្ធផ្សព្វផ្សាយរបស់អារ៉ាប់រួមថា បានជំរុញឱ្យមានរដ្ឋប្រហារនៅទុយនីស៊ី។
យ៉ាងណាមិញ មិនមានភ័ស្តុតាងណាមួយដែលបញ្ជាក់ថា រដ្ឋាភិបាលបរទេសបានដាក់សម្ពាធលោក Saied ឱ្យចាត់វិធានការបែបនេះនោះទេ ហើយអ្នកវិភាគជនជាតិទុយនីស៊ីម្នាក់លោក Mohamed-Dhia Hammami បាននិយាយថា លោកគិតថា វាមិនទំនងសោះចំពោះរឿងបែបនេះ៕
ហួន ឌីណា