.jpg)
បុគ្គលិករៀបចំបំពង់អុកសុីហ្សែ៊ននៅមជ្ឈមណ្ឌលចែកចាយ Samabayu Mandala ខណៈអ្នកជំងឺកូវីដ ១៩ ត្រូវការជាចំាបាច់។ AFP
ករណីឆ្លងជំងឺកូវីដ ១៩ នៅប្រទេសឥណ្ឌូនេស៊ី កាន់តែកើនឡើងខ្លាំងដោយសារវត្តមានរបស់វ៉ារ៉្យង់ Delta ដែលបណ្ដាលឱ្យករណីឆ្លងនៅប្រទេសនេះកើនដល់ ១ លានករណីក្នុងរយៈពេល ១ ខែខណៈអ្នកជំនាញរំឭកថា ករណីឆ្លងអាចនឹងកើនឡើងច្រើនជាងនេះទៀតបើមិនបានធ្វើតេស្តបានត្រឹមត្រូវ។
ករណីកើនឡើងយ៉ាងឆាប់រហ័សនេះ បានធ្វើឱ្យប្រព័ន្ធសុខាភិបាលនៅប្រទេសនេះជួបការលំបាកយ៉ាងខ្លាំង ដោយសូម្បីតែអ្នកជំងឺធ្ងន់ធ្ងរក៏មិនអាចទទួលបានការថែទាំត្រឹមត្រូវនៅក្នុងមន្ទីរពេទ្យដែរ។ ក្នុងរយៈពេល ៣០ ថ្ងៃចុងក្រោយនេះ ករណីស្លាប់នៅប្រទេសនេះ កើនឡើងដល់ទៅ ២៨ ០០០ ករណី ខណៈអ្នកជំងឺខ្លះស្លាប់ពេលធ្វើចត្តាឡីស័កនៅផ្ទះ។
មុនពេលមានជំងឺរាតត្បាត គ្រួសារនិងសហគមន៍មូលដ្ឋាន មាននាទីក្នុងការរៀបចំពិធីបុណ្យសពផ្ទាល់ខ្លួន ចំពោះអ្នកស្លាប់ ហើយបើតាមទំនៀមទម្លាប់សាសនាអ៊ិស្លាមគេសង្កេតឃើញថា ប្រជាជនឥណ្ឌូនេស៊ីប្រហែល ៩០ ភាគរយ បានរៀបចំបុណ្យសពតាមរបៀបលាង និងរុំសាកសព ដោយក្រណាត់ស និងធ្វើពិធីបួងសួងដល់អ្នកស្លាប់មុនពេលគេតម្កល់សាកសពនៅទីតាំងបង្ហើយ។
កាលពីមានជំងឺរាតត្បាតដំបូងនេះ បុគ្គលិកសុខាភិបាល និងគ្រូពេទ្យបានជួយរៀបចំបញ្ចុះសពអ្នក ដែលស្លាប់ ដោយសារជំងឺកូវីដ ១៩។
យ៉ាងណាមិញ បុគ្គលិកសុខាភិបាលជាច្រើន ដែលធ្លាប់ទទួលរៀបចំបញ្ចុះសពអ្នកជំងឺកូវីដត្រូវមមាញឹកក្នុងការព្យាបាលអ្នកជំងឺកូវីដ ១៩។ ដូច្នេះតួនាទីនេះ ត្រូវធ្លាក់ដល់ក្រុមអ្នកស្ម័គ្រចិត្ត ១ ក្រុមនៅឥណ្ឌូនេស៊ី។
នៅពេលប្រទេសឥណ្ឌូនេស៊ី បានចាប់ផ្តើមដាក់ប្រទេសក្នុងគ្រាអាសន្នដំបូងនៅកោះជ្វា និងកោះបាលី នៅដើមខែកក្កដាមន្រ្តីជាន់ខ្ពស់តំបន់ Bogor បានបង្កើតក្រុមការងារ ដើម្បីពិនិត្យមើលបញ្ហាប្រឈមមួយចំនួនដែលទំនងជាត្រូវការជំនួយបន្ថែម ដែលជំនួយនេះរួមបញ្ចូលទាំងការផ្តល់ការថែទាំចាំបាច់សម្រាប់អ្នកជំងឺកូវីដ ១៩ ដែលបានស្លាប់នៅពេលដាក់ដោយឡែកនៅផ្ទះ។
លោក Rino Indira Gusniawan នាយកក្រុមហ៊ុនចែកចាយទឹកក្នុងតំបន់ដែលមានភារកិច្ចប្រមូលផ្តុំក្រុមអ្នកស្ម័គ្រចិត្ត សម្រាប់ការងារនេះបានប្រាប់សារព័ត៌មាន CNA ថា៖ «រដ្ឋាភិបាលបានសម្រេចថា ពួកគេត្រូវការមនុស្ស ដើម្បីយកសាកសពអ្នកជំងឺដែលបានស្លាប់នៅផ្ទះយកទៅបញ្ចុះ។ បញ្ហា ២ ដែលយើងចង់ដោះស្រាយពេលបច្ចុប្បន្នមានកង្វះមនុស្សយកសពទៅបញ្ចុះ ដោយសារគេខ្លាចឆ្លង និងអ្នកខ្លះ ទៀតមិនបានអនុវត្តតាមវិធីត្រឹមត្រូវ ក្នុងការបញ្ចុះសពអ្នកជំងឺ»។
លោក Gusniawan ត្រូវសម្រេចជ្រើសរើសអ្នកស្ម័គ្រចិត្តពីអង្គការ និងក្រុមផ្សេងៗ ដែលកំពុងប្រតិបត្តិការនៅក្នុងទីក្រុង ដើម្បីជួយដោះស្រាយបញ្ហានេះ។ មិនយូរប៉ុន្មានក្រុមស្ម័គ្រចិត្តបញ្ចុះសពទីក្រុង Bogor ត្រូវបានបង្កើតឡើង។
ប្រធានក្រុមអ្នកស្ម័គ្រចិត្ត លោក Wahyu Trisnajaya បានប្រាប់សារព័ត៌មាន CNA ថា៖ «ជាមធ្យម យើងអាចបញ្ចុះសព ៥ នាក់ក្នុង ១ ថ្ងៃ។ មានថ្ងៃខ្លះយើងត្រូវទទួលសពពី ៩ ទៅ ១១ ក្នុង ១ ថ្ងៃ។ ក្រុមការងារយើងធ្វើការសឹង ២៤ ម៉ោង ក្នុង ១ ថ្ងៃ ពេលខ្លះក៏មានអ្នកហៅម៉ោង ៣ ព្រឹកក៏មាន។ ដោយសារសពមានផ្ទុកមេរោគកូវីដ ដូច្នេះយើងត្រូវបញ្ចុះឱ្យទាន់ពេល ដើម្បីកុំឱ្យឆ្លងដល់គេទាន់»។
ក្នុងចំណោមក្រុមអ្នកស្ម័គ្រចិត្តចំនួន ៣០ នាក់ មានអ្នកស្ម័គ្រចិត្តតែ ១៨ នាក់ប៉ុណ្ណោះ ដែលបានចូលរួម ដោយផ្ទាល់ក្នុងការបញ្ចុះសាកសព។ អ្នកស្ម័គ្រចិត្ត ១២ នាក់ផ្សេងទៀត ទទួលខុសត្រូវក្នុងការហៅទូរស័ព្ទពីអ្នក ដែលត្រូវការជំនួយរបស់ពួកគេធ្វើការងាររដ្ឋបាល ឬផ្តល់ការគាំទ្រផ្នែកភ័ស្តុភារផ្សេងៗ។
មិនថាករណីណាក៏ដោយអ្នកស្ម័គ្រទាំងនេះ តម្រូវឱ្យមានជំនាញផ្នែកចិត្តសាស្ត្រជាក់លាក់ដូចជា ទំនាក់ទំនង និងគាំទ្រផ្លូវចិត្តជាមួយនឹងសមាជិកគ្រួសារសាច់ញាតិ ឬអ្នកជិតខាងរបស់សព។
ទោះយ៉ាងណាក្ដីគេសង្កេតឃើញថា ស្ថានភាពបច្ចុប្បន្នមិនមានភាពប្រសើរក្នុងពេលឆាប់ៗឡើយ។ ចំនួនអ្នកឆ្លងប្រចាំថ្ងៃនៅទូទាំងប្រទេសឥណ្ឌូនេស៊ី បច្ចុប្បន្ន ជាមធ្យមចន្លោះពី ២៨ ០០០ ទៅ ៤៥ ០០០ នាក់ ខណៈចំនួនអ្នកស្លាប់បន្តកើនឡើង និងបំបែកឯតទគ្គកម្មច្រើនជាងមុន ៥ ដង ក្នុងរយៈពេល ៧ ថ្ងៃ ចុងក្រោយនេះ។
បើគិតមកត្រឹមថ្ងៃសុក្រ ទី ៣០ កក្កដា ប្រទេសនេះរកឃើញករណីឆ្លងសរុបជាង ៣,៣ លានករណីនៅក្នុងប្រទេស និងករណីស្លាប់ប្រមាណ ៩២ ០០០ ករណីផងដែរ៕
