ខេត្តនានានៅទូទាំងប្រទេសចិន បានដាក់ចេញវិធានតឹងរ៉ឹងជាងមុនក្នុងកិច្ចប្រឹងប្រែង ដើម្បីទប់ស្កាត់ការផ្ទុះឡើងនៃការឆ្លងច្រើនបំផុត ក្រោយស្ងប់មួយរយៈ ខណៈមន្រ្តីសុខាភិបាលចាត់ទុកថា ការកើនឡើងនេះ គឺដោយសារវត្តមានវ៉ារ្យ៉ង់ Delta ដែលបានផ្ទុះឡើងនៅខេត្ត Nanjing។
លោក Mi Feng អ្នកនាំពាក្យគណៈកម្មការសុខភាពជាតិ (NHC) បាននិយាយនៅក្នុងសន្និសីទសារព័ត៌មានមួយកាលពីថ្ងៃសៅរ៍ថា៖ «សម្ពាធចម្បង ដែលយើងកំពុងប្រឈមបច្ចុប្បន្ននេះ គឺការរីករាលដាលនៃវ៉ារ្យ៉ង់ Delta»។
ការផ្ទុះឡើងនៅប្រទេសចិនលើកនេះ មានទំហំធំជាងគេបំផុត ក្រោយស្ងប់ស្ងាត់រយៈពេលជាច្រើនខែ ធ្វើឱ្យរារាំងដល់ភាពជោគជ័យរបស់ប្រទេសនេះក្នុងការទប់ស្កាត់ការរាតត្បាតនៅក្នុងប្រទេសរបស់ខ្លួន។
ការរីករាលដាលជាង ២៦០ ករណី នៅទូទាំងប្រទេស ត្រូវបានផ្សារភ្ជាប់ទៅនឹងចង្កោមវីរុស ដែលបានផ្ទុះឡើងនៅទីក្រុង Nanjing ក្នុងខេត្ត Jiangsu ភាគខាងកើតដែលចាប់ផ្ដើមឡើងពីអ្នកបោសសម្អាត កាប៊ីន ៩ នាក់ នៅអាកាសយានដ្ឋានអន្តរជាតិតេស្តវិជ្ជមាននៅថ្ងៃទី ២០ ខែកក្កដា។
យ៉ាងណាមិញ ប្រទេសនេះបានបិទខ្ទប់ខេត្តនេះ ហើយបានធ្វើតេស្តលើប្រជាជនទាំង ៩,២ លាននាក់ ចំនួន ២ ដង ដើម្បីបង្ការការរីករាលដាលខ្លាំង។
មន្រ្តីគណកម្មការ NHC លោក He Qinghua បានប្រាប់អ្នកយកព័ត៌មាននៅឯសន្និសីទកាសែតថា ការឆ្លងរាលដាលនៃវ៉ារ៉្យង់ Delta នេះ កើតឡើងដោយសាររដូវកាលទេសចរណ៍ និងការធ្វើដំណើររបស់អ្នកដំណើរនៅព្រលានយន្តហោះ ដែលបណ្ដាលឱ្យមានការរីករាលដាលយ៉ាងឆាប់រហ័សលើកនេះ៕