.jpg)
ភ្លើងព្រៃឆេះហ៊ុមព័ទ្ធរមណីយដ្ឋានសមុទ្រមេឌីទែរ៉ាណេក្នុងស្រុក Mugla កាលពីថ្ងៃទី ១ សីហា។ AFP
កាលពីថ្ងៃសៅរ៍កន្លងទៅ អាជ្ញាធរតួកគីបានប្រើប្រាស់ទូកសង្គ្រោះភ្ញៀវទេសចរដើម្បីជម្លៀសពីសណ្ឋា គារមួយចំនួននៅក្នុងតំបន់រមណីយដ្ឋានមាត់សមុទ្រ Aegean Sea នៃទីក្រុង Bodrum ដោយសារតែគ្រោះថ្នាក់ដែលបង្កឡើងដោយភ្លើងឆេះព្រៃនៅក្បែរនោះ។
ប្រធានាធិបតីតួកគី លោក Recep Tayyip Erdogan បានប្រកាសថា រដ្ឋាភិបាលតួកគី នឹងរ៉ាប់រងថ្លៃស្នាក់នៅសម្រាប់ប្រជាពលរដ្ឋរងផលប៉ះពាល់ដោយភ្លើងឆេះព្រៃ និងសាងសង់ផ្ទះឡើងវិញ។ លោកបាននិយាយថា ពន្ធសន្តិសុខសង្គម និងការទូទាត់ឥណទាននឹងត្រូវពន្យារពេលសម្រាប់អ្នកដែលរងផលប៉ះពាល់ ហើយអាជីវកម្មខ្នាតតូច នឹងត្រូវផ្តល់ឥណទានដោយគ្មានការប្រាក់។
តាមការស្រង់សម្តីរបស់សារព័ត៌មាន CNA លោក Erdogan បាននិយាយថា៖ «យើងមិនអាចធ្វើអ្វីបានក្រៅពីការប្រាថ្នាចង់បានសេចក្តីមេត្តាករុណាពីព្រះចំពោះជីវិតដែលយើងបានបាត់បង់នោះទេ ប៉ុន្តែយើងអាចកសាងអ្វីៗដែលបាត់បង់ដោយសារអគ្គិភ័យឡើងវិញបាន»។
លោកបាន និយាយបន្តថា អ្នកអនុវត្តច្បាប់ និងមន្រ្តីស៊ើបការណ៍សម្ងាត់ កំពុងស្វែងរកការអះអាងពីករណីភ្លើងឆេះព្រៃនេះ។ លោក Erdogan បានប្រាប់ក្រុមអ្នកយកព័ត៌មាននៅទីក្រុងអ៊ីស្តង់ប៊ុលកាលពីថ្ងៃទី ៣០ កក្កដាថា ករណីនេះ មិនមែនជាករណីដែលមិនត្រូវមើលរំលងដោយសារតែភ្លើងឆេះព្រៃកើតឡើងស្ទើរតែដូចគ្នាក្នុងពេលតែមួយនៅកន្លែងផ្សេងគ្នា។
គួរបញ្ជាក់ផងដែរថា ភ្លើងឆេះព្រៃនេះ បានកើតឡើងកាលពីថ្ងៃទី ២៨ កក្កដា នៅទីក្រុង Manavgat ជាទីក្រុងមួយនៅខេត្ត Antalya ភាគខាងត្បូងតួកគី។ អគ្គនាយកដ្ឋានព្រៃឈើតួកគី បាននិយាយថា គិតត្រឹមថ្ងៃទី ៣០ កក្កដា មានភ្លើងឆេះព្រៃជាង ៧០ កន្លែងផ្សេងទៀតនៅទូទាំងប្រទេស។
អគ្គិភ័យនៅតំបន់ខ្លះត្រូវបានគ្រប់គ្រងបាន ប៉ុន្តែមនុស្ស៥នាក់ បានស្លាប់នៅ Manavgat ម្នាក់ទៀតស្លាប់នៅ Marmaris។អគ្គីភ័យ ក៏បានរាលដាលដល់កន្លែងកម្សាន្តនៅ Bodrum ដែលមានសណ្ឋាគារយ៉ាងហោចណាស់ ២ ត្រូវបានជម្លៀសភ្ញៀវចេញ។
តាមការរាយការណ៍របស់សារព័ត៌មាន CNA រដ្ឋមន្ត្រីក្រសួងកសិកម្មលោកBekir Pakdemirliបានឱ្យដឹងថា ប្រទេសតួកគី បានដាក់ពង្រាយអ្នកពន្លត់អគ្គិភ័យប្រមាណ ៤ ពាន់នាក់ រថយន្តពន្លត់អគ្គិភ័យជាច្រើនគ្រឿង និងយន្តហោះចំនួន ៣គ្រឿង ដើម្បីប្រយុទ្ធប្រឆាំងនឹងភ្លើងឆេះព្រៃនេះ៕
