.jpg)
បុគ្គលិក និងអ្នកការទូតអាមេរិកមានការស្ទាក់ស្ទើរក្នុងការសម្រេចចិត្តចំពោះការបម្រើភារកិច្ចរបស់ពួកគេនៅប្រទេសក្រៅ។
ការព្រួយបារម្ភរបស់អ្នកការទូតទាក់ទងនឹងរោគសញ្ញាឡាហាវ៉ាន ដែលបានប៉ះពាល់អ្នកការទូត និងក្រុមគ្រួសាររបស់ពួកគេនៅក្នុងអំឡុងពេលបំពេញបេសកកម្មនៅប្រទេសក្រៅ។ ការព្រួយបារម្ភរបស់អ្នកការទូត គឺបណ្តាលមកពីកង្វះព័ត៌មានពីថ្នាក់ដឹកនាំទាក់ទងនឹងរោគសញ្ញាឡាហាវ៉ាន (Havana Syndrome)។
តាមការរាយការណ៍របស់សារព័ត៌មាន CNN ប្រភពបាននិយាយថា ការភ័យខ្លាចពីជំងឺអាថ៌កំបាំងនេះ កំពុងជះឥទ្ធិពលដល់ការសម្រេចចិត្តរបស់អ្នកការទូតដោយមន្ត្រីបម្រើកិច្ចការបរទេសមួយចំនួនសម្រេចចិត្តមិនទទួលយកការងារទៅប្រទេសក្រៅ។ អ្នកការទូតមួយចំនួនមានការព្រួយបារម្ភពីករណីនេះ ដែលធ្វើឱ្យមន្ត្រីអាមេរិករាប់រយនាក់ បាត់បង់ជីវិតក្នុងរយៈពេលប៉ុន្មានឆ្នាំចុងក្រោយនេះ។
រោគសញ្ញាដែលត្រូវបានគេស្គាល់ថា ជារោគសញ្ញាហាវ៉ាណាត្រូវបានរាយការណ៍ជាលើកដំបូងដោយមន្រ្តី CIA និងបុគ្គលិកក្រសួងការបរទេស ដែលធ្វើការនៅស្ថានទូតអាមេរិកនៅក្នុងប្រទេសគុយបាកាលពីចុងឆ្នាំ ២០១៦។ អ្នកជំងឺមួយចំនួនបាននិយាយថា នៅពេលរោគសញ្ញាបានលេចចេញដំបូងពួកគេមានអារម្មណ៍ថា ដូចជា ពួកគេត្រូវបានគេវាយប្រហារ ដោយមានបញ្ហាចក្ខុ និងពិបាកក្នុងការផ្តោតអារម្មណ៍។
រោគសញ្ញាបន្ថែមនៃករណីនេះ មានដូចជាការបាត់បង់សមត្ថភាពនៃការស្តាប់ផងដែរ ចំពោះអ្នកការទូត និងភ្នាក់ងារមួយចំនួនដែលស្ថិតក្នុងករណីធ្ងន់ធ្ងរពួកគេត្រូវបង្ខំចិត្តបញ្ចប់បេសកកម្មនៅក្រៅប្រទេសរបស់ពួកគេមុន ហើយត្រឡប់ទៅសហរដ្ឋអាមេរិកវិញ ដើម្បីសិក្សានិងព្យាបាលរោគសញ្ញានេះ។
បច្ចុប្បន្នមិនទាន់មានការពន្យល់ជាក់លាក់ណាមួយពីរោគសញ្ញានេះបានទេ ប៉ុន្តែអ្នកវិទ្យាសាស្ត្រអាមេរិកនិយាយថា រោគសញ្ញានេះភាគច្រើនបណ្តាលមកពីវិទ្យុសកម្ម។ខណៈពេលដែលមិនមានការចែករំលែកព័ត៌មានជាសាធារណៈអំពីចំនួនអ្នកដែលមានរោគសញ្ញានេះ ក្រសួងការបរទេសអាមេរិក បានផ្ញើសារមួយកាលពីដើមឆ្នាំនេះ បញ្ជាឱ្យអ្នកការទូត និងសមាជិកគ្រួសាររបស់ពួកគេរាយការណ៍ភ្លាមៗអំពីរោគសញ្ញាថ្មីដែលពួកគេមាន ដែលសង្ស័យជារោគសញ្ញាឡាហាវ៉ាន។
គួរបញ្ជាក់ផងដែរថា សហរដ្ឋអាមេរិក បានចោទប្រកាន់ប្រទេសគុយបាថា បានធ្វើការវាយប្រហារដោយប្រើសំឡេងទៅកាន់មន្រ្តីរបស់អាមេរិក ប៉ុន្តែគុយបាបានបដិសេធចំពោះការចោទប្រកាន់នេះ ហើយវាបណ្តាលឱ្យមានភាពតានតឹងរវាងប្រទេសទាំង២នេះ។
ការសិក្សានៅសហរដ្ឋអាមេរិកកាលពីឆ្នាំ២០១៩ បានរកឃើញមានភាពមិនប្រក្រតីនៃខួរក្បាលរបស់អ្នកការទូតដែលបានធ្លាក់ខ្លួនឈឺដោយរោគសញ្ញានេះ ប៉ុន្តែគុយបា បានច្រានចោលរបាយការណ៍នេះ៕
