កាលពីថ្ងៃពុធ សហជីពមួយចំនួនដែលធ្លាប់មានទំនាក់ទំនងជាមួយអភិបាលរដ្ឋញូវយ៉កលោក Andrew Cuomo បានដកការគាំទ្ររបស់ពួកគេទៅលើលោក បន្ទាប់ពីរបាយការណ៍ស៊ើបអង្កេតរឿងអាស្រូវលោកត្រូវបានចេញផ្សាយ។
សហជីព និងអតីតសមាជិក ២ រូប នៃរដ្ឋបាលរបស់លោក Cuomo រួមទាំងអតីតអ្នកប្រឹក្សាច្បាប់របស់លោកបានសុំឱ្យលោកលាលែងពីតំណែងក្រោយពីរបាយការណ៍ស៊ើបអង្កេតនោះ បានចេញផ្សាយកាលពីម្សិលមិញ។
របាយការណ៍ស៊ើបអង្កេតនោះ បានសន្និដ្ឋានថា លោក Cuomo បានបៀតបៀនផ្លូវភេទទៅលើស្ត្រីចំនួន ១១ នាក់ រួមទាំងអតីតបុគ្គលិក និងសហការីបច្ចុប្បន្ននៅក្នុងការិយាល័យរបស់លោក។ ១ ថ្ងៃ បន្ទាប់ពីរបាយការណ៍នោះ បានចេញផ្សាយ លោក Cuomo បានបាត់បង់អ្នកគាំទ្រលោក និងព្រះរាជអាជ្ញាចំនួន ៤ នាក់និយាយថា ពួកគេនឹងតាមដានមើលសកម្មភាពរបស់លោក។
តាមការស្រង់សម្តីរបស់សារព័ត៌មាន New York Times លោក Jay Jacobs ប្រមុខគណបក្សប្រជាធិប តេយ្យរបស់ក្រុងញូវយ៉កនៅក្នុងប៉ុន្មានខែចុងក្រោយនេះ លោកបាននិយាយនៅក្នុងសេចក្តីថ្លែងការណ៍មួយថា ការដកអភិបាលក្រុងចេញពីតំណែង គឺចៀសមិនរួចឡើយ ហើយលោកបានថា ការបដិសេធរបស់លោក Cuomo ក្នុងការចុះចេញពីតំណែង គឺផ្ទុយពីដំបូន្មានរបស់លោក។
ប្រភពដដែលបានស្រង់សម្តីលោក Jacobs ថា៖ «លោកអភិបាលក្រុងបានបាត់បង់សមត្ថភាពក្នុងការគ្រប់គ្រង ទាំងការអនុវត្ត និងក្រមសីលធម៌» ។
តាមការស្រង់សម្តីរបស់សារព័ត៌មាន The Guardian លោកស្រី Carl Heastie ដែលជាអ្នកនាំពាក្យនៃសភាតំណាងរដ្ឋញូវយ៉កបាននិយាយថា៖ «ខ្ញុំយល់ថា លោកអភិបាលបានបាត់បង់ទំនុកចិត្តពីសភាភាគច្រើនទៅហើយលោកមិនអាចបន្តកាន់តំណែងបានទៀតទេ» ។
លោក Heastie បានសន្យាថា នឹងចាត់ចែងការស៊ើបអង្កេតលើការចោទប្រកាន់ដោយផ្អែកលើសាក្សី ១៧៩ នាក់ និងវត្ថុតាងដែលប្រមូលបាននៅក្នុងការស៊ើបអង្កេតរបស់អគ្គមេធាវី។ ប៉ុន្តែលោកមិនទាន់បានបញ្ជាក់ពីពេលវេលាកំណត់សម្រាប់ការចោទប្រកាន់ ដែលត្រូវលើកយកមកបង្ហាញ ឬដំណើរការសវនា ការណាមួយឡើយ។
ចំពោះលោកស្រី Hazel N. Dukes ប្រធាន N.A.A.C.P. ក្រុមប្រឹក្សាភិបាលជាតិ បានបដិសេធមិនផ្តល់ការគាំទ្រទៅលោក Cuomo។ ប៉ុន្តែកាលពីការចោទប្រកាន់ដំបូងរបស់លោក Cuomo លោកស្រី Dukes បានបង្ហាញខ្លួនជាមួយលោក Cuomo នៅឯវិហារនៅ Harlem ហើយលោកស្រីបានហៅលោក Cuomo ថា ជាកូនប្រុសរបស់លោកស្រីទៀតផង។
ប៉ុន្តែកាលពីថ្ងៃទី ៤ សីហា លោកស្រីបាននិយាយថា លោកស្រីត្រូវអានរបាយការណ៍នោះដោយខ្លួនឯងសិនមុននឹងលោកស្រីអាចវាយតម្លៃបានពេញលេញ។ លោកស្រី Dukes ក៏បាននិយាយថា៖ «ខ្ញុំមិនការ ពារលោក Cuomo នៅចំណុចនេះទេ» ។
រដ្ឋអាជ្ញានាំមុខនៅរដ្ឋធានី Albany នៃរដ្ឋញូវយ៉ក បានបើកការស៊ើបអង្កេតលើអាកប្បកិរិយារបស់លោក Cuomo ដោយផ្អែកលើការរកឃើញនៃការស៊ើបអង្កេតជាផ្លូវការ ហើយការស៊ើបអង្កេតស្រដៀងគ្នានេះត្រូវបានធ្វើឡើងដោយមេធាវីក្នុងស្រុកនៅតំបន់ Manhattan និង Westchester ។
អ្នកស៊ើបអង្កេតនឹងមានពេលកំណត់រយៈពេល ៣ ឆ្នាំ ក្នុងការស៊ើបអង្កេតចំពោះករណីបៀតបៀនផ្លូវភេទក្រោមច្បាប់ក្រុងញូវយ៉ក។ ទោះជាយ៉ាងណា របាយការណ៍ស៊ើបអង្កេតរបស់អគ្គមេធាវី បានរកឃើញថាលោក Cuomo បានបង្កើតបរិយាកាសមិនសមស្របចំពោះបុគ្គលិកដែលជាស្ត្រី ហើយអនុញ្ញាតឱ្យរដ្ឋ អាជ្ញាមើលប្រវត្តិការងារទាំងអស់របស់លោក៕