.jpg)
ស្ថិតិប្រទេសចិន បង្ហាញពីការចុះថយនៃចំនួនប្រជាជនភេទស្រីក្នុងប្រទេស ក្នុងរយៈពេលប៉ុន្មានទសវត្សរ៍ចុងក្រោយដែលបណ្តាលឱ្យមានអតុល្យភាពយេនឌ័រនៅក្នុងប្រទេស។
អតុល្យភាពយេនឌ័រនៅក្នុងប្រទេសចិនបច្ចុប្បន្នមានបុរសច្រើនជាងស្ត្រីចំនួន ៣៤,៩ លាននាក់។ នេះបើយោងតាមទិន្នន័យជំរឿនចុងក្រោយ ដែលបានចេញផ្សាយកាលពីខែឧសភា។ ជំរឿននេះ បានធ្វើឡើងកាលពីឆ្នាំ ២០២០ បានបង្ហាញថា សមាមាត្រភេទរបស់ប្រជាជនចិនសរុបគឺមានបុរស ១០៥,១ នាក់ និងស្រី ១០០ នាក់ដែលប្រហាក់ប្រហែលនឹង១ទសវត្សរ៍មុន។
ការចុះថយនៃចំនួនស្ត្រីនៅប្រទេសចិនបណ្តាលមកពីគោលនយោបាយកូន១ក្នុង១គ្រួសារ និងទំនៀមទម្លាប់ដែលលើកតម្កើងកូនប្រុសជាងកូនស្រីរបស់ចិន។ បន្ទាប់ពីគោលនយោបាយកូន១ក្នុង១គ្រួសាររបស់ប្រទេសចិនបានអនុវត្តកាលពីឆ្នាំ ១៩៧៩ មកគ្រួសារជនជាតិចិនភាគច្រើន បានព្យាយាមយកកូនប្រុសជាងកូនស្រីជាជំនឿដែលគេយល់ថាកូនប្រុសជាអ្នកស្នងត្រកូលគ្រួសារ។
គ្រួសារមួយចំនួនបានរម្លូតកូនរបស់ខ្លួនក្រោយពីដឹងថា កូនក្នុងផ្ទៃជាកូនស្រី ឬបោះបង់កូននោះ ចោលក្រោយពីសម្រាលនោះរួច។ តាមការស្រង់សម្តីរបស់សារព័ត៌មាន South China Morning Post អ្នកស្រី Song ដែលសម្រេចចិត្តរំលូតកូនរបស់ខ្លួនក្រោយពីបានដឹងថា កូនក្នុងផ្ទៃជាកូនស្រីមានអារម្មណ៍ថា ខ្លួនមានការសោកស្តាយក្រោយពីទទួលបានដំណឹងថា រដ្ឋាភិបាលបានបន្ធូរបន្ថយការរឹតបន្តឹងចំនួនសមាជិកក្នុងគ្រួសារនាពេលខាងមុខ។
តាមការស្រង់សម្តីរបស់ប្រភពដដែលលោកស្រីបាននិយាយថា៖«ប្រសិនបើពេលនោះមានការសម្រាលការរឹតបន្តឹងនេះ ខ្ញុំប្រហែលជាមិនត្រូវបោះបង់កូនស្រីខ្ញុំទេ។ ខ្ញុំនឹងមិនមានអារម្មណ៍ថា ទទួលរងសម្ពាធច្រើនទេ»។
គួរបញ្ជាក់ផងដែរថា ប្រទេសចិនបានដកចេញនូវគោលនយោបាយកូន១ក្នុង១គ្រួសារកាលពីឆ្នាំ ២០១៦ ហើយកាលពីចុងខែឧសភារដ្ឋាភិបាលបានសម្រេចនឹងអនុញ្ញាតឱ្យគ្រួសារនីមួយៗអាចមាន កូនបានដល់់ទៅ ៣នាក់។
រឿងរបស់លោកស្រី Songគឺជារឿងទូទៅដែលប្រជាជនចិនបានជួបប្រទះកាលពីមានការអនុវត្តគោលនយោបាយនោះ។ យោងតាមលោកJiang Quanbaoមកពីសាកលវិទ្យាល័យXianJiaotongបានឱ្យដឹងថាចំនួនប្រជាជនភេទស្រីនៅចន្លោះឆ្នាំ ១៩៨០ ដល់ឆ្នាំ ២០១០មានការថយចុះប្រមាណ ២០លាននាក់ដោយសារការរម្លូតកូន។
លោកJiang បាននិយាយថា ផលវិបាកដែលនឹងជួបប្រទះគឺសមាមាត្រភេទនៅពេលទារកកើតគឺក្មេងស្រីមានចំនួនតិច។ លោកបានបន្តនិយាយថា បន្ទាប់មកកង្វះក្មេងស្រីសម្រាប់ទំនាក់ទំនងជាមួយបុរសចិននឹងកើតមានឡើងជាបន្តបន្ទាប់។
ជាមួយនឹងការពិបាករកដៃគូក្នុងការរៀបការ កូនរបស់លោកស្រី Song ក៏កំពុងជួបនូវបញ្ហានេះដូចគ្នា។ លោកស្រីរំពឹងថា នឹងអាចត្រឡប់ទៅស្រុកកំណើតរបស់លោកស្រីវិញ ហើយអាចមើលថែចៅរបស់ខ្លួន ប៉ុន្តែក្តីស្រមៃនេះហាក់ដូចជាមិនអាចសម្រេចបាននោះទេដោយសារកូនប្រុសរបស់លោកស្រីមិនអាចស្វែងរកដៃគូរបស់ពួកគេបាន។
ក្រៅពីប្រទេសចិន ប្រទេសជប៉ុន និងកូរ៉េខាងត្បូងក៏មានអត្រាកំណើតធ្លាក់ចុះយ៉ាងគំហុកក្នុងរយៈពេលប៉ុន្មានឆ្នាំចុងក្រោយនេះ បើទោះបីជាមានការលើកទឹកចិត្តពីរដ្ឋាភិបាលសម្រាប់គូស្វាមីភរិយាមានកូនច្រើនក៏ដោយ៕
