ប៉ូលិសបានបង្ក្រាបហាងគ្មានអាជ្ញាប័ណ្ណមានលក្ខណៈដូច KTV ចំនួន ៤ កន្លែង ដែលកំពុងប្រតិបត្តិការនៅទូទាំងកោះនេះ ហើយប៉ូលិសបានរកឃើញមនុស្សចំនួន ៤២ នាក់ នៅបរិវេណនេះ និងត្រូវបានចាប់យកទៅសាកសួរពីបទរំលោភបទបញ្ជាកូវីដ ១៩។ នេះបើតាមការឱ្យដឹងពីសារព័ត៌មាន CNA ។
នៅក្នុងសេចក្តីប្រកាសព័ត៌មានមួយនៅថ្ងៃ អង្គារកងកម្លាំងប៉ូលិសសិង្ហបុរី បាននិយាយថា ខ្លួនបានធ្វើការត្រួតពិនិត្យ ការអនុវត្តលើគ្រឹះស្ថានម៉ាស្សាចំនួន ៩២ និងកន្លែងកម្សាន្តសាធារណៈចំនួន២៣ នៅចន្លោះថ្ងៃទី ២ ដល់ថ្ងៃទី ៨ ខែសីហា។ បច្ចុប្បន្ន ប៉ូលិសកំពុងស៊ើបអង្កេតលើមនុស្សសរុប ៨៨ នាក់។
ប៉ូលិស បាននិយាយថា បុរស ៤ នាក់ និងស្ត្រីម្នាក់ដែលមានអាយុចន្លោះពី ១៨ ទៅ ៣១ ឆ្នាំ ក៏កំពុងត្រូវបានស៊ើបអង្កេតផងដែរពីបទសង្ស័យថា ជាប់ពាក់ព័ន្ធក្នុងការគ្រប់គ្រងកន្លែងកម្សាន្តសាធារណៈគ្មានអាជ្ញាប័ណ្ណទាំងនេះ។
គ្រឹះស្ថានម៉ាស្សាចំនួន ២៤ ក៏ត្រូវបានគេសង្ស័យផងដែរថា បានប្រព្រឹត្តការរំលោភបំពានផ្សេងៗក្រោមបទបញ្ជាស្ដីអំពីសកម្មភាពគ្រឹះស្ថានម៉ាស្សា និងវិធានការបណ្តោះអាសន្នសម្រាប់កូវីដ ១៩ ចេញឆ្នាំ ២០២០ ។
សិង្ហបុរីក៏បានចេញបទបញ្ជាបិទ ១០ ថ្ងៃ និងពិន័យជាប្រាក់ ១ ០០០ ដុល្លារសិង្ហបុរី (៧៣៥ ដុល្លារ) សម្រាប់គ្រឹះស្ថានម៉ាស្សាទាំងនេះផងដែរ។ ដោយឡែក អតិថិជនក៏នឹងត្រូវពិន័យជាប្រាក់ចំនួន ៣០០ ដុល្លារសិង្ហបុរី (២២០ ដុល្លារ) ចំពោះការរំលោភលើវិធានការគ្រប់គ្រងសុវត្ថិភាព។
ចំពោះ ការផ្តល់សេវាកម្មម៉ាស្សាដោយគ្មានអាជ្ញាប័ណ្ណត្រឹមត្រូវបទល្មើសនេះត្រូវផាកពិន័យ ១០ ០០០ ដុល្លារសិង្ហបុរី (៧ ០០០ ដុល្លារ) ឬ/និង ត្រូវជាប់ពន្ធនាគាររហូតដល់ ២ ឆ្នាំ។ ជនល្មើសករណីដដែលៗ អាចប្រឈមនឹងការផាកពិន័យរហូតដល់ ២ ម៉ឺនដុល្លារសិង្ហបុរី (១៥,០០០ ពាន់ដុល្លារ) ឬ/និង ជាប់ពន្ធនាគាររហូតដល់ ៥ ឆ្នាំ៕