.jpg)
លោកអភិបាលញូវយ៉ក Andrew Cuomo ។ AFP
កាលពីថ្ងៃអង្គារ អភិបាលរដ្ឋញូវយ៉កសហរដ្ឋអាមេរិក បានសម្រេចចិត្តលាឈប់ពីតំណែងក្រោយពីមានការចោទប្រកាន់ពីករណីបំពានផ្លូវភេទទៅលើអតីតបុគ្គលិក។
អភិបាលរដ្ឋញូវយ៉ក លោក Andrew Cuomo បានសម្រេចលាឈប់ពីតំណែងរបស់លោកជាអភិបាលរដ្ឋ ក្រោយពីមានការស៊ើបអង្កេតទៅលើរូបលោកទាក់ទងនឹងករណីបំពានផ្លូវភេទទៅលើអតីតបុគ្គលិករបស់ខ្លួនចំនួន ១១ នាក់។
ក្រោយពីមានជនរងគ្រោះធ្វើការរាយការណ៍ទាក់ទងនឹងសកម្មភាពរបស់លោក Cuomo អគ្គរដ្ឋអាជ្ញារដ្ឋញូវយ៉ក លោកស្រី Letitia James បានបើកការស៊ើបអង្កេតទៅលើករណីនេះ ហើយរបាយការណ៍ស៊ើបអង្កេត បានចេញផ្សាយកាលពីសប្តាហ៍មុនដែលបង្ហាញថា លោក Cuomo បានបំពានទៅលើអតីតបុគ្គលិករបស់លោកពិតមែន។
តាមការស្រង់សម្តីរបស់សារព័ត៌មាន BBC លោក Cuomo បាននិយាយថា មធ្យោបាយដែលល្អបំផុតពេលនេះ គឺលោកលាលែងពីតំណែង។ នៅពេលដែលលោកប្រកាសលាលែងពីតំណែងកាលពីថ្ងៃទី ១០ សីហា លោក Cuomo នៅតែបន្តបដិសេធការចោទប្រកាន់ពីការបំពានផ្លូវភេទ ប៉ុន្តែលោកបាននិយាយថា លោកចង់សុំទោសទៅស្រ្តីរូបណាដែលមិនពេញចិត្តចំពោះសកម្មភាពរបស់លោក។
គួរបញ្ជាក់ផងដែរថា អនុប្រធានរដ្ឋាភិបាល លោកស្រី Kathy Hochul ដែលជាសមាជិកគណបក្សប្រជាធិបតេយ្យនឹងបន្តតំណែងលោកក្នុងអំឡុងពេលដែលអាណត្តិលោក Cuomo មិនទាន់ដល់ពេលកំណត់។ការលាលែងពីតំណែងរបស់លោក Cuomo នឹងចូលជាធរមានក្នុងរយៈពេល ១៤ ថ្ងៃបន្ទាប់។
បន្ទាប់ពីលោកត្រូវបានរងការចោទប្រកាន់ពីបទបៀតបៀនផ្លូវភេទលើកដំបូងនៅឆ្នាំនេះលោក Cuomo មិនអើពើនឹងការទាមទារពីសំណាក់គណបក្សទាំង២ ឱ្យលោកលាលែងពីតំណែងទេ។ ផ្ទុយទៅវិញរបាយការណ៍ស៊ើបអង្កេតបានចោទប្រកាន់លោកថា លោកបានបំពានទៅលើស្ត្រី ១១ នាក់ ដែលក្នុងនោះមានស្រ្តី ៩នាក់ជាបុគ្គលិករដ្ឋ។
ទោះបីជាលោកបានសម្រេចចិត្តលាលែងពីតំណែងក៏ដោយ សមាជិកក្នុងគណបក្សប្រជាធិបតេយ្យនៅទីក្រុងញូវយ៉កបានចាប់ផ្តើមផែនការធ្វើការចោទប្រកាន់លោកពីបទបៀតបៀនផ្លូវផេទ។ លោក Cuomo នៅតែប្រឈមមុខនឹងការស៊ើបអង្កេតព្រហ្មទណ្ឌទាក់ទងនឹងពាក្យបណ្តឹងពីបទបៀតបៀនផ្លូវភេទ៕
