.jpg)
លោក Robert Lloyd Schellenberg ត្រូវបានតុលាការចិនផ្តន្ទាទោសពីបទរត់ពន្ធ ជួញដូរ ដឹកជញ្ជូន និងផលិតគ្រឿងញៀន។ រូបថត AFP
កាលពីថ្ងៃអង្គារ ទី ១០ សីហា តុលាការចិន បានសម្រេចផ្តន្ទាទោសប្រហារជីវិតបុរសជនជាតិកាណាដាម្នាក់ អំឡុងពេលមានសវនាការបទបត្យាប័នរបស់នាយកប្រតិបត្តិក្រុមហ៊ុន Huawei។
លោក Robert Lloyd Schellenberg ត្រូវបានផ្តន្ទាទោសពីបទរត់ពន្ធ ជួញដូរ ដឹកជញ្ជូន និងផលិតគ្រឿងញៀន និងបានទទួលទោសដោយត្រូវជាប់ពន្ធនាគាររយៈពេល ១៥ ឆ្នាំ ដោយអាជ្ញាធរនៅខេត្ត Liaoning ភាគឦសានប្រទេសចិន ក្នុងឆ្នាំ ២០១៨។
ប៉ុន្តែបន្ទាប់ពីអាជ្ញាធរកាណាដាចាប់ខ្លួនលោកស្រី Meng Wanzhou ប្រធានផ្នែកហិរញ្ញវត្ថុរបស់ក្រុមហ៊ុន Huawei នៅអាកាសយានដ្ឋាន Vancouver ប្រទេសកាណាដា តាមសំណើរបស់អ្នកស៊ើបអង្កេតអាមេរិកកាលពីចុងឆ្នាំ ២០១៩ លោក Schellenberg ត្រូវបានកាត់ទោសប្រហារជីវិតវិញ។
តាមការស្រង់សម្តីរបស់សារព័ត៌មាន RFA លោក Zhang Dongshuo ដែលជាមេធាវីរបស់លោក Schellenberg បាននិយាយថា លោក Schellenberg មិនមានឱកាសក្នុងការនិយាយជាមួយមេធាវីការពារក្តីរបស់លោកទេ។ លោកបាននិយាយថា តុលាការកំពូលត្រូវតែពិនិត្យសំណុំរឿងនេះ ជាមុនសិន មុនពេលផ្តន្ទាទោសប្រហារជីវិត៕
