.jpg)
លោកស្រីប្រធានគណៈកម្មការអ៊ីរ៉ុប Ursula von der Leyen ធ្វើសន្និសីទកាសែត។ AFP
កាលពីខែមិថុនា កន្លងទៅ សហរដ្ឋអាមេរិកនាំមុខគេនៅក្នុងយុទ្ធនាការចាក់វ៉ាក់សាំង ដោយពេលនោះមេដឹកនាំសហភាពអឺរ៉ុប បានណែនាំឱ្យប្រទេសជាសមាជិករបស់ខ្លួនបើកព្រំដែនជាមួយអាមេរិកវិញ ក្នុងក្ដីសង្ឃឹមថា ជំងឺរាតត្បាតកូវីដ ១៩ ចាប់ផ្ដើមបញ្ចប់ក្នុងរយៈពេលដ៏ខ្លី។ នេះបើតាមការឱ្យដឹងពីសារព័ត៌មាន The New York Times។
ប៉ុន្តែជិត ២ ខែក្រោយមក ទោះបីអឺរ៉ុបបាននាំមុខសហរដ្ឋអាមេរិកក្នុងយុទ្ធនាការចាក់វ៉ាក់សាំងវិញក្ដី ក៏ព្រំដែនអាមេរិកនៅតែបិទ ចំពោះអ្នកធ្វើដំណើរមកពីអឺរ៉ុបភាគច្រើន សូម្បីតែអ្នកចាក់វ៉ាក់សាំងរួចក៏ដោយ។ ក្រោយមក ដោយសារមានភាពភ័យខ្លាចចំពោះការរីករាលដាលនៃវ៉ារ៉្យង់ដែលតា ដែលកំពុងផ្ទុះឡើង កាន់តែធ្វើឱ្យការសម្រេចចិត្តបើកព្រំដែនរបស់អាមេរិកជាមួយអឺរ៉ុបស្ថិតក្នុងភាពមន្ទិលជាងមុនទៅទៀត។
ការសម្រេចបិទព្រំដែនរបស់សហរដ្ឋអាមេរិកបានធ្វើឱ្យអឺរ៉ុបភ្ញាក់ផ្អើល និងធ្វើឱ្យមេដឹកនាំរបស់ពួកគេខកចិត្តយ៉ាងខ្លាំង ហើយទាមទារឱ្យអាមេរិកឆ្លើយតបនឹងការសម្រេចរបស់អឺរ៉ុបក្នុងការបើកព្រំដែនរវាងគ្នានឹងគ្នា។
លោក Ursula von der Leyen ប្រធានគណៈកម្មការអឺរ៉ុប ដែលជាអង្គភាពប្រតិបត្តិរបស់ប្លុកនេះ បាននិយាយកាលពីសប្តាហ៍មុនថា៖ «យើងទទូចថា ច្បាប់នេះអនុវត្តបានលុះត្រាមានការយល់ព្រមពីភាគីទាំងសងខាង»។
មន្រ្តីក្នុងប្លុកនេះ ថែមទាំងស្នើឱ្យដាក់កំហិតលើការធ្វើដំណើរអាមេរិកឡើងវិញទៀតផង ប៉ុន្តែការសម្រេចចិត្តភ្លាមគ្មានការរំពឹងទុកនេះអាចធ្វើឱ្យវិស័យទេសចរណ៍នៅរដូវក្តៅប្លុកនេះធ្លាក់ក្នុងស្ថានភាពប្រថុយប្រថាន។
លោកស្រី Michele Kastelein ដែលជាជនជាតិបារាំង-អាមេរិក ពលរដ្ឋរស់នៅ Portola Valley រដ្ឋកាលីហ្វ័រនីញ៉ាបាននិយាយថា៖ «ឥឡូវនេះ យើងមានវ៉ាក់សាំងហើយ យ៉ាងហោចណាស់អនុញ្ញាតឱ្យអ្នកដែលចាក់ វ៉ាក់សាំងបានមកអាមេរិកវិញផង។ បងប្រុសជនជាតិបារាំងរបស់នាងឈ្មោះ Morris ត្រូវបោះបង់គម្រោងចូលរួមពិធីមង្គលការកូនប្រុសរបស់នាងនៅខែនេះ ដោយសារសង្ឃឹមថា អាមេរិកនឹងបន្ធូរបន្ថយការបិទព្រំដែនសម្រាប់ជនជាតិអឺរ៉ុបដូចគាត់ ដែលបានចាក់វ៉ាក់សាំងរួចហើយ។
គួរបញ្ជាក់ផងដែរ ការហាមឃាត់ការធ្វើដំណើររបស់អឹរ៉ុបចាប់ផ្តើមពីពេលមានការរីករាលដាលនៃជំងឺរាតត្បាត។ ទោះយ៉ាងណា អតីតប្រធានាធិបតីសហរដ្ឋអាមេរិក លោក Donald Trump បានដកការរឹតត្បិតនៅថ្ងៃចុងក្រោយនៃអាណត្តិរបស់លោក ប៉ុន្តែប្រធានាធិបតី Joe Biden បានស្តារឡើងវិញភ្លាមៗ បន្ទាប់ពីចូលកាន់តំណែង។
យ៉ាងណាមិញ សេតវិមានបានផ្តល់ការពន្យល់តិចតួចអំពីមូលហេតុ ដែលការរឹតបន្តឹងនៅតែមាន ទោះបីជាប្រទេសខ្លះ ដែលមានការឆ្លងខ្ពស់ និងអត្រាចាក់វ៉ាក់សាំងទាបប្រឈមនឹងការហាមឃាត់ស្រដៀងគ្នាក៏ដោយ។
នៅក្នុងសន្និសីទសារព័ត៌មានកាលពីសប្តាហ៍មុន អ្នកនាំពាក្យសេតវិមាន Jen Psaki បានប្រាប់ពីមូលហេតុ ដោយសារប្រទេសនេះអនុវត្តតាមការណែនាំរបស់អ្នកជំនាញផ្នែកវេជ្ជសាស្ត្រ និងកំពុងព្រួយបារម្ភអំពីការរីករាលដាលនៃវ៉ារ៉្យង់ដែលតា។
ដោយអនុវត្តតាមច្បាប់នេះ បច្ចុប្បន្នប្រជាជនស្ទើរតែទាំងអស់នៃតំបន់ Schengen របស់អឺរ៉ុប ដែលជាតំបន់គ្មានលិខិតឆ្លងដែន ដែលរួមបញ្ចូលទាំង ២៦ ប្រទេស រួមទាំងអង្គភាពផ្សេងទៀត ក៏ដូចជាអ្នកដែលរស់នៅក្នុងចក្រភពអង់គ្លេស និងអៀរឡង់នៅតែត្រូវបានហាមឃាត់មិនឱ្យធ្វើដំណើរទៅសហរដ្ឋអាមេរិក។
ប្រទេសចំនួន ៥ ផ្សេងទៀត ក៏ត្រូវបានហាមឃាត់ដែរ រួមមានប្រទេសដែលមានអត្រាឆ្លងខ្ពស់ដូចជា អ៊ីរ៉ង់ អាហ្វ្រិកខាងត្បូង ប្រេស៊ីល និងឥណ្ឌា ប៉ុន្តែក៏មានប្រទេសចិន ផងដែរ ដែលជាប្រទេសមានអត្រានៃការរីករាលដាលទាបជាងប្រទេសអាមេរិកអស់ជាច្រើនខែ។
ការហាមឃាត់ការធ្វើដំណើរនេះ បានលើកលែងមនុស្សមួយចំនួន ក្នុងនោះមានពលរដ្ឋអាមេរិកអ្នករស់នៅអាមេរិកអចិន្រៃ្តយ៍ និងសមាជិកគ្រួសារខ្លះនៃពលរដ្ឋអាមេរិក ដែលមានអាយុក្រោម ២១ ឆ្នាំ។
ប្រជាជនមកពីប្រទេសមានហានិភ័យបញ្ហាកូវីដនៅតែអាចចូលសហរដ្ឋអាមេរិកបាន ប្រសិនបើពួកគេចំណាយពេល ១៤ ថ្ងៃ មុនពេលពួកគេមកដល់ប្រទេស ដែលមិនស្ថិតនៅក្នុងបញ្ជីរបស់មជ្ឈមណ្ឌលត្រួតពិនិត្យ និងបង្ការជំងឺ (CDC)។
យ៉ាងណាមិញ សហភាពអឺរ៉ុបបានដាក់សហរដ្ឋអាមេរិកទៅក្នុងបញ្ជីប្រទេស ដែលមានសុវត្ថិភាពនៅក្នុងខែមិថុនា ហើយបច្ចុប្បន្នរួមមានប្រទេសអាល់បានី អាមេនី អូស្ត្រាលីអាស៊ែបៃហ្សង់ បូស្ន៊ី និងហឺហេ្ស ហ្គោវីណា ប្រ៊ុយណេដារូសាឡឹម កាណាដា អ៊ីស្រាអែល ជប៉ុន ហ្ស៊កដានី លីបង់ ម៉ុងតេណេហ្គ្រោ នូវែលសេឡង់ កាតា សាធារណរដ្ឋម៉ុលដាវី សាធារណរដ្ឋម៉ាសេដូនៀខាងជើង អារ៉ាប៊ី សាអ៊ូឌីត ស៊ែប៊ី សិង្ហបុរី កូរ៉េខាងត្បូង អ៊ុយក្រែន និងសហរដ្ឋអាមេរិក៕
