.jpg)
គ្រូទេព្យចាក់វ៉ាក់សាំងកូវីដ ១៩ Pfizer ឱ្យនិស្សិតមហាវិទ្យាល័យនៅទីក្រុងឡុងប៊ិច កាលពីថ្ងៃទី ១១ ខែ សីហា ឆ្នាំ ២០២១។ រូបថតAFP
មន្រ្តីសុខាភិបាលអាមេរិកកំពុងធ្វើយុទ្ធនាការចាក់វ៉ាក់សាំងទៅលើកុមារបន្ថែមទៀត ដោយសារករណីឆ្លងកូវីដ ១៩ ក្នុងសហគមន៍បានគំរាមកំហែងដល់ឱកាសសម្រាប់ការបើកសាលាឡើងវិញ។
តាមការរាយការណ៍របស់សារព័ត៌មាន Financial Times ក្រុមគ្រូពេទ្យនៅទូទាំងសហរដ្ឋអាមេរិកមើលឃើញថា ចំនួនកុមារដែលត្រូវព្យាបាលនៅមន្ទីរពេទ្យដោយសារជំងឺកូវីដ ១៩ កំពុងមានការកើនឡើង។
លោក Miguel Cardona រដ្ឋមន្រ្តីក្រសួងអប់រំអាមេរិកបានប្រាប់អ្នកយកព័ត៌មានកាលពីសប្តាហ៍មុនថា៖« យើងប្តេជ្ញានឹងព្យាយាមបង្កើនការចែកចាយវ៉ាក់សាំងការពារកូវីដ ១៩ ទៅកុមារឱ្យចំនួនមានការកើនឡើងទ្វេដង ដើម្បីធានាថា ពួកគេនឹងទទួលបានការការពារបន្ថែមទៀតនៅពេលពួកគេត្រឡប់ទៅសាលារៀនវិញ»។
លោក Cardona បានហៅការទទួលចាក់វ៉ាក់សាំងថា ជាឧបករណ៍ខ្លាំងបំផុតដើម្បីប្រយុទ្ធប្រឆាំងនឹងកូវីដ ១៩ និងអាចផ្តល់ឱកាសឱ្យសិស្សចូលសិក្សានៅក្នុងថ្នាក់រៀន ក៏ដូចជារត់់លេងនៅក្នុងបរិវេណសាលា និងលេងកីឡាជាមួយមិត្តភក្តិរបស់ពួកគេ។
ចំណែកយុទ្ធសាស្រ្តបន្ថែមដែលអាចជំរុញឱ្យកុមារទទួលការចាក់វ៉ាក់សាំងការពារកូវីដ ១៩ រដ្ឋបាល បៃដិន បានប្រើប្រាស់វិធីសាស្រ្តដោយយកអ្នកដែលមានប្រជាប្រិយភាពនៅក្នុងបណ្តាញសង្គម TikTok ម្នាក់ដើម្បីផ្សាយពីមាតិកាលើកទឹកចិត្តដល់កុមារក្នុងការទទួលការចាក់វ៉ាក់សាំងកូវីដ ១៩។
តាមតួលេខរបស់មជ្ឈមណ្ឌលគ្រប់គ្រង និងបង្ការជំងឺអាមេរិក (CDC) បានឱ្យដឹងថា ក្មេងអាយុពី ១២ ទៅ ១៥ ឆ្នាំ ដែលទទួលបានការចាក់វ៉ាក់សាំងពេញលេញមានត្រឹមតែ ៣១ ភាគរយប៉ុណ្ណោះ។
គួរបញ្ជាក់ផងដែរថា នៅសប្តាហ៍ដំបូងនៃខែសីហា ជាមធ្យមមានកុមារចំនួន ២១៦ នាក់ ត្រូវបានបញ្ជូនទៅមន្ទីរពេទ្យជារៀងរាល់ថ្ងៃដោយសារឆ្លងជំងឺកូវីដ ១៩ នៅសហរដ្ឋអាមេរិក នេះបើយោងតាម CDC។
លោកស្រី Inci Yildirim អ្នកឯកទេសខាងជំងឺឆ្លងកុមារនៅគ្លីនិករបស់សាលាវេជ្ជសាស្រ្ត Yale បានឃើញមានអ្នកជំងឺកូវីដ ១៩ វ័យក្មេងជាច្រើននាក់ក្នុងរយៈពេល ១ ខែចុងក្រោយនេះ។ លោកស្រីបាននិយាយថា លោកស្រីឃើញថា អ្នកជំងឺវ័យក្មេងទាំងនោះបានបញ្ចេញរោគសញ្ញាលឿនជាងមុន។
គិតត្រឹមថ្ងៃទី ៥ ខែសីហា មកកុមារជិត ៤,៣ លាននាក់ បានធ្វើតេស្តវិជ្ជមានកូវីដ ១៩ ចាប់តាំងពីមានជំងឺរាតត្បាតជាសកល។ កាលពីសប្តាហ៍មុនមានប្រមាណជាង ៩ ពាន់ករណីបន្ថែម ដែលនេះជាការកើនឡើង បន្ទាប់ពីមានការធ្លាក់ចុះនៅដើមរដូវក្តៅនៅសហរដ្ឋអាមេរិក៕
