ផ្ទះរាប់ពាន់ខ្នងនៅភាគខាងជើងរដ្ឋកាលីហ្វ័រនីញ៉ា ត្រូវរងការគំរាមកំហែងដោយភ្លើងឆេះព្រៃដ៏ធំបំផុតរបស់ប្រទេស ខណៈការប្រែប្រួលអាកាសធាតុបង្កឱ្យមានហានិភ័យខ្ពស់នៃការផ្ទុះអគ្គិភ័យថ្មីនៅទូទាំងភាគខាងលិច។
ព្យុះផ្គររន្ទះនៅចុងសប្តាហ៍ចុង ទូទាំងតំបន់សៀរ៉ាភាគខាងជើង មិនបានបង្កើតភ្លៀងច្រើនទេ ផ្ទុយទៅវិញខ្យល់បក់ និងរន្ទះបាញ់បានបណ្ដាលឱ្យមានអគ្គិភ័យដ៏ធំមួយ ធ្វើឱ្យអ្នកពន្លត់អគ្គិភ័យជាង ៦ ០០០ នាក់ ព្យាយាមទប់ទល់នឹងភ្លើងឆេះឌិចស៊ី។
លោក Edwin Zuniga អ្នកនាំពាក្យអគ្គិភ័យ បាននិយាយថា៖ «យើងកំពុងដោះស្រាយបញ្ហារន្ទះបាញ់ និងខ្យល់បក់គ្រប់ទីកន្លែង។ អាកាសធាតុ នឹងប្រែប្រួលបន្តិចក្នុងរយៈពេលប៉ុន្មានថ្ងៃខាងមុខនេះ»។
ខ្យល់ព្យុះ ដែលមានកម្លាំងរហូតដល់ ៨០ គីឡូម៉ែត្រក្នុង១ម៉ោង កាលពីថ្ងៃសៅរ៍ បានជំរុញឱ្យអណ្តាតភ្លើងឆាបឆេះកាន់តែជិតទីក្រុងជេនស៍វីល ដែលជាទីក្រុងដែលមានប្រជាជនប្រហែល ១ ៥០០ នាក់ នៅខាងកើតទីក្រុងហ្គ្រីនវីល ដែលជាសហគមន៍យុគសម័យ ដែលត្រូវបានបំផ្លាញដោយភ្លើងឆេះកាលពី ១០ ថ្ងៃមុន។
គួរបញ្ជាក់ផងដែរថា ភ្លើងឌីស៊ី គឺជាភ្លើងឆេះព្រៃធំបំផុតក្នុងចំណោមភ្លើងឆេះព្រៃធំៗ ជាង ១០០ ដែលកំពុងឆេះនៅក្នុងរដ្ឋជាង ១២ នៅភាគខាងលិចនៃប្រទេស ដែលជាតំបន់ដែលត្រូវប្រឈមមុខនឹងគ្រោះរាំងស្ងួត និងអាកាសធាតុក្តៅស្ងួត។
សេវាកម្មការពារអគ្គិភ័យព្រៃឈើអាមេរិក បាននិយាយថា ខ្លួនកំពុងចាត់វិធានការសកម្ម ដើម្បីដោះស្រាយវិបត្តិនេះ ដោយបានដាក់ពង្រាយអ្នកពន្លត់អគ្គិភ័យយ៉ាងពេញទំហឹង និងប្រព័ន្ធជួយសង្គ្រោះផងដែរ៕