មន្រ្តីថៃម្នាក់បាននិយាយនៅថ្ងៃចន្ទថា ប្រទេសថៃ ដែលជាប្រទេសផលិតវ៉ាក់សាំង AstraZeneca ក្នុងស្រុកស្រាប់ កំពុងស្វែងរកខ្ចីវ៉ាក់សាំង ចំនួន ១៥០ ០០០ ដូសពីអាណាចក្រហិម៉ាឡៃយ៉ានៃប្រទេសប៊ូតង់។ នេះបើតាមឱ្យដឹងពីសារព័ត៌មាន The Strait Times។
ប្រទេសថៃ បានប្រជែងគ្នាដើម្បីបង្កើនស្តុកវ៉ាក់សាំងរបស់ខ្លួន ក្រោយប្រទេសនេះត្រូវរងរលកដ៏អាក្រក់បំផុតដែលចាប់ផ្ដើមពេលប្រមាណ ២ ខែ មុននឹងប្រទេសនេះ ចាប់ផ្តើមដំណើរការយុទ្ធនាការវ៉ាក់សាំងរបស់ខ្លួនក្នុងខែមិថុនា។
ការស្នើសុំវ៉ាក់សាំងពីប្រទេសប៊ូតង់ ដែលមានប្រជាជនតិចជាង ១លាននាក់ឆ្លុះបញ្ចាំងពីកិច្ចខិតខំប្រឹងប្រែងក្នុងការដោះស្រោះវិបត្តិរបស់ថៃ បន្ទាប់ពីក្រុមហ៊ុន AstraZeneca បាននិយាយថា ខ្លួនអាចផ្គត់ផ្គង់ប្រទេសនេះបានប្រមាណ ៥ ទៅ ៦ លានដូសប្រចាំខែ (ស្មើនឹងពាក់កណ្តាលនៃអ្វីដែលរដ្ឋាភិបាលបានកំណត់គោលដៅ) ។
ប្រទេសថៃ ជាប្រទេសផលិតវ៉ាក់សាំង AstraZeneca សម្រាប់ចែកចាយក្នុងតំបន់ ប៉ុន្តែទើបតែបានចែកចាយវ៉ាក់សាំងដល់ប្រជាជនខ្លួនបាន ៧,១ ភាគរយប៉ុណ្ណោះ រហូតមកដល់ពេលនេះ ដោយការឆ្លងថ្មីប្រចាំថ្ងៃត្រូវបានព្យាករថា នឹងកើនឡើងទ្វេដងនៅខែក្រោយ។
ផ្ទុយទៅវិញ ប្រទេសប៊ូតង់ បានចាប់ផ្តើមចាក់វ៉ាក់សាំងនៅខែមីនា ហើយបានចាក់ថ្នាំលើសពី ១ លានដូស (ប្រហែល ២ ភាគ ៣ នៃចំនួនប្រជាជនរបស់ខ្លួន) ដែលជាចំនួនគ្រប់គ្រាន់សម្រាប់ចំនួនប្រជាជនតិចរបស់ខ្លួន។ ប្រទេសនេះ រកឃើញករណីតិចជាង ៣ ០០០ ករណី ហើយមានអ្នកស្លាប់តែ ៣ នាក់ប៉ុណ្ណោះ៕