.jpg)
ប្រជាជនអាហ្វហ្គានីស្ថានប្រមូលផ្តុំគ្នានៅខាងក្រៅស្ថានទូតបារាំងនៅក្នុងទីក្រុងកាប៊ុលកាលពីថ្ងៃទី១៧ សីហា។ AFP
ចក្រភពអង់គ្លេសនឹងចាប់ផ្តើមគម្រោងផ្លាស់ប្តូរលំនៅថ្មីមួយសម្រាប់ជនជាតិអាហ្វហ្គានីស្ថាន ដែលត្រូវការជំនួយជាពិសេសសម្រាប់ស្ត្រី និងក្មេងស្រី បន្ទាប់ពីពួកតាលីបង់ បានដណ្តើមគ្រប់គ្រងប្រទេសអាហ្វហ្គានីស្ថាន នាពេលថ្មីៗនេះ។
តាមការស្រង់សម្តីរបស់សារព័ត៌មានរ៉យទ័រ នាយករដ្ឋមន្ត្រីចក្រភពអង់គ្លេសលោក Boris Johnson បាននិយាយថា៖ «ក្រុមការងាររបស់ចក្រភពអង់គ្លេសនៅអាហ្វហ្គានីស្ថាន កំពុងធ្វើការគ្រប់ពេលវេលាក្នុងកាលៈទេសៈដ៏លំបាកនេះដើម្បីជួយជនជាតិអង់គ្លេស និងអ្នកផ្សេងជាច្រើនទៀតតាមដែលយើងអាចធ្វើទៅបានដើម្បីធានាឱ្យពួកគេមានសុវត្ថិភាព បានឆាប់តាមដែលអាចធ្វើទៅបាន»។
គួរបញ្ជាក់ផងដែរថា ពួកតាលីបង់បានវាយចូលដល់ទីក្រុងកាប៊ុលនៃប្រទេសអាហ្វហ្គានីស្ថាន ក្រោយពីប្រធានាធិបតីរបស់ប្រទេសនេះ បានភៀសខ្លួនចេញពីប្រទេសកាលពីល្ងាចថ្ងៃអាទិត្យសប្តាហ៍មុន។ ជ័យជម្នះរបស់ពួកតាលីបង់ក្នុងការវាយលុកចូលទៅក្នុងប្រទេសអាហ្វហ្គានីស្ថាន គឺរយៈពេល ២ សប្តាហ៍មុនការដកកងទ័ពអាមេរិកចេញពីប្រទេសនេះ៕
