កាលពីថ្ងៃចន្ទ ទី ១៦ សីហា នៅជិតតំបន់ French Riviera ដែលជាឆ្នេរមេឌីទែរ៉ាណេនៅភាគអាគ្នេយ៍នៃប្រទេសបារាំង រងនូវភ្លើងឆេះព្រៃដែលបណ្តាលឱ្យមានការជម្លៀសប្រជាជនចេញពីតំបន់នោះ។
អ្នកពន្លត់អគ្គិភ័យ បាននិយាយថា ភ្លើងបានឆាបឆេះផ្ទៃដីប្រមាណ ៦ពាន់ហិកតា។ នាយកដ្ឋានពន្លត់អគ្គិភ័យក្នុងតំបន់បាននិយាយថា គិតត្រឹមព្រឹកថ្ងៃទី១៧ សីហាអគ្គិភ័យនេះបានឆាបឆេះនៅលើផ្ទៃដីជាង ៥ ពាន់ហិកតាបន្ថែម។ អ្នកពន្លត់អគ្គិភ័យ ៩០០នាក់ និងប៉ូលិស ១២០នាក់ បានដាក់ពង្រាយដើម្បីពន្លត់អគ្គិភ័យនោះ។
គួរបញ្ជាក់ផងដែរថា តំបន់ភាគខាងត្បូងប្រទេសបារាំង គឺជាតំបន់ចុងក្រោយបង្អស់នៅទ្វីបអឺរ៉ុបដែលត្រូវបានបំផ្លាញដោយភ្លើងឆេះព្រៃនៅរដូវក្តៅនេះ ខណៈដែលសីតុណ្ហភាពនៅតែបន្តកើនឡើង។
អ្នកវិទ្យាសាស្ត្របាននិយាយថា រលកកម្តៅនៅតែបន្តកើនឡើងខ្លាំងដោយសារការប្រែប្រួលអាកាសធាតុដែលបណ្តាលមកពីការបញ្ចេញឱស្ម័នកាបូនដែលបង្កឡើងដោយមនុស្ស។ប្រទេសក្រិក តួកគី អេស្ប៉ាញ និងព័រទុយហ្កាល់ស្ថិតក្នុងចំណោមប្រទេសដែលមានភ្លើងឆេះព្រៃដែលបានឆក់យកជីវិតមនុស្ស និងបំផ្លាញផ្ទះសំបែងប្រជាជនជាច្រើន៕