.jpg)
លោកនាយករដ្ឋមន្ត្រី Stefan Lofven ធ្វើសេចក្តិថ្លែងការណ៍ ដើម្បីប្រកាសពីការលាលែងពីតំណែងរបស់លោកកាលពីថ្ងៃទី ២២ សីហា។ AFP
កាលពីថ្ងៃអាទិត្យ នាយករដ្ឋមន្រ្តីស៊ុយអែតបានប្រកាសថា លោកនឹងលាលែងចេញពីតំណែងមុនការបោះឆ្នោតនៅឆ្នាំក្រោយ ដើម្បីផ្តល់ឱកាសដល់អ្នកស្នងតំណែងរបស់លោកក្នុងការកែលម្អជំហររបស់គណបក្សប្រជាធិបតេយ្យ។
នាយករដ្ឋមន្រ្តីស៊ុយអែត លោក Stefan Lofven បាននិយាយនៅក្នុងសុន្ទរកថាប្រចាំឆ្នាំថា៖ «នៅក្នុងយុទ្ធនាការបោះឆ្នោតឆ្នាំក្រោយគណបក្សសង្គមប្រជាធិបតេយ្យនឹងដឹកនាំដោយអ្នកផ្សេងក្រៅពីខ្ញុំ។ អ្វីគ្រប់យ៉ាងមានទីបញ្ចប់ហើយខ្ញុំចង់ផ្តល់ឱ្យអ្នកស្នងតំណែងរបស់ខ្ញុំនូវលក្ខខណ្ឌល្អបំផុត» ។
គួរបញ្ជាក់ផងដែរថា លោក Lofven នឹងចុះចេញពីតំណែងនៅខែវិច្ឆិកា ខាងមុខនេះ ហើយការបោះឆ្នោតជាសកល គឺនឹងធ្វើឡើង នៅខែកញ្ញា ឆ្នាំ ២០២២។
លោកស្រី Jenny Madestam អ្នកវិទ្យាសាស្ត្រនយោបាយនៅសាកលវិទ្យាល័យ Sodertorn បានប្រាប់ទីភ្នាក់ងារព័ត៌មានស៊ុយអែតថា អ្នកស្នងតំណែងលោក Lofven អាចមានរដ្ឋមន្ត្រីហិរញ្ញវត្ថុបច្ចុប្បន្នលោកស្រី Magdalena Andersson។ លោកស្រីក៏បាននិយាយបន្ថែមថា រដ្ឋមន្រ្តីនៃក្រសួងថាមពល លោក Anders Ygeman រដ្ឋមន្ត្រីក្រសួងយុត្តិធម៌ លោក Morgan Johansson រដ្ឋមន្ត្រីក្រសួង សហគ្រាសនិងនវានុវត្តន៍ លោក Ibrahim Baylan និងរដ្ឋមន្រ្តីក្រសួងសុខាភិបាល លោកស្រី LenaHallengren ក៏អាចជាបេក្ខជនដែលអាចស្នងតំណាងរបស់លោក Lofven ផងដែរ៕
