កាលពីថ្ងៃអាទិត្យ ទី ២២ សីហា មនុស្សយ៉ាងតិច ២២ នាក់ និងជាង ៥០ នាក់ទៀត បានបាត់ខ្លួន បន្ទាប់ពីមានគ្រោះទឹកជំនន់បានហូរកាត់តំបន់ជនបទនៅតាមតំបន់ទន្លេ ស្ទឹងនិងព្រៃប្រហែល ៩០ នាទី នៅភាគខាងលិចទីក្រុង Nashville រដ្ឋ Tennessee សហរដ្ឋអាមេរិក។
ទីភ្នាក់ងារគ្រប់គ្រងអាសន្ននៅរដ្ឋTennessee បាននិយាយនៅក្នុងសេចក្តីថ្លែងការណ៍មួយថា៖«ភ្លៀងធ្លាក់ខ្លាំងបានបង្កឱ្យមានទឹកជំនន់ដ៏គ្រោះថ្នាក់នៅភាគកណ្តាលនៃរដ្ឋTennessee»។
សេវាកម្មអាកាសធាតុជាតិក៏បានរំឭកប្រជាជននៅតំបន់នោះថា នឹងមានភ្លៀងធ្លាក់បន្ថែមទៀតនៅតាមបណ្តាតំបន់ផ្សេងទៀតនៅក្នុងរដ្ឋនេះ។ ទីភ្នាក់ងារប្រព័ន្ធអាកាសធាតុជាតិ បាននិយាយថា៖ «សូមកុំចេញក្រៅយប់នេះ បើមិនមានការចាំបាច់។ ទឹកជំនន់មានគ្រោះថ្នាក់ជាពិសេសនៅពេលយប់»។
លោក Chris Davis មេបញ្ជាការនៅ Humphreys បានប្រាប់ភ្នាក់ងារទូរទស្សន៍ NS WSMV នៃរដ្ឋ Nashville ថា នៅក្នុងគ្រោះទឹកជំនន់នេះ បានបង្កឱ្យមានអ្នកស្លាប់ និងអ្នកដែលកំពុងបាត់ខ្លួនមួយចំនួនដែលនៅក្នុងចំណោមអ្នកដែលស្លាប់មាន ២ នាក់ ជាទារកភ្លោះដែលត្រូវបានឃ្លាតចេញពីឪពុករបស់ពួកគេកំឡុងពេលដែលទឹកជំនន់ហូរកាត់នៅតំបន់ប្រជុំជន។ លោក Davis បាននិយាយថា សាកសពរបស់បងប្អូនបង្កើតទាំង ២ នាក់នោះ ត្រូវបានរកឃើញហើយ។
ការកើនឡើងនៃទឹកជំនន់បានកើតឡើងកាលពីព្រឹកថ្ងៃទី ២២ សីហានេះ ខណៈដែលទឹកភ្លៀងបានធ្វើអោយជន់លិចទោះបីជាតំបន់នោះមានបឹង ស្ទឹង និងទន្លេដែលជាប្រព័ន្ធសម្រាប់ទឹកហូរក៏ដោយ។ នៅតំបន់ទីប្រជុំជន McEwen ដែលស្ថិតក្នុងចំណោមតំបន់ដែលរងផលប៉ះពាល់ខ្លាំងបំផុតនៃតំបន់ Humphreys County។
អំឡុងពេលភ្លាមៗនោះផ្លូវថ្នល់ត្រូវបានទឹកហូរកាត់ខ្លាំងដែលបង្កជាគ្រោះថ្នាក់ដល់អ្នកដែលរស់នៅតំបន់នោះត្រូវបានព័ទ្ធដោយទឹកទាំងនៅខាងក្នុងផ្ទះរបស់ពួកគេ។ អ្នកខ្លះត្រូវតោងចេញពីផ្ទះរបស់ពួកគេតាមបង្អួចចេញទៅខាងលើផ្ទះដើម្បីរង់ចាំការជួយសង្គ្រោះចេញពីតំបន់គ្រោះថ្នាក់នេះ។ អ្នកផ្សេងទៀតជាប់នៅក្នុងរថយន្តរបស់ពួកគេអ្នកបើកបរឡានដឹកទំនិញម្នាក់ បាននិយាយថា លោកបានជាប់នៅក្នុងទឹកជំនន់អស់រយៈពេល ៨ ម៉ោង។
អ្នករស់នៅតំបន់នោះបាននិយាយថា មានការព្រមានពីគ្រោះថ្នាក់នេះជាផ្លូវការតាមរយៈសារជាអក្សរ និងទំនាក់ទំនងតាមទូរស័ព្ទពីមិត្តភក្តិរបស់ពួកគេទាក់ទងនឹងលទ្ធភាពដែលអាចមានការជន់លិចនៅតំបន់ដែលពួកគេរស់នៅ។ ប៉ុន្តែអ្នកខ្លះនិយាយថា ពួកគេមិនបានដឹងពីភាពបន្ទាន់ដែលអាចនឹងមកដល់នោះទេ។ សម្រាប់អ្នកផ្សេងទៀតពួកគេមិនមានពេលវេលាគ្រប់គ្រាន់ដើម្បីរៀបចំអ្វីឡើយ។
លោក Rob Edwards អនុប្រធានការិយាល័យប៉ូលិសនៅ Humphreys បាននិយាយតាមអ៊ីមែលថា ចំនួនអ្នកស្លាប់ដោយសារគ្រោះទឹកជំនន់នេះអាចនឹងកើនឡើងបន្ថែមទៀត៕