ជើងហោះហើរយោធាចុងក្រោយរបស់ចក្រភពអង់គ្លេស បានចាកចេញពីទីក្រុងកាប៊ុលកាលពីល្ងាចថ្ងៃសៅរ៍ បន្ទាប់ពីបានជម្លៀសប្រជាជនជាង ១៥ ០០០ នាក់ ក្នុងរយៈពេល ២ សប្តាហ៍ ចាប់តាំងពីក្រុមតាលីបង់បានកាន់កាប់អាហ្វហ្គានីស្ថានមក។ នេះបើតាមឱ្យដឹងពីសារព័ត៌មានរ៉យទ័រ។
រដ្ឋាភិបាលចក្រភពអង់គ្លេសនៅថ្ងៃសុក្រសប្ដាហ៍មុន បាននិយាយថា បេសកកម្មជម្លៀសខ្លួន នឹងត្រូវបញ្ចប់ក្នុងរយៈពេលប៉ុន្មានម៉ោងហើយយោធារបស់ខ្លួននឹងមិនអាចបណ្តេញពលរដ្ឋអាហ្វហ្គានីស្ថានណាម្នាក់ ដែលមានសិទ្ធិទទួលបានការតាំងទីលំនៅថ្មី ដែលមិនទាន់បានចូលអាកាសយានដ្ឋានកាប៊ុលឡើយ។
រដ្ឋមន្ត្រីការពារជាតិលោក Ben Wallace បាននិយាយថា៖ «យើងគួរតែមានមោទនភាពចំពោះកងកម្លាំងប្រដាប់អាវុធរបស់យើងស្វាគមន៍ចំពោះអ្នកដែលមករកជីវិត និងសោកស្តាយចំពោះអ្នកដែលនៅសេសសល់»។
គួរបញ្ជាក់ផងដែរថា ប្រធានាធិបតី ចូ បៃដិន បានកំណត់ថ្ងៃទី ៣១ ខែសីហា ជាថ្ងៃផុតកំណត់ សម្រាប់យោធាអាមេរិក ដើម្បីចាកចេញពីអាហ្វហ្គានីស្ថាន ខណៈកងកម្លាំងសម្ព័ន្ធមិត្តរួមទាំងអង់គ្លេស បានជ្រើសរើសចាកចេញមុនពេលនោះ។ អង់គ្លេសក៏បានផ្អាកប្រតិបត្តិការស្ថានទូតនៅអាហ្វហ្គានីស្ថានផងដែរ។
លោក Wallace បានប៉ាន់ប្រមាណកាលពីថ្ងៃសុក្រថា មានជនជាតិអាហ្វហ្គានីស្ថានចន្លោះពី ៨០០ ទៅ ១ ១០០ នាក់ ដែលបានធ្វើការជាមួយអង់គ្លេសហើយមានសិទ្ធិទទួលបានការតាំងទីលំនៅថ្មីនឹងមិនត្រូវចេញដំណើរតាមអាកាសទេ ហើយប្រទេសនេះ ក៏បានសន្យាថានឹងជួយពួកគេប្រសិនបើពួកគេអាចចាកចេញដោយផ្លូវគោក៕