.jpg)
លោក Andrew Cross កំពុងបើកម៉ាស៊ីនច្រូតស្រូវសាឡីនៅក្នុងស្រែ ១ ក្បែរទីប្រជុំជន Inverleigh។ AFP
ប្រទេសអូស្ត្រាលី កំពុងត្រៀមបើកដំណើរការទិដ្ឋាការថ្មីដែលបង្កើតដើម្បីបង្កើនចំនួនជនបរទេសមកធ្វើការនៅកសិដ្ឋានអូស្ត្រាលី។
ក្នុងការធ្វើកិច្ចព្រមព្រៀងភាពជាដៃគូសម្រាប់ទិដ្ឋាការថ្មីនេះ រដ្ឋមន្ត្រីក្រសួងកសិកម្មលោក David Littleproud បាននិយាយថា រដ្ឋាភិបាលនឹងផ្តោតលើប្រទេសដែលមានកិច្ចព្រមព្រៀងទ្វេភាគីជាយូរមកហើយដូចជាប្រទេសហ្វីលីពីន ថៃ សិង្ហបុរី វៀតណាម កូរ៉េខាងត្បូង ព្រមទាំងសមាជិកដទៃទៀតនៃសមាគមប្រជាជាតិអាស៊ីអាគ្នេយ៍ អាស៊ាន)។
ទិដ្ឋាការថ្មីនេះនឹងផ្តល់ជូនដល់កម្មករ និងនិយោជិតទូទាំងវិស័យកសិកម្ម វិស័យជលផល និងព្រៃឈើ។ ទិដ្ឋាការសម្រាប់វិស័យកសិកម្មនៅអូស្រ្តាលីជាវិធីសាស្រ្តព្យាយាមផ្តល់នូវដំណោះស្រាយរយៈពេលវែងចំពោះកង្វះកម្លាំងពលកម្មនៅក្នុងវិស័យកសិកម្មដែលមានប្រហែល ៣ ភាគរយទិន្នផលសរុបរបស់ប្រទេសអូស្ត្រាលី។
វិធីសាស្រ្តថ្មីនេះនឹងអនុញ្ញាតឱ្យពលករចំណាកស្រុកធ្វើការនៅប្រទេសអូស្ត្រាលី រយៈពេល ៣ ឆ្នាំ ដោយមានតម្រូវការវិលត្រឡប់ទៅប្រទេសកំណើតវិញរយៈពេល ៣ ខែជារៀងរាល់ឆ្នាំ។ ប្រសិនបើជនចំណាកស្រុកដែលមកធ្វើការនៅប្រទេសអូស្រ្តាលី យល់ព្រមធ្វើការនៅក្នុងវិស័យដែលបានអនុញ្ញាតលើសពី ៣ ឆ្នាំ ពួកគេក៏អាចដាក់ពាក្យសុំស្នាក់នៅអចិន្រៃ្តយ៍៍បានដែរ។
តាមតួលេខស្ទង់មតិផ្ទាល់របស់សហព័ន្ធកសិករអូស្ត្រាលីកសិករប្រហែល ៨០ ភាគរយ បានជួបប្រទះការលំបាកខ្លាំងក្នុងការស្វែងរកកម្មករ។
ទិដ្ឋាការនេះក៏ធ្វើឱ្យមានការព្រួយបារម្ភនឹងការកើនកម្លាំងពលករកម្មករដោយនិយោជិតដែលអាចនឹងផ្តល់ប្រាក់ទាបជាងតម្លៃទីផ្សារ ដោយសារកំណើននៃជនចំណាកស្រុកមកប្រទេសអូស្ត្រាលី ផងដែរ។
ប្រធានសហព័ន្ធកសិករអូស្ត្រាលី លោក Fiona Simson បាននិយាយថា៖ «អ្វីដែលត្រូវការ គឺទិដ្ឋាការដែលអាចបត់បែនបាន និងអាចឱ្យពួកគេចល័តបាន ដើម្បីអាចឱ្យកម្មករផ្លាស់ប្តូរពីកសិដ្ឋាន ១ ទៅកសិដ្ឋាន ១»។ លោកបាននិយាយបន្ថែមថា កសិដ្ឋានលក្ខណៈគ្រួសារតូចៗជាច្រើនមិនអាចផ្តល់ការងារទៅកម្មករដែលត្រូវការក្រោមទិដ្ឋាការជាក់លាក់បាននោះទេ។
ទោះយ៉ាងណា អ្នកស្រាវជ្រាវវិស័យកសិកម្មខ្លះជឿជាក់ថា ទិដ្ឋាការដែលផ្តោតសំខាន់លើបណ្តាប្រទេសអាស៊ី គឺមិនផ្អែកតែទៅលើលទ្ធភាពនៃចំនួនពលករចំណាកស្រុកតាមបណ្តាប្រទេសនីមួយៗនេះទេ។
នៅក្នុងរបាយការណ៍ឆ្នាំ ២០១៨ អ្នកជំនាញខាងវិស័យកសិកម្មលោក Joanna Howe សាស្រ្តាចារ្យនៅសាកលវិទ្យាល័យ Adelaide បានសរសេរថា និយោជកមានទំនោរជ្រើសរើសកម្មករផ្អែកលើការយល់ឃើញថា កម្មករទាំងនោះងាយស្រួលគ្រប់គ្រង និងមានតម្លៃពលកម្មទាប៕
