.jpg)
កងកម្លាំងតាលីបង់ជិះរថយន្តត្បាតតាមដងផ្លូវនៅទីក្រុងកាប៊ុល ក្រោយអាមេរិកដកទ័ពចេញ។ AFP
កាលពីថ្ងៃចន្ទ ទី ៣០ សីហា ក្រុមប្រឹក្សាសន្តិសុខអង្គការសហប្រជាជាតិ បានជំរុញក្រុមតាលីបង់អនុញ្ញាតឱ្យប្រជាជនចាកចេញពីប្រទេសអាហ្វហ្គានីស្ថាន បន្ទាប់ពីសហរដ្ឋអាមេរិក បានដកកងកម្លាំងរបស់ខ្លួនចេញពីប្រទេសនេះ។
ក្រោយពីកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ឯកអគ្គរដ្ឋទូតរងបារាំង លោក Nathalie Broadhurst បាននិយាយថា ប្រជាជនអាហ្វហ្គានីស្ថានទាំងអស់ កំពុងរងចាំមើលក្រុមប្រឹក្សានេះ ហើយពួកគេរំពឹងថា នឹងមានការជួយគាំទ្រពីសហគមន៍អន្តរជាតិ។ លោកបានបន្តនិយាយថា ការខ្វះសាមគ្គីភាព គឺជាការខកចិត្តមួយសម្រាប់ប្រជាជនអាហ្វហ្គានីស្ថាន។
ប៉ុន្តែឯកអគ្គរដ្ឋទូតចិន លោក Geng Shuang បាននិយាយថា សហរដ្ឋអាមេរិក និងសម្ព័ន្ធមិត្តរបស់ខ្លួន បានបន្សល់ទុកនូវមហន្តរាយធំមួយ ដែលពួកគេបានបង្កើតឡើង ហើយទម្លាក់ការស្តីបន្ទោសនិងការទទួលខុសត្រូវទៅលើប្រទេសជិតខាងអាហ្វហ្គានីស្ថាន និងក្រុមប្រឹក្សាសន្តិសុខ។
កាលពីថ្ងៃទី ២៩ សីហា ក្រុមតាលីបង់ បាននិយាយថា ពួកគេនឹងអនុញ្ញាតឱ្យមានការធ្វើដំណើរធម្មតាវិញ បន្ទាប់ពីទ័ពរបស់អាមេរិកចាកចេញពីអាកាសយានដ្ឋានក្រុងកាប៊ុល ហើយពួកគេផ្តល់ការធានាថា អ្នកដែលមានឯកសារធ្វើដំណើរ នឹងនៅតែអាចចាកចេញពីប្រទេសនេះបាន៕
