ក្នុងរយៈពេលតែប៉ុន្មានសប្តាហ៍ ក្រោយរដ្ឋអារីហ្សូណា អនុញ្ញាតឱ្យបើកសាលារៀនវិញដោយមិនបានគោរពទៅតាមសេចក្ដីណែនាំការពារកូវីដ និងលុបបំបាត់គោលការណ៍ពាក់ម៉ាស់ សិស្សានុសិស្ស និងគ្រូបង្រៀនរាប់ពាន់នាក់ ត្រូវធ្វើចត្តាឡីស័ក ក្រោយមានការរាតត្បាតជំងឺកូវីដនៅជុំវិញទីក្រុង Phoenix ក្នុងរដ្ឋនេះ។
សារព័ត៌មានញូវយ៉កថែមស៍បានឱ្យដឹងថា ឥឡូវនេះ ជំងឺរាតត្បាតបានបង្កឱ្យមានភាពវឹកវរពេញរដ្ឋអារីហ្សូណា ដោយអាណាព្យាបាលបានបញ្ឆេះកំហឹងនយោបាយដល់រដ្ឋបាល ក្រោមការដឹកនាំអភិបាលរដ្ឋដោយលោក Doug Ducey និងមេដឹកនាំគណបក្សសាធារណរដ្ឋដទៃទៀត ដែលបានលុបបំបាត់គោលការណ៍ការពារកូវីដទាំងនេះ។ ភាពច្របូកច្របល់នេះ បានគូសបញ្ជាក់ពីការសម្រេចចិត្តដ៏គួរឱ្យភ័យខ្លាច ស្ដីអំពីការអនុវត្តតាមវិធានការសុវត្ថិភាពកូវីដ ១៩ និងសេរីភាពផ្ទាល់ខ្លួន។
លោក Ducey ជាអភិបាលរដ្ឋមកពីគណបក្សសាធារណរដ្ឋ ត្រូវទទួលរងការរិះគន់ពីវិធានការប្រឆាំងនឹងម៉ាស់ដែលអនុម័ត ដោយសភានីតិកាលដឹកនាំដោយគណបក្សសាធារណរដ្ឋរបស់អារីហ្សូណា កាលពីពេលថ្មីៗនេះ។ លោកក៏បានបដិសេធផ្ដល់ប្រាក់រាប់លានដុល្លារពីកញ្ចប់ជួយសង្គ្រោះជំងឺរាតត្បាតសហព័ន្ធដល់សាលារៀនណា ដែលអនុម័តគោលការណ៍ពាក់ម៉ាស់ប្រឆាំងនឹងច្បាប់រដ្ឋចូលជាធរមាននៅចុងខែកញ្ញា។
លោកក៏បានផ្តល់បណ្ណ ដែលមានចំនួនទឹកប្រាក់ ៧ ០០០ ដុល្លារ ដល់គ្រួសារណាដែលចង់ចាកចេញពីសង្កាត់ណា ដែលតម្រូវឱ្យពាក់ម៉ាស់។ លោកបាននិយាយថា ការសម្រេចចិត្តក្នុងការពាក់ម៉ាស់ គឺជាជម្រើសរបស់អាណាព្យាបាល មិនមែនជាការសម្រេចចិត្តរបស់មន្រ្តីនៅក្នុងវិស័យអប់រំទេ។
លោក Ducey បាននិយាយនៅក្នុងសន្និសីទសារព័ត៌មានថ្មីៗ នេះថា៖ «នៅអារីហ្សូណាយើង គឺជាអ្នកគាំទ្រការសម្រេចចិត្តរបស់ឪពុកម្ដាយ។ ខ្ញុំចង់ឱ្យពួកគាត់សម្រេចចិត្តលើអ្វីដែលពួកគេគិតថា ជារឿងត្រឹមត្រូវ»។
នៅជាយក្រុង Phoenix ក្រុមប្រឹក្សាសាលាបានកោះប្រជុំបន្ទាន់នៅខែសីហា ដើម្បីសម្រេចថា តើសិស្ស និងបុគ្គលិកគួរតែត្រូវពាក់ម៉ាស់ ឬ យ៉ាងណា? មន្រ្តីសាលាបាននិយាយថា ការរំលោភច្បាប់រដ្ឋ អាចរារាំងសង្កាត់នេះពីការទទួលបានប្រាក់ ១១ លានដុល្លារ ដើម្បីជួលបុគ្គលិក និងជួយសិស្ស ដែលត្រូវទទួលរងផលប៉ះពាល់ក្រោយពីការបិទសាលាអស់រយៈពេលយ៉ាងយូរ។
ការសម្រេចចិត្តតាមរយៈការបោះឆ្នោតថា តើត្រូវពាក់ម៉ាស់ ឬអត់? ត្រូវទទួលបរាជ័យ ដោយការបោះឆ្នោតគាំទ្រមិនឱ្យមានការពាក់ម៉ាស់មាន ៣ សំឡេង និងការគាំទ្រឱ្យមានការពាក់ម៉ាស់ទទួលបាន ២ សំឡេង។
យ៉ាងណាមិញ អាណាព្យាបាលដែលគាំទ្រគោលការណ៍ពាក់ម៉ាស់បានអស់សង្ឃឹមចំពោះក្រុមប្រឹក្សាភិបាលទាំងនេះ ហើយបាននិយាយថា៖ «ក្រុមនេះបានដាក់លុយនៅនឹងមុខសំខាន់ជាងសុខភាពកូនៗរបស់ពួកគេទៀត»។
អ្នកស្រី Sandy Kirby ដែលជាអាណាព្យាបាល និងគិលានុបដ្ឋាយិកាម្នាក់និយាយថា៖ «ពួកគេមិនបានការពារកូនៗរបស់យើងទេ»។ ប៉ុន្តែ អ្នកស្រី Kelli Wilson ជាអ្នកគាំទ្រលោក Donald Trump និងមានកូនប្រុសអាយុ ១៣ ឆ្នាំ ដែលមិនបានចាក់វ៉ាក់សាំងហើយមិនពាក់ម៉ាស់ទៅសាលារៀនបាននិយាយថា អ្វីដែលរដ្ឋនេះបានសម្រេចជាអ្វីដែលត្រឹមត្រូវ។
ក្រុមអ្នកនៅក្នុងវិស័យអប់រំបានប្តឹងឱ្យលុបចោលបម្រាមមិនឱ្យពាក់ម៉ាស់ ហើយសាលារៀនក្នុងសង្កាត់ចំនួន ១២ នៅទូទាំងរដ្ឋអារីហ្សូណាបានអនុវត្តគោលការណ៍ពាក់ម៉ាស់ បើទោះបីជាមានការហាមឃាត់មិនឱ្យពាក់ក៏ដោយ។ រដ្ឋបាលលោក Joe Biden បានព្រមានអភិបាលរដ្ឋដូចជាលោក Docey និងលោក Ron DeSantis នៃរដ្ឋហ្វ្លរីដាថា មិនត្រូវរាំងកញ្ចប់ថវិកាសហព័ន្ធពីសាលារៀន ដែលអនុវត្តគោលការណ៍ពាក់ម៉ាស់ឡើយ។
មន្ទីរពេទ្យដែលមានអ្នកជំងឺជាមធ្យមប្រមាណ ៥២០ នាក់ កាលពីដើមខែកក្កដា ឥឡូវនេះបានហក់ឡើងប្រហែល ២ ០០០ នាក់ហើយទាំងអាណាព្យាបាល សហជីពគ្រូបង្រៀន និងមន្រ្តីសុខាភិបាលសាធារណៈជាច្រើនបាននិយាយថា សកម្មភាពរបស់លោក Docey បានដាក់ទណ្ឌកម្មសាលារៀន ដែលធ្វើតាមការណែនាំវិទ្យាសាស្ត្រ។ មជ្ឈមណ្ឌលគ្រប់គ្រង និងបង្ការជំងឺ (CDC) ក៏បានណែនាំជារឿយៗឱ្យគោរពតាមគោលការណ៍ពាក់ម៉ាស់សម្រាប់សិស្សនិស្សិត និងអ្នកនៅក្នុងសាលារៀនទាំងអស់។
លោក Jann-Michael Greenburg ប្រធានក្រុមប្រឹក្សាភិបាលនៃសាលា Scottsdale Unified School District បាននិយាយថា៖ «ការដាក់កំហិតនេះ បានដាក់ជីវិតមនុស្សនៅក្នុងហានិភ័យ។ ខ្ញុំកំពុងតែឆ្ងល់ថា តើយើងនឹងឈ្នះការប្រយុទ្ធប្រឆាំងនឹងជំងឺនេះទេ? បើរដ្ឋាភិបាលបញ្ចេញឥរិយាបថបែបនេះ?»៕