.jpg)
ស្ត្រីអាហ្វហ្គានីស្ថានចូលរួមការហែក្បួនតវ៉ា ដើម្បីទាមទារសិទ្ធិសេរីភាពរបស់ពួកគេនៅក្រោមការគ្រប់គ្រងរបស់ក្រុមតាលីបង់។ AFP
កាលពីថ្ងៃសៅរ៍ ទី ៤ សីហា ក្រុមតាលីបង់បានធ្វើការបង្ក្រាបដោយហិង្សាទៅលើបាតុកម្មរបស់ស្ត្រីនៅក្រុងកាប៊ុល ខណៈពេលដែលនៅជាង ១០០ គីឡូម៉ែត្រភាគខាងជើងរដ្ឋធានី ការប៉ះទង្គិចបានផ្ទុះឡើងនៅជ្រលងភ្នំប៉ានជសៀរ ជាមួយកងកម្លាំងប្រឆាំងដែលជាអតីតសមាជិកនៃកងទ័ព និងកងជីវពលរដ្ឋាភិបាលអាហ្វហ្គានីស្ថាន។
ស្ត្រីជាច្រើន ដែលបានចូលរួមបាតុកម្មទាមទារឱ្យរួមបញ្ចូលស្ត្រីទៅក្នុងរដ្ឋាភិបាលថ្មី ត្រូវយុទ្ធជនវាយប្រហារទៅលើខ្លួនប្រាណ ដែលក្នុងចំណោមភ័ស្តុតាងដំបូងដែលបង្ហាញក្រុមនេះនៅតែមិនគោរពសិទ្ធិស្ត្រី។
ចាប់តាំងពីចូលកាន់អំណាចមក តាលីបង់បានធ្វើយុទ្ធនាការផ្សព្វផ្សាយមួយ ដើម្បីបង្ហាញទៅកាន់ពិភពលោក អង្គការផ្ដល់ជំនួយ និងប្រជាជនអាហ្វហ្គានីស្ថានថា ការដឹកនាំផ្ដាច់ការដូចកាលពីពួកគេអំណាចលើកដំបូងនៅឆ្នាំ ១៩៩៦ ដល់ ២០០១ គឺជារឿងអតីតកាលហើយពួកគេនឹងផ្លាស់ប្ដូររបៀបការដឹកនាំរបស់ពួកគេ។
អ្នកចូលរួមបាតុកម្មអាយុ ២៤ ឆ្នាំ ១ រូប បានប្រាប់កាសែតញូវយ៉កថាមស៍តាមទូរស័ព្ទថា ក្រុមតាលីបង់ បានព្យាយាមរារាំងការប្រមូលផ្ដុំស្ត្រីប្រហែល ១០០ នាក់ ដោយប្រើប្រាស់ឧស្ម័នបង្ហូរទឹកភ្នែក និងការវាយដំដោយស្វ័យកាំភ្លើង និងដំបងដែក។ នាងនិយាយថា នាងត្រូវរងការដេរ ៥ ថ្នេរ នៅលើរបួសក្បាល បន្ទាប់ពីការវាយដំដោយឧបករណ៍លោហៈមួយដែលធ្វើឱ្យនាងបាត់បង់ស្មារតី។
វីដេអូមួយនៃការបាតុកម្មនេះ ដែលចុះផ្សាយដោយបណ្ដាសារព័ត៌មានអាហ្វហ្គានីស្ថាន បង្ហាញរូបភាពសមាជិកតាលីបង់ ១ រូប អមដោយខ្មាន់កាំភ្លើងជាច្រើននាក់ កំពុងបញ្ជាឱ្យក្រុមស្ត្រីរំសាយការបាតុកម្មរបស់គេតាមរយៈការស្រែកលើមេក្រូហ្វូន ដែលក្រោយមកបានឆក់ចេញពីដៃបុរសរូបនេះដោយស្ត្រី ១ រូប។
ស្របពេលជាមួយគ្នានេះ តាលីបង់បានចាប់ផ្ដើមការវាយប្រហារបន្ថែមទៀត ដើម្បីបង្ក្រាបកងកម្លាំងប្រឆាំងនៅជ្រលងភ្នំប៉ានជសៀរដឹកនាំដោយលោក អាម៉ាដ ម៉ាស៊ូដ កូនប្រុសរបស់មេដឹកនាំដ៏ល្បីល្បាញលោក អាម៉ាដ សា ម៉ាស៊ូដដែលបានទប់ទល់ការឈ្លានពានរបស់តាលីបង់ និងសហភាពសូវៀត កាលពីប៉ុន្មានទសវត្សរ៍មុន។
កាលពីថ្ងៃសុក្រ មានការរាយការណ៍ថា តាលីបង់បានចូលកាន់កាប់ជ្រលងភ្នំនេះទាំងមូល ធ្វើឱ្យសមាជិកតាលីបង់នៅក្រុងកាប៊ុលបាញ់កាំភ្លើងទៅលើមេឃជាការអបអរសាទរ ដោយគ្រាប់សំណធ្លាក់មកវិញបានសម្លាប់មនុស្សយ៉ាងហោចណាស់ ១៧ នាក់។ ប៉ុន្តែការរាយការណ៍អំពីការដួលរលំនេះ ត្រូវបានច្រានចោលដោយក្រុមប្រឆាំងដែលនិយាយថា ការរាយការណ៍នេះគឺ «គ្មានមូលដ្ឋាន»។
ភាគីទាំង ២ បានអះអាងថា មានអានុភាពក្នុងជ្រលងភ្នំប៉ានជសៀរ ប៉ុន្តែមិនអាចបង្ហាញភ័ស្តុតាង ដើម្បីបញ្ជាក់បានទេ។ ការលើកឡើងផ្ទុយគ្នាដោយភាគីទាំង ២ បានធ្វើឱ្យមានការលំបាកសម្រាប់អ្នកឃ្លាំមើលខាងក្រៅក្នុងការតាមដានទីតាំងនៃសមរភូមិ។
អ្នកនាំពាក្យតាលីបង់ ១ រូប ឈ្មោះប៊ីឡាល់ ខារីមី និយាយថា ពួកគេបានចូលកាន់កាប់ស្រុកចំនួន ២ បន្ថែមទៀត ដែលផ្ដល់ឱ្យតាលីបង់នូវការគ្រប់គ្រងស្រុកចំនួន ៤ ក្នុងចំណោមស្រុកចំនួន ៧ នៃខេត្តនេះ។
ប៉ុន្តែរណសិរ្សតស៊ូជាតិ (NRF) របស់លោក ម៉ាស៊ូត បាននិយាយថា ពួកគេបានឡោមព័ទ្ធ «ភេរវកររាប់ពាន់នាក់» នៅច្រកចូលជ្រលងភ្នំប៉ានជសៀរ ហើយធ្វើសមាជិកតាលីបង់បោះបង់រថយន្ត និងឧបករណ៍ជាច្រើននៅទីនោះ។ អ្នកនាំពាក្យ NRF លោក ហ្វាហ៊ីម ដាសទី បានអះអាងថា ចាប់តាំងពីការប៉ះទង្គិចកើតឡើង ពួកគេបានសម្លាប់សមាជិកក្រុមតាលីបង់ជាង ៦០០ នាក់ ហើយយ៉ាងហោចណាស់ ១ ០០០ នាក់ផ្សេងទៀត បានចុះចាញ់ ឬត្រូវបានចាប់ខ្លួន។
ប្រធានអគ្គសេនាធិការចម្រុះ កងប្រដាប់អាវុធអាមេរិក នាយឧត្ដមសេនីយ៍ ម៉ាក មីលលី បានគូសបញ្ជាក់អំពីស្ថានភាពនៅអាហ្វហ្គានីស្ថានថា៖ «ការប៉ាន់ស្មានយោធារបស់ខ្ញុំ គឺថាលក្ខខណ្ឌបច្ចុប្បន្នទំនងនឹងវិវឌ្ឍទៅរកសង្គ្រាមស៊ីវិល។ ខ្ញុំមិនដឹងថា តើតាលីបង់អាចបង្រួបបង្រួមអំណាចហើយបង្កើតរដ្ឋាភិបាលបាន ឬទេ?»។
ប្រឈមមុខនឹងបញ្ហានៃការផ្លាស់ប្ដូរពីក្រុមឧទ្ទាមទៅជាអ្នកគ្រប់គ្រងប្រទេសតាលីបង់ ហាក់បីដូចជាប្ដេជ្ញាកម្ចាត់ចលនាប្រឆាំងនៅជ្រលងភ្នំប៉ានជសៀរមុនពេលប្រកាសរចនាសម្ព័ន្ធនៃរដ្ឋាភិបាលថ្មីរបស់ខ្លួន។
ប៉ុន្តែជ្រលងភ្នំប៉ានជសៀរ ដែលមានប្រវត្តិសាស្ត្រតតាំងនឹងការឈ្លានពានអស់រយៈពេលជិត ១ ទសវត្សរ៍ ដោយសហភាពសូវៀត និងដោយតាលីបង់ កាលពីឆ្នាំ ១៩៩៦ ដល់ ២០០១ ឥឡូវនេះនៅតែមិនព្រមចុះចាញ់តាលីបង់។
អ្នកវិភាគមួយចំនួនបាននិយាយថា គោលបំណងចម្បងនៅពេលនេះរបស់មេដឹកនាំចលនាតស៊ូ គឺការទប់ទល់ក្រុមតាលីបង់ឱ្យបានដល់ចុងខែតុលា នៅពេលការធ្លាក់ព្រិលលើភ្នំនឹងរារាំងគ្រប់ប្រតិបត្តិការយោធា ហើយផ្ដល់រយៈពេលប្រមាណ ៥ ខែ ទិញអាវុធបន្ថែម ឬធ្វើការទាក់ទាញជំនួយពីខាងក្រៅលោកឧត្ដមសេនីយ៍មីលលីនិយាយថា ប្រសិនបើតាលីបង់មិនអាចសម្រេចគោលដៅរួបរួមអំណាច និងបង្កើតរដ្ឋាភិបាលបានទេ នោះនឹង «នាំឱ្យមានការស្ថាបនាឡើងវិញនូវក្រុមអាល់កៃដា ឬការរីកចម្រើនរបស់អាយស៊ីស (ISIS-K) ឬក្រុមភេរវករជាច្រើនផ្សេងទៀត» ក្នុងរយៈពេល ៣ ឆ្នាំខាងមុខ៕
