ប្រទេសចិន បានចេញច្បាប់ថ្មី ដែលកំណត់ពេលវេលាសម្រាប់ការលេងហ្គេមចំពោះក្មេងដែលមានអាយុក្រោម ១៨ ឆ្នាំ។ ការហាមឃាត់នេះ ត្រូវបានធ្វើឡើង បន្ទាប់ពីមានការព្រួយបារម្ភពីផលប៉ះពាល់ ដែលអាចមានទៅលើកុមារទាំងនោះ ដោយសារចំណាយពេលលើការលេងហ្គេមនេះ ហួសប្រមាណ។
គោលការណ៍ថ្មីនេះ ត្រូវបានចេញផ្សាយកាលពីចុងខែសីហា អំពាវនាវឱ្យក្រុមហ៊ុនហ្គេមកំណត់ក្មេងដែលមានអាយុក្រោម ១៨ ឆ្នាំ ឱ្យប្រើប្រាស់សេវាកម្មរបស់ខ្លួនតែពីម៉ោង ៨ យប់ ដល់ ៩ យប់ រាល់ថ្ងៃចុងសប្តាហ៍ និងថ្ងៃឈប់សម្រាកសាធារណៈប៉ុណ្ណោះ។ ប្រព័ន្ធផ្សព្វផ្សាយរដ្ឋចិនបានរាយការណ៍ថា ចលនានេះធ្វើឡើងដើម្បីការពារសុខភាពផ្លូវចិត្ត និងកាយរបស់អនីតិជន។
គួរបញ្ជាក់ផងដែរថា ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលចិនបានអនុវត្តប្រព័ន្ធចុះបញ្ជីដែលតម្រូវឱ្យ ក្រុមហ៊ុនហ្គេមកំណត់ឈ្មោះអ្នកប្រើប្រាស់ដោយតម្រូវឱ្យអ្នកប្រើប្រាស់សេវាកម្មរបស់ពួកគេចុះឈ្មោះ ដោយប្រើប្រាស់ឈ្មោះពិត។
អ្នកលេងហ្គេម វ័យ ១៦ ឆ្នាំម្នាក់នៅខេត្តហឺណានភាគកណ្តាលប្រទេសចិន បាននិយាយថា រូបគេបានប្រើគណនីរបស់បងប្រុសរួចហើយ ដើម្បីលេងហ្គេមនេះ ដូច្នេះគេនឹងប្រើគណនីរបស់បងប្រុសគេនៅពេលគោលការណ៍ថ្មីនោះ ចាប់ផ្តើមចូលជាធរមាន។ គេបាននិយាយថា៖ «បទបញ្ជាថ្មីនេះ ត្រូវបានដាក់ឡើង ដោយសារតែអាណាព្យាបាលស្អប់ការលេងហ្គេម»។
អ្នកប្រើបណ្តាញសង្គមនៅប្រទេសចិន បានសរសេរលើបណ្តាញសង្គមថា កីឡាអេឡិចត្រូនិកនឹងមិនមានការរីកចម្រើនឡើយនៅប្រទេសចិន ដោយក្មេងៗនៅប្រទេសផ្សេងទៀត នឹងឈ្នះលើការប្រកួតជើងឯកពិភពលោកនៅអាយុ ១៧ ឆ្នាំ ខណៈដែលក្មេងនៅប្រទេសចិន ទើបចាប់ផ្តើមលេងហ្គេមនៅអាយុ ១៨ ឆ្នាំ។
សេចក្តីប្រកាសដែលជាការផ្លាស់ប្តូរបទប្បញ្ញត្តិចុងក្រោយបង្អស់ប្រឆាំងនឹងវិស័យបច្ចេកវិទ្យាបានធ្វើឱ្យតម្លៃទីផ្សាររបស់ក្រុមហ៊ុន Tencent និង Net Ease មានការធ្លាក់ចុះ។
ក្រុមហ៊ុនទាំង ២ ទទូចថា ពួកគេនឹងមិនមានការប៉ះពាល់ធ្ងន់ធ្ងរទេ ចំពោះការរឹតបន្តឹងនេះ។ តាមការស្រង់សម្តីរបស់សារព័ត៌មាន Financial Times លោក William Ding ស្ថាបនិកក្រុមហ៊ុន Netease បាននិយាយកាលពីដើមសប្តាហ៍នេះថា៖ «ក្នុងរយៈពេលប៉ុន្មានឆ្នាំចុងក្រោយនេះ យើងបានកត់សម្គាល់ថា មានហ្គេមមួយចំនួននៅក្នុងវិស័យនេះ បានជះឥទ្ធិពលអវិជ្ជមានទៅលើកុមារ»។
លោក William បាននិយាយបន្តថា ដូច្នេះលោកគិតថា បទប្បញ្ញត្តិថ្មីនេះ នឹងធ្វើឱ្យក្មេងជំទង់អាចកាត់បន្ថយការចំណាយពេលលើការលេងហ្គេមតាមដែលអាចធ្វើទៅបាន។
ក្រុមហ៊ុននៅក្នុងវិស័យបច្ចេកវិទ្យាហ្គេមនេះ បានកត់សម្គាល់ថា ប្រាក់ចំណូលរបស់ពួកគេពីអនីតិជនដែលប្រើប្រាស់សេវាកម្មរបស់ពួកគេមានតិចតួចប៉ុណ្ណោះ ហើយភាគហ៊ុនរបស់ពួកគេបានកើនឡើងមកវិញក្នុងរយៈពេលប៉ុន្មានថ្ងៃចុងក្រោយនេះ៕