កាលពីថ្ងៃអាទិត្យ កងទ័ពអាកាសកោះតៃវ៉ាន់ បានដាក់ពង្រាយយន្តហោះចម្បាំង បន្ទាប់ពីយន្តហោះយោធាចិនដីគោកចំនួន ១៩ គ្រឿង ដែលរួមមានយន្តហោះទម្លាក់គ្រាប់បែក បានហោះចូលតំបន់កំណត់អត្តសញ្ញាណការពារដែនអាកាសរបស់កោះនេះ។
ក្នុងរយៈពេលប៉ុន្មានឆ្នាំចុងក្រោយនេះ កោះតៃវ៉ាន់ បានប្រឈមនឹងបេសកកម្មម្ដងហើយម្ដងទៀតដោយកងទ័ពអាកាសចិន ដែលជាញឹកញាប់ធ្វើឡើងនៅភាគនិរតីនៃតំបន់ការពារអាកាសក្បែរកោះមួយគ្រប់គ្រងដោយ
តៃវ៉ាន់។
ក្រសួងការពារជាតិតៃវ៉ាន់និយាយថាបេសកកម្មចិនដីគោកចុងក្រោយនេះ មានការចូលរួមពីយន្តហោះចម្បាំង J-16 ចំនួន ១០ គ្រឿង យន្តហោះចម្បាំង Su-30 ចំនួន ៤ គ្រឿង ព្រមទាំងយន្តហោះទម្លាក់គ្រាប់បែក H-6 ចំនួន ៤ គ្រឿង ដែលមានសមត្ថភាពទម្លាក់គ្រាប់បែកនុយក្លេអ៊ែរ និងយន្តហោះប្រឆាំងនាវាមុជទឹក ១ គ្រឿង។
ក្រសួងនេះនិយាយថា យន្តហោះចម្បាំងរបស់ខ្លួនត្រូវបានបញ្ជូនទៅព្រលានយន្តហោះចិនដីគោក ហើយប្រព័ន្ធមីស៊ីលការពារដែនអាកាសត្រូវបានដាក់ពង្រាយ ដើម្បីតាមដានសកម្មភាពយន្តហោះទាំងនេះ។
តំបន់ដែលយន្តហោះចិនធ្វើបេសកកម្មគឺមានចម្ងាយជិតឆ្នេរសមុទ្រចិនដីគោក ជាងឆ្នេរសមុទ្រកោះតៃវ៉ាន់។
ប្រទេសចិន តែងតែធ្វើបេសកកម្មបែបនេះ ដើម្បីបង្ហាញការមិនសប្បាយចិត្តរបស់ខ្លួនចំពោះអ្វីធំដុំដែលកោះតៃវ៉ាន់បានធ្វើ ឬការបង្ហាញការគាំទ្រចំពោះកោះនេះ ជាពិសេសដោយសហរដ្ឋអាមេរិក ដែលជាអ្នកផ្គត់ផ្គង់អាវុធធំជាងគេសម្រាប់កោះនេះ។ គេមិនដឹងច្បាស់ថាតើអ្វីបានជំរុញចិនឱ្យធ្វើបេសកកម្មលើកនេះទេ?
ប្រទេសចិន បានមើលឃើញកោះតៃវ៉ាន់ជាខេត្តមួយរបស់ខ្លួន ដែលនៅពេលអនាគតត្រូវតែរួបរួមគ្នាវិញ ដោយប្រើគ្រប់មធ្យោបាយ រួមទាំងការប្រើប្រាស់កម្លាំងបើសិនចាំបាច់៕