កាលពីថ្ងៃអាទិត្យ ទី ៥ កញ្ញា ក្រសួងសុខាភិបាលប្រទេសវៀតណាម បានប្រកាសថា ចំណុចកណ្ដាលនៃការឆ្លងជំងឺកូវីដ ១៩ ទីក្រុងហូជីមិញ និងរដ្ឋធានីហាណូយ ត្រូវតែចាក់វ៉ាក់សាំងដល់ប្រជាជនពេញវ័យរបស់ពួកគេទាំងអស់ ឱ្យបានយ៉ាងហោចណាស់ ១ ដូស នៅត្រឹមថ្ងៃទី ១៥ ខែកញ្ញា។
ប្រទេសវៀតណាម មានអត្រាចាក់វ៉ាក់សាំងកូវីដ ១៩ ទាបជាងគេនៅក្នុងតំបន់ ដោយមានត្រឹមតែ ៣,៣ ភាគរយនៃប្រជាជនសរុប ៩៨ លាននាក់ បានទទួលវ៉ាក់សាំងគ្រប់ ២ ដូស ខណៈពេលដែលត្រឹមតែ ១៥,៤ ភាគរយបានទទួលវ៉ាក់សាំង ១ ដូស។
ប្រទេសនេះកំពុងប្រយុទ្ធនឹងរលកឆ្លងជំងឺកូវីដ ១៩ ដ៏អាក្រក់មួយ ដោយករណីឆ្លងជាង ៥២០ ០០០ ករណី និងការស្លាប់ជាង ១៣ ០០០ នាក់ ដែលភាគច្រើនបានកើតឡើងនៅក្នុងរយៈពេលប៉ុន្មានខែចុងក្រោយនេះ។ ជាងពាក់កណ្ដាលនៃករណីឆ្លងសរុប និងជាង ៨០ ភាគរយនៃការស្លាប់សរុបបានកើតឡើងនៅទីក្រុងហូជីមិញ ដែលជាមជ្ឈមណ្ឌលពាណិជ្ជកម្មប្រទេសនេះ។
ទិន្នន័យរបស់រដ្ឋាភិបាលបានបង្ហាញថា ៨៨ ភាគរយនៃប្រជាជនពេញវ័យរបស់ទីក្រុងហូជីមិញចំនួន ៦,៩៧ លាននាក់ បានទទួលវ៉ាក់សាំងយ៉ាងហោចណាស់ចំនួន ១ ដូស។ អត្រានេះគឺ ស្មើនឹងចំនួន ៥៣ ភាគរយសម្រាប់ប្រជាជនពេញវ័យនៅទីក្រុងហាណូយចំនួន ៥,៧៥ លាននាក់។
មកដល់ពេលនេះវៀតណាមបានទទួលវ៉ាក់សាំងជំងឺកូវីដ ១៩ ចំនួន ៣៣ លានដូស ហើយរដ្ឋាភិបាលរំពឹងថានឹងទទួលបាន ១៧ លានដូសបន្ថែមទៀតនៅចុងខែនេះ៕