ការ​​សិក្សា​​ថ្មីៗ​ជាច្រើន​បាន​បង្ហាញ​ថា​ វ៉ាក់សាំង​ Moderna មាន​ប្រសិទ្ធភាព​ការពារ​មេរោគ​កូវីដ​ ១៩ បាន​យូរ​ជាង​​វ៉ាក់សាំង​ Pfizer ខណៈ​ពេល​រដ្ឋាភិបាល និង​អ្នក​វិទ្យាសាស្ត្រ​កំពុង​ជជែក​វែក​ញែក​ថា​ តើ​ត្រូវ​ប្រើ​វ៉ាក់សាំង​មួយ​ណា​ធ្វើ​ជា​ដូស​ជំរុញ​ និង​ត្រូវ​ចាក់​ពេល​ណា​។ នេះ​បើ​តាម​ការ​ឱ្យ​ដឹង​ពី​សារព័ត៌មាន The Financial Times។

លោក Paul Burton ប្រធាន​ផ្នែក​វេជ្ជសាស្រ្ត​របស់​ក្រុមហ៊ុន​វ៉ាក់សាំង​ Moderna បាន​និយាយ​ថា៖ «ការ​សិក្សា​ដែល​មាន​​ទំនុក​ចិត្ត​បំផុត​ក្នុង​រយៈពេល​ប៉ុន្មាន​សប្តាហ៍​ចុង​ក្រោយ​នេះ ​បាន​​បង្ហាញ​​ថា​ វ៉ាក់សាំង​ Moderna មាន​ប្រសិទ្ធភាព​​យូរ​ហើយ​អាច​ប្រឆាំង​នឹង​​វ៉ារ្យ៉ង់​ដែលតា ​(Delta) ហើយ​ថែម​ទាំង​អាច​ជួយ​មនុស្ស​ដែល​មាន​ប្រព័ន្ធភាព​ស៊ាំ​ចុះ​ខ្សោយ​​ទៀត​ផង​»​។​

ការ​ស្រាវជ្រាវ​បោះ​ពុម្ព​ផ្សាយ​នៅ​សប្តាហ៍​នេះ នៅ​ក្នុង​ទិនានុប្បវត្តិ​សមាគម​វេជ្ជសាស្ត្រ​អាមេរិក​បាន​រក​ឃើញ​​ថា បុគ្គលិក​ថែទាំ​សុខភាព​បែលហ្ស៊ិក ដែល​ទទួល​បាន​វ៉ាក់សាំង​ Moderna មាន​ចំនួន​អង្គ​បដិបក្ខប្រាណ​​ច្រើន​ជាង​អ្នក​ទទួល​បាន​វ៉ាក់សាំង​ Pfizer ដល់​ទៅ​ ២ ដង​ក្នុង​រយៈពេល ២ ​ខែ​ បន្ទាប់​ពី​ការ​ចាក់​ដូស​ទី​២។

លោកស្រី Deborah Steen sels អ្នក​និពន្ធ​ម្នាក់​​នៃ​ការ​ស្រាវជ្រាវ​នេះ បាន​និយាយថា កម្រិត​អង្គបដិបក្ខប្រាណ​ខ្ពស់ បន្ទាប់​ពី​ការ​​ចាក់​​វ៉ាក់សាំង​គួរ​តែ​នាំ​ឱ្យ​មាន​ការ​ការពារ​រយៈពេល​វែង និង​កាន់​តែ​ធន់​ខ្លាំង​ក្នុង​ការ​ប្រយុទ្ធ​ប្រឆាំង​នឹង​វ៉ារ្យ៉ង់​ថ្មី​របស់​កូវីដ​​។

ខណៈ​ដែល​អ្នក​វិទ្យាសាស្ត្រ​ មិន​ទាន់​អាច​វាស់​វែង​ចំនួន​​​អង្គ​បដិបក្ខ​ប្រាណ​ប៉ុនណា ដែល​អាច​គ្រប់គ្រាន់​ប្រឆាំង​នឹង​វ៉ារ៉្យង់​ថ្មី ប៉ុន្តែ​ភ័ស្ដុតាង​ដែល​មាន​ស្រាប់​អាច​គ្រប់គ្រាន់​​ទ្រទ្រង់​ទ្រឹស្តី​ដែល​មាន​ស្រាប់​ហើយ​។

លោកស្រី​បាន​បន្ថែម​ថា៖ «វ៉ាក់សាំង​ទាំង​អស់​សុទ្ធតែ​មាន​ប្រសិទ្ធភាព​នៃ​ការ​ការពារ​មនុស្ស​ពី​ជំងឺ​ធ្ងន់ធ្ងរ និង​​មរណភាព​​ខ្ពស់​ហើយ​នោះ គឺ​ជា​គោលដៅ​សំខាន់​នៃ​វ៉ាក់សាំង​។ ប៉ុន្តែ​សម្មតិកម្ម​របស់​យើង​ គឺ​ថា ​រយៈពេល​ការ​ការពារ​ប្រឆាំង​​នឹង​ករណី​ស្រាល​ឱ្យ​មាន​រយៈពេល​យូរ​នោះ​ យើង​ត្រូវ​ការ​អង់ទីគ័រ​ដែល​ខ្ពស់​ជាង​នេះ បន្ទាប់​ពី​ការ​ចាក់​វ៉ាក់សាំង​»។

ការ​សិក្សា​មួយ​ផ្សេង​ទៀត​នៅ​សប្តាហ៍​នេះ ចេញ​ពី​សាកលវិទ្យាល័យ​វឺ​ជីនៀ បាន​​រក​ឃើញ​ថា អ្នក​ទទួល​វ៉ាក់សាំង​ Moderna មាន​អង្គ​​បដិបក្ខប្រាណ​ច្រើន​​ជាង​វ៉ាក់សាំង​ Pfizer ដោយ​មាន​ភាព​ខុស​គ្នា​ទាំង​នេះ ​គេ​សង្កេត​មើល​ឃើញ​នៅ​លើ​​មនុស្ស​ចាស់។​ ការ​រក​ឃើញ​នេះ​បាន​ឆ្លុះ​បញ្ចាំង​ពី​ឯកសារ​សេចក្តី​ព្រាង​ កាល​ពី​ខែ​មុន ដោយ​ក្រុម​អ្នក​ស្រាវជ្រាវ​នៅ​​សាកលវិទ្យាល័យ​តូរ៉ុនតូ​ស្ដីពី​ការ​វាយ​​តម្លៃ​ ពី​ការ​ឆ្លើយ​តប​នៃ​ប្រព័ន្ធ​ភាព​ស៊ាំ​ក្នុង​ចំណោម​​អ្នក​រស់នៅ​មណ្ឌល​ថែទាំ​​រយៈពេល​វែង​​។

អ្នក​វិទ្យាសាស្ត្រ​ខ្លះ​​ណែនាំ​​ថា វ៉ាក់សាំង​ Moderna​ អាច​ប្រសិទ្ធភាព​យូរ​នេះ​ គឺ​ដោយសារ​​តែ​កម្រិត mRNA របស់​វា​ដែល​ជា​កូដ​ហ៊ែ្សន​ជួយ​ដល់​ប្រព័ន្ធភាព​ស៊ាំ​ឱ្យ​ស្គាល់​ប្រូតេអ៊ីន​កូរ៉ូណា​វីរុស​ ដែល​កំពុង​កើន​ឡើង ដែល​មាន​ប្រសិទ្ធភាព​ខ្ពស់​ជាង​វ៉ាក់សាំង​ Pfizer ៣ ដង។ កត្តា​មួយ​​ទៀត​អាច​ជា​ពេលវេលា​​រវាង​ដូស​ដែល​​ត្រូវ​បាន​​ណែនាំ​ ពោល​គឺ​វ៉ាក់សាំង​ Moderna ត្រូវ​ការ​រយៈពេល ៤ ​សប្តាហ៍ ​រវាង​ដូស​នីមួយៗ​ ប៉ុន្តែ​វ៉ាក់សាំង​ Pfizer ត្រូវ​ការ​តែ​ ៣ សប្ដាហ៍​ប៉ុណ្ណោះ​។

លោក Eric Topol នាយកវិទ្យាស្ថាន​​បកប្រែ​ភាសា Scripps ​បាន​និយាយ​ថា វ៉ាក់សាំង​កូវីដ​ទាំង​អស់​ហាក់​ដូច​​ជា​មាន​ប្រសិទ្ធភាព​ជាង​នៅ​ក្នុង​ប្រទេស​ដែល​មាន​គម្លាត​ចាក់​វ៉ាក់សាំង​ឆ្ងាយៗ ដូចជា​ចក្រភព​អង់គ្លេស និង​កាណាដា​ជាង​នៅ​​សហរដ្ឋអាមេរិក និងអ៊ីស្រាអែល។

លោក Tim Spector សហស្ថាបនិក Zoe និង​សាស្ត្រាចារ្យ​នៅ King''s College London បាន​ព្រមាន​ថា បើ​ទោះ​ជា​​​ការ​សិក្សា​បឋម​មើល​ឃើញ​ពី​ប្រសិទ្ធភាព​​នៃ​វ៉ាក់សាំង​ទាំង​ ២ យ៉ាង​ណា​​ក្ដី យើង​​មិន​​ទាន់​មាន​ភ័ស្តុតាង​ណា​ផ្សេង​ដែល​បង្ហាញ​ពី​ភាព​ខុស​គ្នា​រវាង​វ៉ាក់សាំង​នៅ​ឡើយ​​​ទេ ដោយសារ​ទិន្នន័យ​សំខាន់​នឹង​​មក​ដល់​ក្នុង​រយៈពេល​​ ៦ ​​ខែ ​ខាង​មុខ​នេះ។

លោក Paul Hunter​ អ្នក​ជំនាញ​ខាង​ជំងឺ​ឆ្លង​នៅ​សាកលវិទ្យាល័យ East Anglia បាន​ព្រមាន​អំពី​ការ​ពឹង​ផ្អែក​ខ្លាំង​លើ​ការ​សិក្សា​ពេក​ ដោយ​លោក​បាន​លើក​ឡើង​ថា ការ​រក​ឃើញ​ដែល​មិន​បាន​រំពឹង​ទុក​ទាំង​នេះ តែងតែ​កើត​ឡើង​នៅ​ក្នុង​ពេល​មាន​ជំងឺ​​​រាតត្បាត​​។

លោក​បាន​និយាយ​ថា៖ «ប្រាកដ​ច្បាស់​ ឬ​អត់​ថា ​ការ​ប្រៀប​​ធៀប​នេះ​ គឺ​ជា​ការ​ប្រៀប​​ផ្លែ​​ប៉ោម​នឹង​​ផ្លែប៉ោម​ មិន​មែន​ប្រៀប​​ធៀប​ក្រូច​នឹង​ផ្លែ​ប៉ោម​? អ្វី​ដែល​យើង​បាន​សិក្សា​រក​ឃើញ​មក​នេះ គ្មាន​ឱ្យ​ធ្វើ​ឱ្យ​​ប៉ះពាល់​ដល់​គោលការណ៍​ជំរុញ​ការ​ចាក់​​វ៉ាក់សាំង​ mRNA ទាំង ២ នេះ​ទេ»។

យ៉ាងណាមិញ​វិនិយោគិន​នៅ​មិន​ទាន់​​កំណត់​តម្លៃ​វ៉ាក់សាំង​ទាំង​ ២​ ឱ្យ​ខុស​គ្នា​ក្នុង​ទីផ្សារ​នៅឡើយ​ទេ​ ដោយសារ​ទាំង​រដ្ឋាភិបាល​ទាំង​ក្រុមហ៊ុន​ផលិត​សុទ្ធ​តែ​​កំពុង​ជួប​បញ្ហា​កង្វះ​វ៉ាក់សាំង​។ ទន្ទឹមនឹង​​​នេះ​ដែរ ផែនការ​របស់​ក្រុមហ៊ុន​វ៉ាក់សាំង​ Moderna និង Pfizer សម្រាប់​ការ​ផលិត​ដូស​ជំរុញ​នៅ​តែ​បន្ត​ទៅ​មុខ​ជានិច្ច ដោយ​ក្រុមហ៊ុន​ទាំង​ ២ ​កំពុង​បង្កើត​វ៉ាក់សាំង ដែល​ត្រូវ​នឹង​វ៉ារ្យ៉ង់​ដែលតា​ ក្នុង​ករណី​ដែល​ពួក​គេ​ត្រូវ​ការ​ចាំបាច់​ហើយ​បញ្ជូន​ទិន្នន័យ​កម្រិត​ទី៣ ទៅ​ឱ្យ​រដ្ឋបាល​ចំណី​អាហារ និង​​ឱសថ​អាមេរិក​ (FDA) ក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ៕