.jpg)
យុទ្ធជនតាលីបង់ជិះរថយន្តត្បាតតាមដងផ្លូវក្នុងទីក្រុងកាប៊ុល។ AFP
បន្ទាប់ពីក្រុមតាលីបង់ បានវាយដណ្តើមការគ្រប់គ្រងនៅប្រទេសអាហ្វហ្គានីស្ថានបានសម្រេច ប្រជាជនអាហ្វហ្គានីស្ថាន មានការព្រួយបារម្ភពីសុវត្ថិភាព និងសេរីភាពរបស់ពួកគេ។ ប្រជាជនអាហ្វហ្គានីស្ថាន ជាពិសេសក្មេងស្រី អាចនឹងវិលត្រឡប់ទៅទំនៀមទម្លាប់ដែលពួកគេត្រូវស្លៀកពាក់ជាមនុស្សប្រុស ដើម្បីទទួលបានសេរីភាព។យោងតាមរបាយការណ៍ពីការស្រាវជ្រាវសភាក្រុមតាលីបង់ហាមស្ត្រីមិនឱ្យសិក្សាបន្ទាប់ពីពួកគេអាយុ៨ឆ្នាំ ហើយហាមមិនឱ្យបង្ហាញខ្លួនជាសាធារណៈ បើសិនជាមិនមានសាច់ញាតិជាមនុស្សប្រុសនៅក្បែរ។
ទោះយ៉ាងណា របាយការណ៍អង្គការ UNICEF កាលពីឆ្នាំ២០១៨លើកឡើងថា ក្មេងស្រីអាហ្វ- ហ្គានីស្ថានម្នាក់ក្នុងចំណោម៣នាក់បានរៀបការមុនអាយុ ១៨ឆ្នាំ។ ក្មេងស្រីតែ១៩ភាគរយប៉ុណ្ណោះដែលអាយុក្រោម ១៥ ឆ្នាំចេះអក្សរ ហើយ ៦០ ភាគរយនៃកុមារចំនួន ៣,៧ លាននាក់ មិនបានទទួលការអប់រំពីសាលារៀនឡើយ។
ចំពោះគ្រួសារខ្លះដែលមិនមានមនុស្សប្រុសជាសមាជិកក្នុងគ្រួសារ ក្មេងស្រីខ្លះត្រូវរស់នៅជាមនុស្សប្រុសមុនពេលពួកគេពេញវ័យ។ ក្មេងស្រីដែលតែងខ្លួនជាប្រុសនោះត្រូវបានគេហៅថា «Bacha posh» ដែលនៅក្នុងភាសាដារីមានន័យថា ក្មេងស្រីស្លៀកពាក់ជាក្មេងប្រុសនេះ គឺជាប្រពៃណីបុរាណមួយដែលគ្រួសារកំណត់អោយក្មេងស្រីរស់នៅជាក្មេងប្រុសដើម្បីធ្វើការរកប្រាក់ចំណូល។
ទំនៀមទម្លាប់នេះ អាចអនុញ្ញាតអោយក្មេងស្រីនោះ មានសេរីភាពដូចក្មេងប្រុសដែរដូចជាការទទួលបានការអប់រំ អត្តពលកម្មនិងសិទ្ធិនៅខាងក្រៅតែម្នាក់ឯង ឬអាចបម្រើការដើម្បីរកប្រាក់ចំណូលបាន។កាលពីឆ្នាំ២០១៨ ទីភ្នាក់ងារសារព័ត៌មាន AFP បានរាយការណ៍ពីក្មេងស្រីម្នាក់ឈ្មោះ Sitara Wafadar ដែលត្រូវរស់នៅដូចក្មេងប្រុសហើយមើលថែរក្សាគ្រួសាររបស់នាងនៅអាហ្វហ្គានីស្ថាន។
ក្មេងស្រី Sitara អាយុ ១៨ ឆ្នាំ ធ្វើការជាកម្មករជាមួយឪពុកវ័យចំណាស់របស់នាងនៅឡឥដ្ឋរយៈពេល ៦ ថ្ងៃក្នុង១សប្តាហ៍ដើម្បីរកប្រាក់សងម្ចាស់បំណុលរបស់គ្រួសារនាង ហើយនិងចិញ្ចឹមគ្រួសារ។នាងបានប្រាប់ AFP ថា៖«ខ្ញុំមិនដែលគិតថាខ្ញុំជាក្មេងស្រីទេ។ ពេលខ្លះខ្ញុំចូលរួមពិធីបុណ្យសពក្នុងនាមជាកូនប្រុសច្បងរបស់គ្រួសារខ្ញុំ» ។
ខណៈពេលដែលមនុស្សស្រីភាគច្រើនឈប់ស្លៀកពាក់ជាបុរស បន្ទាប់ពីពួកគេពេញវ័យ ក្មេងស្រី Sitara រូបនោះបាននិយាយថា នាងនៅតែពាក់អាវបុរសដើម្បីការពារខ្លួនឯង។ នាងបាននិយាយថា៖«នៅពេលខ្ញុំទៅធ្វើការមនុស្សភាគច្រើនមិនដឹងថា ខ្ញុំជាមនុស្សស្រីទេ ប្រសិនបើពួកគេដឹងថា ខ្ញុំជាក្មេងស្រីវ័យ ១៨ ឆ្នាំធ្វើការពីព្រឹកដល់ល្ងាចនៅរោងចក្រផលិតឥដ្ឋនោះ ខ្ញុំអាចនឹងជួបបញ្ហាជាច្រើនហើយខ្ញុំថែមទាំងអាចត្រូវគេចាប់ជំរិតទៀតផង»។
នៅប្រទេសអាហ្វហ្គានីស្ថានគេឱ្យតម្លៃទៅលើមនុស្សប្រុសជាងមនុស្សស្រីដោយសារកូនប្រុសអាចទទួលមរតកទ្រព្យសម្បត្តិរបស់ឪពុក និងអាចបន្តនាមត្រកូលបាន។ការក្លាយជាBacha posh គឺជាការលះបង់មួយរបស់ក្មេងស្រីដើម្បីទទួលបានសេរីភាពដូចជាការទទួលបានការអប់រំ និងការជ្រើសរើសគូរស្រកររបស់ខ្លួនជាដើម។ ទោះយ៉ាងណាក៏ដោយ នៅពេលដែលពួកគេទទួលបានសេរីភាពក៏ពួកគេនៅតែមានការភ័យខ្លាចដែលអត្តសញ្ញាណរបស់ពួកគេត្រូវបានលាតត្រដាង៕
