អស់រយៈពេលជិត ១៨ ខែចាប់តាំងពីជំងឺកូវីដ ១៩ ចាប់ផ្ដើមរាតត្បាតទូទាំងពិភពលោកមកដោយបង្ខំក្រុមហ៊ុននានាតម្រូវឱ្យបុគ្គលិករបស់ខ្លួនធ្វើការពីផ្ទះ។ ខណៈដែលការឆ្លងរាលដាលចេះតែបន្ត កាលបរិច្ឆេទគ្រោងបើកការងារដោយផ្ទាល់ ក៏ត្រូវបានផ្លាស់ប្តូរម្តងហើយម្តងទៀត ដោយដំបូងឡើយកំណត់នៅខែមករា រួចក៏បន្តមកដល់ខែកក្កដា ខណៈដែលមនុស្សរាប់សិបលាននាក់តម្រង់ជួរចាក់វ៉ាក់សាំងនៅទូទាំងអាមេរិក។
តែទោះជាយ៉ាងណាក្ដី ដោយសារការឆ្លងដ៏រហ័សរបស់វ៉ារ្យ៉ង់ដែលតា (Delta) និងប្រសិទ្ធភាពនៃវ៉ាក់សាំងដូសទី២ ខែកញ្ញា ក៏ត្រឡប់ទៅជាខែកក្កដា សាជាថ្មីសម្រាប់ក្រុមហ៊ុនជាច្រើននៅសហរដ្ឋអាមេរិក។ នេះមានន័យថា ការចាប់ផ្ដើមធ្វើការងារនៅការិយាល័យដោយផ្ទាល់ត្រូវលើកម្ដងទៀត។ ជាមួយគ្នានោះក្រុមហ៊ុននានាក៏ត្រូវមានវិធានការថ្មីដើម្បីពិចារណារួមទាំងការដាក់បញ្ជាកាតព្វកិច្ចឱ្យពាក់ម៉ាស់ និងការជំរុញឱ្យបុគ្គលិកដែលទទួលបានវ៉ាក់សាំង ២ ដូស ឱ្យចាក់ដូសជំរុញទី៣ ក្នុងអត្រាផ្សេងៗគ្នា។
យោងតាមការចុះផ្សាយរបស់កាសែតញូវយ៉កថែមស៍ក្រុមហ៊ុនផ្សេងៗដូចជា Uber, Google, Amazon, Apple និង Starbucks ជាដើមនិយាយថា ខ្លួននឹងពន្យារពេលកាលបរិច្ឆេទធ្វើការទៅឆ្នាំក្រោយ។ នាយកប្រតិបត្តិក្រុមហ៊ុនទាំងនេះ និយាយថា មានមូលហេតុដែលទាមទារឱ្យខ្លួនពន្យារពេល ពោលគឺដើម្បីបន្ថែមការការពារបុគ្គលិកកុំឱ្យមានគ្រោះថ្នាក់ និងម្យ៉ាង ពេលវេលាស័ក្តិសម ដើម្បីចាប់ផ្តើមពេលនេះធ្វើឱ្យបុគ្គលិកពិបាកក្នុងការរៀបចំផែនការ ដូច្នេះគម្រោងបើកឆ្នាំក្រោយនឹងមិនចាំបាច់សម្រួលម្ដងហើយម្ដងទៀតទេ។
អ្នកស្រី Laura Faith នាយិកាជាន់ខ្ពស់ផ្នែកបទពិសោធប្រជាជន និងប្រតិបត្តិការនៅក្រុមហ៊ុនបច្ចេកវិទ្យា Uber និយាយថា៖ «យើងចង់ធ្វើឱ្យប្រាកដថា យើងកំពុងផ្តល់ឱ្យបុគ្គលិកនូវការសម្រេចចិត្តមួយដែលអាចឱ្យវេលាដល់ពួកគេគ្រប់គ្រាន់ ដើម្បីរៀបចំផែនការជីវិត»។
ក្រុមហ៊ុនសឺម៉ីកុងឌុចទ័រ Intel បានកំណត់ថ្ងៃទី ១ ខែកញ្ញា សម្រាប់បុគ្គលិករបស់ខ្លួនឱ្យចូលធ្វើការវិញនៅតំបន់មួយចំនួន។ ភាគច្រើននៃបុគ្គលិកជាង ១ សែននាក់របស់ក្រុមហ៊ុននេះ កំពុងធ្វើការក្នុងរោងចក្រផលិតសឺម៉ីកុងឌុចទ័រនៅជុំវិញពិភពលោក ប៉ុន្តែសម្រាប់បុគ្គលិកការិយាល័យ ប្រហែលជារង់ចាំមើលពីអត្រាវ៉ាក់សាំង និងចំនួននៃការឆ្លងរបស់វីរុសតាមតំបន់ដែលបុគ្គលិកធ្វើការ។
លោក Todd Brady នាយកផ្នែកកិច្ចការសាធារណៈពិភពលោករបស់ Intel ប្រាប់កាសែតញូវយ៉កថែមស៍ថា ក្រុមហ៊ុនពឹងផ្អែកលើទិន្នន័យនៃករណីឆ្លងកូវីដ ដើម្បីសម្រេចចិត្តថា តើពេលណាដែលត្រូវហៅបុគ្គលិកឱ្យត្រឡប់ចូលការិយាល័យវិញ? ប៉ុន្តែមិនមែនជាការងាយស្រួលនោះទេ។
ការស្ទង់មតិនាពេលថ្មីៗលើនិយោជក ១ ៦០០ នាក់ របស់ក្រុមហ៊ុនការងារ និងច្បាប់ Littler បង្ហាញថា ៤០ ភាគរយនៃអ្នកឆ្លើយសំណួរនិយាយថា ពួកគេបានពន្យារពេលផែនការឱ្យបុគ្គលិកធ្វើការដោយផ្ទាល់។ ក្រុមហ៊ុនដែលនាំមុខគេក្នុងការពន្យារពេល គឺក្រុមហ៊ុនបច្ចេកវិទ្យាដែលមានបុគ្គលិកសំខាន់អាចធ្វើការងារពីផ្ទះបាន។
អ្នកប្រឹក្សាយោបល់និយាយថា ហេតុផលមួយដែលក្រុមហ៊ុនខ្លះពន្យារកាលបរិច្ឆេទត្រឡប់ទៅការិយាល័យវិញ គឺត្រូវគិតគូរពីការពិចារណាថ្មីនៅពេលដែលការចាក់វ៉ាក់សាំងក្លាយជារឿងធម្មតា។ យោងតាមការស្ទង់មតិថ្មីមួយរបស់ក្រុមហ៊ុន Willis Towers Watson ទៅលើក្រុមហ៊ុនជិត ១ ០០០ ដែលមានបុគ្គលិកសរុបជិត ១០ លាននាក់ ៥២ ភាគរយ នៃអ្នកឆ្លើយតបនិយាយថា ពួកគេមានគម្រោងដាក់យុទ្ធសាស្រ្តវ៉ាក់សាំងនៅចុងឆ្នាំនេះ ធៀបទៅនឹង ២១ ភាគរយ ដែលថា ពួកគេមានតម្រូវការវ៉ាក់សាំងរួចហើយ។
ការពន្យារពេលផ្តល់ឱ្យកម្មករនិយោជិតដែលកំពុងឆ្លើយតបទៅនឹងតម្រូវការថ្មីមានពេលវេលាគ្រប់គ្រាន់ ដើម្បីទទួលវ៉ាក់សាំងពេញលេញ។ លើសពីនេះវាក៏ផ្តល់ឱ្យក្រុមហ៊ុននូវពេលវេលាបន្ថែមទៀត ដើម្បីរៀបចំភ័ស្តុភារដែលអមជាមួយយុទ្ធសាស្រ្តវ៉ាក់សាំងរបស់ក្រុមហ៊ុនដូចជាដំណើរការតាមដានស្ថានភាពរបស់បុគ្គលិកថា នរណាខ្លះបានទទួលដូសជំរុញរួចហើយ។
សម្រាប់អង្គភាពខ្លះការចរចាជាមួយសហជីពក៏ជាកត្តាមួយដែរ។ អ្នកនាំពាក្យរបស់វិទ្យុជាតិសហរដ្ឋអាមេរិក NPR ដែលមិនបានកំណត់កាលបរិច្ឆេទសម្រាប់ការវិលត្រឡប់មកការិយាល័យវិញនិយាយថា បណ្តាញវិទ្យុសាធារណៈកំពុងធ្វើការជាមួយអ្នកពាក់ព័ន្ធសំខាន់ៗរួមទាំងសហជីព ដើម្បីវាយតម្លៃពីវិធីសាស្រ្តល្អបំផុតក្នុងការរក្សាបុគ្គលិកឱ្យមានសុវត្ថិភាព និងដើម្បីរក្សាប្រតិបត្តិការរបស់ខ្លួន។
លោកស្រី Kate Bullinger នាយកប្រតិបត្តិនៃក្រុមហ៊ុនប្រឹក្សាយោបល់ United Minds និយាយថា វាក៏មានហានិភ័យផងដែរ បើទុកបុគ្គលិកឱ្យនៅផ្ទះយូរពេក ជាពិសេសទាក់ទងនឹងសុខភាពផ្លូវចិត្តរបស់កម្មករ។ ជាឧទាហរណ៍ ការស្រាវជ្រាវខ្លះភ្ជាប់ទំនាក់ទំនងរវាងការងារពីចម្ងាយក្នុងអំឡុងពេលមានជំងឺរាតត្បាតទៅនឹងការកើនឡើងនៃភាពឯកោក្នុងសង្គម និងការងារហួសកម្លាំង៕