.jpg)
លោកប្រធានាធិបតី អាល់ហ្វា ខនដេ។ AFP
កាលពីថ្ងៃចន្ទ ប្រទេសរុស្ស៊ី បានទាមទារយោធាហ្គីណេឱ្យដោះលែងលោកប្រធានាធិបតី អាល់ហ្វា ខនដេ (Alpha Conde ) ខណៈពេលដែលពួកគេចូលរួមជាមួយសមាគមអន្តរជាតិក្នុងការថ្កោលទោសរដ្ឋ ប្រហារកាលពីថ្ងៃអាទិត្យ។
«ទីក្រុងម៉ូស្គូជំទាស់នឹងការប៉ុនប៉ងណាមួយក្នុងការផ្លាស់ប្ដូរមេដឹកនាំដែលមិនស្របតាមរដ្ឋធម្មនុញ្ញ» ក្រសួងការបរទេសរុស្ស៊ី បាននិយាយបែបនេះនៅក្នុងសេចក្ដីថ្លែងការណ៍មួយ ហើយបន្តទៀតថា៖ «យើងទាមទារឱ្យមានការដោះលែងលោកខនដេនិងការធានាអភ័យឯកសិទ្ធិរបស់គាត់។ យើងចាត់ទុកថាវាចាំបាច់ ដើម្បីធ្វើឱ្យស្ថានការណ៍នៅហ្គីណេវិលទៅរកបទដ្ឋានរដ្ឋធម្មនុញ្ញវិញឱ្យបានឆាប់តាមដែលអាចធ្វើទៅបាន»។
រដ្ឋប្រហារកាលពីថ្ងៃអាទិត្យ ដែលលោកខនដេនិងអ្នកនយោបាយជាន់ខ្ពស់ ផ្សេងទៀតត្រូវបានឃុំខ្លួន ឬហាមឃាត់មិនឱ្យធ្វើដំណើរ គឺជារដ្ឋប្រហារលើកទី៣ ចាប់តាំងពីខែមេសានៅក្នុងតំបន់អាហ្វ្រិកខាងលិច និងកណ្ដាល ដែលបង្កើនការព្រួយបារម្ភអំពីការវិលត្រឡប់ទៅរកការគ្រប់គ្រងដោយរបបយោធានៅក្នុងតំបន់នេះ ដែលបានធ្វើការកែប្រែមកលទ្ធិប្រជាធិបតេយ្យពហុបក្សកាលពីទសវត្សរ៍ឆ្នាំ ១៩៩០។
យ៉ាងណាមិញ ប្រទេសរុស្ស៊ី មានទំនាក់ទំនងដ៏យូរអង្វែងជាមួយប្រទេសហ្គីណេ ដែលកសាង ចាប់តាំងពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ចដំបូងក្នុងសម័យសហភាពសូវៀត ហើយឥឡូវនេះបានមកផ្ដោតលើអាជីវកម្មលោហៈធាតុ។
ប្រទេសហ្គីណេស្ថិតនៅអាហ្វ្រិកខាងលិច មានកំណប់រ៉ែអាលុយមីញ៉ូម (រ៉ែបុកស៊ីត) ធំជាងគេក្នុងពិភពលោក ហើយរដ្ឋប្រហារបានធ្វើឱ្យតម្លៃលោហៈអាលុយមីញ៉ូម កើនដល់កម្រិតខ្ពស់បំផុតក្នុងរយៈពេល ១០ ឆ្នាំចុងក្រោយនេះ បើទោះបីជាមិនមានសញ្ញាថា ការផលិត និងផ្គត់ផ្គង់ត្រូវបានរារាំង។
ក្រុមហ៊ុនផលិតអាលុយមីញ៉ូមរុស្ស៊ី Rusal បាននិយាយកាលពីថ្ងៃចន្ទថាពួកគេមានបំណងបន្តប្រតិបត្តិការអណ្ដូងរ៉ែបុកស៊ីតចំនួន ៣ និងរោងចក្រចម្រាញ់ចំនួនមួយនៅហ្គីណេ ប៉ុន្តែអាចជម្លៀសបុគ្គលិករុស្ស៊ី ទាំងអស់ប្រសិនបើស្ថានការណ៍កាន់តែយ៉ាប់យ៉ឺន។ ក្រុមហ៊ុនផលិតមាសរុស្ស៊ី Nordgold ក៏បាននិយាយថា ពួកគេនឹងបន្តប្រតិបត្តិការអណ្ដូងរ៉ែមាសនៅប្រទេសហ្គីណេផងដែរ៕
