.jpg)
ក្រុមសកម្មជនកាន់កាសែត Apple Daily ក្នុងអំឡុងការតវ៉ានាពេលកន្លងទៅ។AFP
កាលពីថ្ងៃអាទិត្យសប្ដាហ៍មុន ក្រុមហ៊ុនសារព័ត៌មានហុងកុង Next Digital ដែលបោះពុម្ពផ្សាយការរិះគន់រដ្ឋាភិបាលចិនជាច្រើនឆ្នាំមកហើយ បានប្រកាសថា ពួកគេនឹងចាត់វិធានការបិទទ្វារក្រុមហ៊ុន បន្ទាប់ពី ការបង្ក្រាបរបស់អាជ្ញាធរ បានធ្វើឱ្យគ្មានមធ្យោបាយសម្រាប់ដំណើរការបន្តទៅមុខ។
នៅក្នុងសេចក្ដីថ្លែងការណ៍មួយក្រុមប្រឹក្សាភិបាលក្រុមហ៊ុន Next Digital បានណែនាំឱ្យមានការរំសាយក្រុមហ៊ុន និងទូទាត់ទ្រព្យសម្បត្តិ ហើយក៏បាននិយាយថាពួកគេបានលាលែងពីតំណែង។
សេចក្ដីថ្លែងការណ៍នេះសរសេរថា៖ «យើងបានសន្និដ្ឋានថាផលប្រយោជន៍ល្អបំផុតរបស់ម្ចាស់ភាគហ៊ុន ម្ចាស់បំណុល និយោជិត និងអ្នកពាក់ព័ន្ធផ្សេងទៀត នឹងត្រូវបានបំពេញដោយការទូទាត់ទ្រព្យសម្បត្តិតាមលំដាប់លំដោយ»។
ស្ថាបនិក និងជាម្ចាស់ភាគហ៊ុនភាគច្រើននៃ Next Digital លោកជីមមី ឡៃគឺកំពុងជាប់ពន្ធនាគារក្រោមការចោទប្រកាន់បទឧក្រិដ្ឋកម្មមួយចំនួន ដែលរួមមានការរំលោភលើច្បាប់សន្តិសុខជាតិ។ គណនីធនាគាររបស់ក្រុមហ៊ុននេះ ត្រូវបានអាជ្ញាធរហុងកុងបង្កក ដែលធ្វើឱ្យមានការបិទកាសែត Apple Daily របស់ក្រុមហ៊ុននេះ។ ក្រៅពីលោកឡៃ និពន្ធនាយកមួយចំនួន និងនាយកប្រតិបត្តិរបស់ Next Digital ក៏ត្រូវបានឃុំខ្លួនក្រោមការចោទប្រកាន់ដូចខាងលើផងដែរ។
ដោយសារគណនីធនាគារត្រូវបានបង្កក ក្រុមហ៊ុន Next Digital នៅជំពាក់ប្រាក់ឈ្នួលសម្រាប់និយោជិតជាង ៧០០ នាក់។ និយោជិត ខ្លះបានរកការងារថ្មី ហើយខ្លះទៀតបានបើកក្រុមហ៊ុនសារព័ត៌មានខ្លួនឯង ប៉ុន្តែភាគច្រើននៅគ្មានការងារធ្វើ។ គេរំពឹងថា ការរំសាយក្រុមហ៊ុន និងទូទាត់ទ្រព្យសម្បត្តិអាចទទួលបានប្រាក់ខ្លះ ដែលក្រុមហ៊ុនជំពាក់៕
