តូក្យូ: ចក្រភពអង់គ្លេសបង្ហាញនាវាផ្ទុកយន្តហោះ HMS Queen Elizabeth របស់ខ្លួនដល់ប្រមុខការពារជាតិជប៉ុនកាលពីថ្ងៃច័ន្ទ ទី ៦ នៅមូលដ្ឋានកងទ័ពជើងទឹកក្បែរទីក្រុងតូក្យូ ដែលជាការចាប់ផ្តើមនៃវត្តមានយោធាអចិន្រ្តៃយ៍នៅក្នុងតំបន់ដែលព្យាយាមក្តាប់អំណាចចិនដែលកំពុងវាតទី។
លោកមេបញ្ជាការ Steve Moorhouse ប្រាប់សន្និសីទខ្លីមួយនៅលើនាវាតម្លៃ ៤,១៥ ប៊ីលានដុល្លារនេះថា៖ «គោលបំណងមួយនៃការដាក់ពង្រាយនេះ គឺដើម្បីបង្ហាញពីការចាប់ផ្តើមនៃការប្តេជ្ញាចិត្តមួយ។ ភាពលេចធ្លោនៃតំបន់នេះកំពុងកើនឡើងគួរឱ្យកត់សម្គាល់។
ជប៉ុនដែលមានគម្រោងធ្វើការហោះហើរយន្តហោះចម្បាំង F-35Bs ពីនាវាផ្ទុកឧទ្ធម្ភាគចក្រ២គ្រឿង កំពុងព្យាយាមពង្រីកកិច្ចសហប្រតិបត្តិការសន្តិសុខលើសពីសម្ព័ន្ធមិត្តអាមេរិក ដើម្បីព្យាយាមគ្រប់គ្រងឥទ្ធិពលចិន ដែលខ្លួនជឿជាក់ថា គំរាមកំហែងតំបន់នេះរួមទាំងឯករាជភាពរបស់កោះតៃវ៉ាន់។
រដ្ឋមន្ត្រីការពារជាតិជប៉ុនលោក Nobuo Kishi (ណូប៊ូ គីសហ្សី) និយាយថា៖ «ដំណើរទស្សនកិច្ចរបស់ក្រុមនាវាចម្បាំងរបស់ចក្រភពអង់គ្លេស មានសារៈសំខាន់យ៉ាងខ្លាំងដើម្បីរក្សា និងពង្រឹងតំបន់ឥណ្ឌូ-ប៉ាស៊ីហ្វិកសេរី និងបើកចំហ»។
នៅក្នុងយុទ្ធសាស្ត្រការពារជាតិកាលពីពេលថ្មីៗនេះ ជប៉ុនបានកំណត់អត្តសញ្ញាណប្រទេសជិតខាងចិនថា ជាការគំរាមកំហែងសន្តិសុខជាតិដ៏សំខាន់របស់ខ្លួន ហើយនិយាយថា ខ្លួនឃើញពីវិបត្តិទាក់ទងនឹងកោះតៃវ៉ាន់ ខណៈយោធាចិនបង្កើនសកម្មភាពនៅជុំវិញកោះនេះកាន់តែខ្លាំងឡើងដោយនិយាយថា ខ្លួនមានចេតនាបែបសន្តិភាពប៉ុណ្ណោះ៕