អង្ករ ១ បាវ ត្រីខ ១ កេស ពីក្រុមអ្នកស្ម័គ្រចិត្តរបស់សហគមន៍ជំនួយបាងកក អាចជួយប្រជាជនក្រីក្រជាច្រើន ជាពិសេសពលករចំណាកស្រុកដែលត្រដរខ្យល់រស់ ព្រោះគ្មានការងារធ្វើ គ្មានលុយទិញម្ហូប និងរងផលប៉ះពាល់ផ្សេងៗដោយសារតែវិធានការបិទខ្ទប់របស់រដ្ឋាភិបាលថៃ ដើម្បីទប់ស្កាត់ជំងឺកូវីដ ១៩ ដែលកំពុងរាលដាលយ៉ាងធ្ងន់ធ្ងរក្នុងប្រទេសនេះ។
លោក Tun Nye អាយុ ៣១ ពលករចំណាកស្រុកពីមីយ៉ាន់ម៉ាដែលកំពុងជាប់គាំងនៅក្រុងបាងកកនិយាយថា៖ «រយៈពេល ៣-៤ ខែហើយ ដែលយើងគ្មានលុយ និងគ្មានអ្វីបរិភោគគ្រប់គ្រាន់ ហើយក៏គ្មានផ្លូវទៅមីយ៉ាន់ម៉ាដែរ ព្រោះនៅទីនោះ ពិបាកជាងនៅទីនេះទៀត»។
ជំនួយរបស់ក្រុមអ្នកស្ម័គ្រចិត្ត អាចធ្វើឱ្យលោក Nye និងប្រពន្ធ ក៏ដូចជាពលករដែលរស់ក្នុងជំរំក្រីក្រជុំវិញក្រុងបាងកកជាង ៦០០ នាក់ទៀត ដោះស្រាយបញ្ហាស្រេកឃ្លាន បានជាបណ្ដោះអាសន្នសិន។ជំរំដែលលោករស់នៅ ត្រូវបានបិទកាលពីខែចុងមិថុនា បន្ទាប់ពីរកឃើញមានការឆ្លងជាចង្កោមនៃវ៉ារ្យ៉ង់ដែលតា (Delta) ក្នុងចំណោមកម្មករដែលរស់ក្បែរគ្នា។
ប៉ុន្តែកង្វះស្បៀងមិនមែនជាបញ្ហាមួយប៉ុណ្ណោះទេ ក្រុមអ្នកស្ម័គ្រចិត្តក៏ត្រូវជួយជំនួយផ្សេងៗទៀតដែរដូចជាការផ្ដល់ខ្យល់អុកស៊ីហ្ស៊ែនជាដើម ជាពិសេសនៅពេលដែលអ្នកឆ្លងកូវីដធ្ងន់ធ្ងរនៅជំរំជនក្រីក្រនេះមិនអាចបញ្ជូនទៅបន្ទប់សង្រ្គោះបន្ទាន់ទាន់ពេល ដោយសារអ្នកជំងឺកកកុញនៅមន្ទីរពេទ្យ។
លោក Friso Poldervaart ជនជាតិដាណឺម៉ាកដែលជាសហស្ថាបនិកនៃក្រុមអ្នកស្ម័គ្រចិត្តនិយាយថា៖ «ភាគច្រើន យើងដោះស្រាយតម្រូវការស្បៀងអាហារតាមរយៈការផ្គត់ផ្គង់ ប៉ុន្តែភ្លាមៗនោះ យើងកំពុងដោះស្រាយជីវិតមនុស្សដែលកំពុងស្លាប់នៅក្នុងដៃយើង»។
មកទល់ពេលនេះ ថៃមានអ្នកឆ្លងជំងឺកូវីដ ១៩ ប្រចាំថ្ងៃប្រហែល ១៥ ០០០ ករណី អ្នកឆ្លងសរុប ១, ២ លានករណី និងស្លាប់ ១២ ៨០០ ករណី។ ត្រឹមតែ ១២ ភាគរយប៉ុណ្ណោះនៃប្រជាជនចំនួន ៧០ លាននាក់ បានទទួលវ៉ាក់សាំងយ៉ាងហោចណាស់ ២ ដូស៕