.jpg)
សមាជិកនៃកងកម្លាំងពិសេសតាលីបង់ល្បាតតាមផ្លូវមួយនៅក្នុងទីក្រុងកាប៊ុល កាលពីថ្ងៃទី ៨ កញ្ញា។ AFP
កាលពីថ្ងៃអង្គារ ទី ៧ កញ្ញា ក្រុមតាលីបង់ បានប្រកាសសមាសធាតុនៃរដ្ឋាភិបាលបណ្ដោះអាសន្នមួយនៅប្រទេសអាហ្វហ្គានីស្ថាន ហើយបានប្រកាសថា ប្រទេសនេះបានក្លាយជា «អេមីរ៉ាតអ៊ិស្លាម»។
បើទោះបីជាមានការសន្យាថា ពួកគេនឹងបង្កើតរដ្ឋាភិបាលមួយ ដោយរួមបញ្ចូលគ្រប់ភាគី គណៈរដ្ឋមន្ត្រីស្ដីទីមានតែសមាជិកបុរស និងគ្មានស្ត្រីសោះ ហើយផ្សំឡើងពីសមាជិកតាលីបង់ជាន់ខ្ពស់ទាំងស្រុង ដែលខ្លះមានភាពល្បីល្បាញក្នុងការដឹកនាំការវាយប្រហារលើកងកម្លាំងអាមេរិកក្នុងរយៈពេល២ទសវត្សរ៍ចុងក្រោយនេះ។
មេដឹកនាំតាលីបង់មានអាយុច្រើនជាងគេ និងទីប្រឹក្សាជិតស្និទ្ធរបស់ស្ថាបនិកតាលីបង់ លោក ម៉ូហាម៉ាត់ ហាស្សាន អាខុន ត្រូវបានតែងតាំងជានាយករដ្ឋមន្ត្រីស្ដីទី។ លោក គឺជាអតីតអនុរដ្ឋមន្ត្រីការបរទេសរបស់តាលីបង់កាលពីពួកគេចូលកាន់អំណាចដំបូងនៅឆ្នាំ ១៩៩៦ ដល់ ២០០១។ ឈ្មោះរបស់លោក គឺស្ថិតក្នុងបញ្ជីទណ្ឌកម្មរបស់អង្គការសហប្រជាជាតិ។
មេដឹកនាំការិយាល័យនយោបាយ និងសហស្ថាបនិកក្រុមតាលីបង់លោកអាប់ឌុល ហ្គានី បារ៉ាដារ ត្រូវបានតែងតាំងជាឧបនាយករដ្ឋមន្ត្រីស្ដីទី។ លោកត្រូវដោះលែងចេញពីពន្ធនាគារប៉ាគីស្ថានកាលពីឆ្នាំ ២០១៨ តាមសំណើរបស់អាមេរិក ក្នុងបំណងបើកការចរចាសន្តិភាពក្នុងប្រទេសអាហ្វហ្គានីស្ថាន។
លោក ស៊ីរ៉ាជុដឌីន ហាកកានី កូនប្រុសរបស់ស្ថាបនិកបណ្ដាញហាកកានី ដែលជាក្រុមជ្រុលនិយមក្នុងចំណោមក្រុមតាលីបង់ ត្រូវបានតែងតាំងជារដ្ឋមន្ត្រីស្ដីទីក្រសួងមហាផ្ទៃ។ កាលពីឆ្នាំ ២០០៨ ភ្នាក់ងារស៊ើបអង្កេត FBI របស់អាមេរិក បានចេញដីកាចាប់ខ្លួនលោកហាកកានី ក្រោមការចោទប្រកាន់ប្រព្រឹត្តអំពើភេរវកម្ម ហើយផ្ដល់ប្រាក់រង្វាន់ ១០ លានដុល្លារ សម្រាប់ព័ត៌មានដែលអាចជួយដល់ការចាប់ខ្លួនលោក។ ផ្ទុយពីក្រុមតាលីបង់ទាំងមូល បណ្ដាញហាកកានីត្រូវបានអាមេរិកចាត់ទុកថាជាអង្គការភេរវកម្ម។
ម៉ូហាម៉ាត់ យ៉ាកូប កូនប្រុសរបស់ស្ថាបនិកក្រុមតាលីបង់លោក មូលឡា អូម៉ា ត្រូវបានតែងតាំងជារដ្ឋមន្ត្រីស្ដីទីក្រសួងការពារជាតិ៕
