.jpg)
សមាជិកនៃកងយោធា ៣១៣ របស់តាលីបង់ត្បាតនៅក្បែរមូលដ្ឋានរបស់ CIA នៅក្រុងសង្កាត់ Deh Sabz ក្នុងទីក្រុងកាប៊ុល។ AFP
ប្រទេសចិន បានច្រានចោលការលើកឡើងថា ខ្លួនបានចូលកាន់កាប់អតីតមូលដ្ឋានយោធាអាមេរិកធំជាងគេនៅក្នុងប្រទេសអាហ្វហ្គានីស្ថាន។
កាលពីថ្ងៃអង្គារ ទី ៧ កញ្ញា អ្នកនាំពាក្យក្រសួងការបរទេសចិនលោក វ៉ាង វិនប៊ីន បាននិយាយថា ផ្ទុយពីការរាយការណ៍របស់សារព័ត៌មានជាច្រើន ទីក្រុងប៉េកាំងមិនបានពិភាក្សាជាមួយតាលីបង់ ដើម្បីផ្ទេរសិទ្ធិប្រើប្រាស់មូលដ្ឋានទ័ពអាកាសបាហ្គ្រាមទេ។
លោកនិយាយថា៖ «អ្វីដែលខ្ញុំអាចប្រាប់អ្នករាល់គ្នាបាននោះ គឺថា វាជាបំណែកនៃព័ត៌មានមិនពិតសុទ្ធសាធ»។
កាលពីសប្ដាហ៍មុន អតីតឯកអគ្គរដ្ឋទូតរបស់លោក ដូណាល់ ត្រាំ ប្រចាំអង្គការសហប្រជាជាតិលោកស្រីនីកគី ហេលី បានប្រាប់ទូរទស្សន៍ Fox News ថារដ្ឋាភិបាលអាមេរិកគួរតែឃ្លាំមើលប្រទេសចិន បន្ទាប់ពីអាមេរិកចាកចេញពីប្រទេសអាហ្វហ្គានីស្ថាន។
«យើងត្រូវមើលប្រទេសចិន ព្រោះខ្ញុំគិតថា អ្នកនឹងឃើញចិនឆ្លៀតឱកាសយកមូលដ្ឋានទ័ពអាកាសបាហ្គ្រាម» លោកស្រី ហេលី និយាយបែបនេះ ហើយបន្តទៀតថា៖ «ហើយខ្ញុំគិតថាចិនក៏កំពុងធ្វើសកម្មភាពនៅអាហ្វហ្គានីស្ថាន និងប្រើប្រាស់ប៉ាគីស្ថាន ដើម្បីធ្វើឱ្យខ្លួនកាន់តែរឹងមាំ ដើម្បីប្រឆាំងឥណ្ឌា»។
កងកម្លាំងយោធាអាមេរិកបានផ្ទេរការគ្រប់គ្រងមូលដ្ឋានទ័ពអាកាសបាហ្គ្រាម ដែលជាមជ្ឈមណ្ឌលនៃបេសកកម្មអាមេរិកនៅអាហ្វហ្គានីស្ថាន ទៅឱ្យកងកម្លាំងអាហ្វហ្គានីស្ថាននៅថ្ងៃទី ២ កក្កដា ប៉ុន្តែជាង ១ ខែក្រោយមក មូលដ្ឋាននេះ បានធ្លាក់ក្នុងដៃរបស់តាលីបង់។
យ៉ាងណាមិញ តាលីបង់បានរក្សាទំនាក់ទំនងយ៉ាងកក់ក្ដៅជាមួយទីក្រុងប៉េកាំង ចាប់តាំងពីការដណ្ដើមអំណាចនៅប្រទេសអាហ្វហ្គានីស្ថានមក ហើយពួកគេបានស្វាគមន៍ការចូលរួមរបស់ចិនក្នុងការសាងសង់ និងអភិវឌ្ឍប្រទេសអាហ្វហ្គានីស្ថានឡើងវិញ៕
