ការឆ្លងរីករាលដាលកូវីដ ១៩ រលកទី៤ នៅប្រទេសវៀតណាម ធ្វើឱ្យប្រជាជនមួយចំនួនជួបការលំបាកក្នុងការផ្គត់ផ្គង់ជីវភាព ខណៈបម្រាមគោចរនៅតែបន្តនៅក្នុងទីក្រុង។ កាលពីថ្ងៃទី ៧ កញ្ញា អាជ្ញាធរក្រុងហូជីមិញ បានសម្រេចពន្យារយន្តការនេះ រហូតដល់ថ្ងៃទី ១៥ កញ្ញា។ ចំពោះរដ្ឋធានីហាណូយវិញ វិធានការរឹតត្បិតនៅតែបន្តយ៉ាងតឹងរ៉ឹងនៅក្នុងតំបន់ចំនួន ១០ ចាប់ពីថ្ងៃទី ៦ កញ្ញាមកម្ល៉េះ។
តាមការស្រង់សម្តីរបស់សារព័ត៌មាន VNExpress នាយករដ្ឋមន្ត្រីវៀតណាមលោក Pham Minh Chinhបាននិយាយថា វៀតណាមគួរតែព្យាយាម និងគ្រប់គ្រងស្ថានការណ៍កូវីដ ១៩ ត្រឹមចុងខែនេះ បន្ទាប់មកស្តារវិស័យឱស្សហកម្ម និងអាជីវកម្មឡើងវិញ។
លោកបានបន្តនិយាយថា ស្ថានភាពសេដ្ឋកិច្ចសង្គមវៀតណាមក្នុងរយៈពេល ៨ ខែចុងក្រោយនេះ ត្រូវបានរងផលប៉ះពាល់យ៉ាងខ្លាំងពីការផ្ទុះឡើងនៃជំងឺកូវីដប្រភេទបំប្លែងថ្មីនេះ។
ទីក្រុងហូជីមិញបានស្ថិតនៅក្រោមការបិទខ្ទប់ទាំងស្រុងចាប់តាំងពីថ្ងៃទី ២៣ សីហា ដោយប្រជាជនមិនអាចចាកចេញពីផ្ទះរបស់ពួកគេ សូម្បីតែដើរទិញម្ហូបអាហារ។ ជាមួយនឹងការរឹតត្បិតដែលបានកំណត់រហូតដល់ថ្ងៃទី ១៥ កញ្ញា នាយករដ្ឋមន្រ្តីទើបជាប់ឆ្នោតថ្មីលោក Pham Minh Chinh បានបញ្ជាឱ្យមានការធ្វើតេស្តរកកូវីដ ១៩ ទ្រង់ទ្រាយធំមួយសម្រាប់ប្រជាជនក្នុងទីក្រុងនិងបានដាក់ពង្រាយទាហាន ដើម្បីពង្រឹងការស្នាក់នៅតាមផ្ទះរបស់ប្រជាជន និងជួយក្នុងការផ្តល់ជាស្បៀងអាហារ។
ទីក្រុងហូជីមិញ ជាទីក្រុងធំបំផុតរបស់វៀតណាម ហើយទីក្រុងនេះទទួលរងផលប៉ះពាល់ដោយសារកូវីដ ១៩ ខ្លាំងជាងគេ។ លោក Doung ដែលធំដឹងក្តីនៅទីក្រុងហូជីមិញ ប៉ុន្តែបច្ចុប្បន្នរស់នៅរដ្ឋកា លីហ្វ័រនីញ៉ា សហរដ្ឋអាមេរិក តែងតែទទួលបានដំណឹងមិនសូវល្អរាល់ពេលលោកធ្វើការទំនាក់ទំនង ទៅស្រុកកំណើតរបស់លោកក្នុងអំឡុងពេលកូវីដ ១៩ នេះ។
លោក Doung បានបាត់បង់ពូរបស់គាត់ដោយសារជំងឺកូវីដ ១៩ កាលពីថ្ងៃទី ៣ កញ្ញា បន្ទាប់ពីពូរបស់លោកត្រូវបានសម្រាកព្យាបាលនៅបន្ទប់សង្រ្គោះអ្នកជំងឺកូវីដ ១៩ កម្រិតធ្ងន់។ លោកបាននិយាយថា៖ «អត្រាស្លាប់ពេលនោះគឺមាន ៩៤ ភាគរយ»។
លោកបានបាត់បង់សមាជិកគ្រួសារចំនួន ៤ នាក់ ដោយសារកូវីដ ១៩ ចាប់តាំងពីមានរលកទី៤ នៃការឆ្លងសហគមន៍នៅប្រទេសវៀតណាម។ លោក Doung បាននិយាយថា៖ «មនុស្សគ្រប់គ្នាកំពុងតស៊ូដើម្បីរស់ ប្រសិនបើពួកគេមិនមានផ្ទុកវីរុសកូរ៉ូណាទេ ក៏ពួកគេខ្វះអាហារសម្រាប់បរិភោគដែរ»។
ទោះបីជាមានការផ្តល់ជាស្បៀងអាហារពីសំណាក់រដ្ឋាភិបាលក្នុងអំឡុងពេលមានការរឹតត្បិតនេះក៏ដោយ ប្រជាជនវៀតណាមមួយចំនួនមិនអាចរស់អាស្រ័យនឹងជំនួយពីរដ្ឋាភិបាលតែមួយមុខផងដែរ។ ចំពោះប្រជាជនខ្លះបានបញ្ចាក់ថា ពួកគេមិនបានទទួលជំនួយពីរដ្ឋាភិបាលនោះទេ។
តាមការស្រង់សម្តីរបស់សារព័ត៌មាន Aljazeera លោកស្រី Ngo ThiBichHuyen ដែលជាអ្នកដឹកជញ្ជូនអាហារទៅពលករចំណាកស្រុកដែលកំពុងរស់នៅក្នុងបន្ទប់ជួលក្នុងស្រុក Go Vap បានមើលឃើញថា មនុស្សជាច្រើនមិនបានទទួលជំនួយពីរដ្ឋាភិបាលទេ ហើយសម្រាប់អ្នកដែលទទួលបានជំនួយនោះវិញគឺមិនគ្រប់គ្រាន់សម្រាប់តម្រូវការរបស់គេទេ។
លោកស្រី Huyen បាននិយាយថា៖ «គ្រួសារខ្លះមិនបានទទួលកញ្ចប់ជំនួយពីរដ្ឋាភិបាលទេ។ ថ្ងៃខ្លះពួកគេមិនមានបាយសម្រាប់បរិភោគទេ ហើយពួកគេត្រូវទៅសុំមីកញ្ចប់ពីអ្នកខាងក្រៅសម្រាប់ទទួលទានទៀតផង»។
រលកទី៤ នៃការឆ្លងក្នុងសហគមន៍នៅប្រទេសវៀតណាម បានចាប់ផ្តើមតាំងពីថ្ងៃទី ២៧ មេសា ដែលពេលនោះមានមនុស្សតែ ៣៥ នាក់ប៉ុណ្ណោះ បានទទួលមរណភាពដោយជម្ងឺកូវីដ ១៩ ហើយចំនួនអ្នកឆ្លងសរុបពេលនោះមានប្រហែលត្រឹមតែជាង ៤ ពាន់នាក់ប៉ុណ្ណោះ។
បច្ចុប្បន្នអ្នកស្លាប់បានកើនឡើងដល់ជាង ១ ម៉ឺននាក់ ខណៈចំនួនអ្នកឆ្លងសរុបមានលើសពី ៥២ ម៉ឺននាក់។ ប្រហែល ៨០ ភាគរយនៃអ្នកស្លាប់ និងអ្នកឆ្លងពាក់បានកើតឡើងនៅទីក្រុងហូជីមិញ៕