កាលពីថ្ងៃពុធ រដ្ឋមន្ត្រីក្រសួងរតនាគារអាមេរិកលោកស្រី ជេណេត យ៉ែលេន រំឭកថារដ្ឋាភិបាលអាមេរិក នឹងមិនអាចទូទាត់សងបំណុលនៅចំណុចណាមួយក្នុងខែតុលា ប្រសិនបើសភាអាមេរិក មិនចាត់វិធានការ ដើម្បីបង្កើន ឬព្យួរដែនកំណត់ខ្ចីបំណុល។
ក្នុងលិខិតមួយផ្ញើជូនសមាជិកសភា លោកស្រីយ៉ែលេន បាននិយាយថា៖ «វិធានការវិសាមញ្ញ» ដែលក្រសួងបានប្រើប្រាស់ជាបណ្ដោះអាសន្នចាប់តាំងពីដើមខែសីហា ដើម្បីជួយទ្រទ្រង់ចំណាយសំខាន់ៗរបស់រដ្ឋាភិបាលក្នុងអវត្តមាននៃវិធានការរបស់សភា នឹងមិនអាចបន្តជួយបានទៀតទេនៅខែក្រោយ។
លោកស្រីបន្ថែមទៀតថា ពេលវេលាជាក់ស្ដែងនៅមិនច្បាស់ឡើយប៉ុន្តែពេលវេលាបញ្ចៀសគ្រោះមហន្តរាយសេដ្ឋកិច្ចគឺជិតអស់ហើយ។ កាលពីខែមុនដើម្បីពន្យារមិនឱ្យរឿងនេះ កើតឡើងក្រសួងរតនាគារអាមេរិក បានផ្អាកការវិនិយោគចូលក្នុងមូលនិធិចូលនិវត្តន៍របស់មន្ត្រីមុខងារសាធារណៈនិងបុគ្គលិកសេវាប្រៃសណីយ៍ជាតិ។
អ្នកស្រីនិយាយថា៖«នៅពេលដែលគ្រប់វិធានការ និងសាច់ប្រាក់នៅក្នុងដៃអស់ទាំងស្រុងសហរដ្ឋអាមេរិកនឹងមិនអាចបំពេញកាតព្វកិច្ចរបស់ខ្លួនជាលើកដំបូងនៅក្នុងប្រវត្តិសាស្ត្ររបស់យើង»។ អ្នកស្រីបន្តទៀតថា ប្រសិនបើអាមេរិក មិនអាចសងបំណុលបានទេ សេដ្ឋកិច្ចអាមេរិក និងពិភពលោក នឹងរងផលប៉ះពាល់យ៉ាងខ្លាំង។
ការចំណាយដ៏ធំលើប្រាក់គាំពារប្រជាជនក្នុងអំឡុងពេលនៃការរីករាលដាលជំងឺកូវីដ ១៩ និងភាពមិនច្បាស់លាស់នៃចំណូលសារពើពន្ធនៅឆ្នាំនេះ បានធ្វើឱ្យមានការព្រួយបារម្ភអំពីការរីងស្ងួតនៃថវិកាជាតិអាមេរិកប្រសិនបើសភាមិនអនុម័តការបង្កើន ឬការព្យួរដែនកំណត់ខ្ចីបំណុល។
មេដឹកនាំបក្សប្រជាធិបតេយ្យ បានទទូចគណបក្សសាធារណរដ្ឋឱ្យធ្វើការរួមគ្នា ដើម្បីបង្កើនដែនកំណត់ខ្ចីបំណុល ហើយបាននិយាយថារដ្ឋាភិបាលបានឈានដល់ដែនកំណត់លើកមុនដោយសារការកាត់អត្រាពន្ធដាររបស់គណបក្សសាធារណរដ្ឋ និងលោកប្រធានាធិបតីដូណាល់ ត្រាំ។ ប៉ុន្តែមេដឹកនាំគណបក្សសាធារណរដ្ឋបានមិនធ្វើការជាមួយគណបក្សប្រជាធិបតេយ្យលើរឿងនេះទេ៕