.jpg)
លោករដ្ឋមន្ត្រីក្រសួងសង្គ្រោះបន្ទាន់រុស្ស៊ី Yevgeny Zinichev។AFP
ប្រព័ន្ធផ្សព្វផ្សាយរដ្ឋ RIA Novosti បានរាយការណ៍នៅថ្ងៃពុធថា រដ្ឋមន្ត្រីក្រសួងសង្គ្រោះបន្ទាន់រុស្ស៊ីលោក Yevgeny Zinichev ស្លាប់ដោយឧបទ្ទវហេតុអំឡុងពេលហ្វឹកហាត់នៅតំបន់អាក់ទិក។
លោក Zinichev អាយុ ៥៥ ឆ្នាំ កំពុងព្យាយាមជួយសង្គ្រោះជីវិតរបស់មនុស្សម្នាក់នៅពេលដែលហេតុការណ៍នៅទីក្រុង Norilsk របស់រុស្ស៊ីបានកើតឡើង។ ក្រសួងដដែលបាននិយាយថា៖ «ក្រសួងសង្គ្រោះបន្ទាន់រុស្ស៊ីសូមជូនដំណឹងដ៏គួរឱ្យសោកស្តាយ ស្ដីអំពីការស្លាប់របស់លោក Yevgeny Zinichev ដែលបានស្លាប់យ៉ាងអាណោចអាធ័មក្នុងកាតព្វកិច្ចជួយសង្គ្រោះជីវិតមនុស្សម្នាក់ ខណៈពេលកំពុងចូលរួមសមយុទ្ធអន្តរក្រសួង ដើម្បីការពារតំបន់អាកទិក»។
យ៉ាងណាមិញ មិនមានព័ត៌មានលម្អិតផ្សេងទៀតអំពីហេតុការណ៍ជុំវិញការស្លាប់របស់លោក Zinichev ដែលបានផ្តល់ដោយក្រសួងភ្លាមៗទេ។ យោងតាមសេចក្តីថ្លែងការណ៍ផ្លូវការរបស់ក្រសួងដែលបានចេញផ្សាយមុនពេលគាត់ស្លាប់លោក Zinichev ស្ថិតនៅក្នុងតំបន់អាក់ទិក ដើម្បីត្រួតពិនិត្យសមយុទ្ធទ្រង់ទ្រាយធំ។
ជាផ្នែកមួយនៃដំណើរទស្សនកិច្ចនេះ លោក Zinichev បានចូលរួមជាមួយមន្រ្តីក្នុងតំបន់ ដើម្បីពិនិត្យមើលការវិវឌ្ឍនៃការសាងសង់ស្ថានីយពន្លត់អគ្គិភ័យថ្មីមួយនៅតំបន់ Norilsk ដែលគ្រោងនឹងបើកដំណើរការនៅចុងឆ្នាំនេះ។
វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយនៅថ្ងៃពុធថា ប្រធានាធិបតីរុស្ស៊ី លោក Vladimir Putin បានសម្តែងការចូលរួមរំលែកទុក្ខយ៉ាងជ្រាលជ្រៅចំពោះក្រុមគ្រួសារ និងមិត្តភក្តិរបស់លោក Zinichev៕
