.jpg)
អ្នកនាំពាក្យក្រសួងការបរទេសចិនលោក វ៉ាង វិនប៊ីន នាពេលកន្លងទៅ។ រូបថត AFP
កាលពីថ្ងៃពុធ ប្រទេសចិន បាននិយាយថា ខ្លួនស្វាគមន៍ការបញ្ចប់ «ភាពអនាធិបតេយ្យជាង៣សប្ដាហ៍» នៅប្រទេសអាហ្វហ្គានីស្ថាន បន្ទាប់ពីការបង្កើតរដ្ឋាភិបាលបណ្ដោះអាសន្ន ហើយបានជំរុញឱ្យក្រុមតាលីបង់ស្ដារសណ្ដាប់ធ្នាប់នៅក្នុងប្រទេសឡើងវិញ។
អ្នកនាំពាក្យក្រសួងការបរទេសចិនលោក វ៉ាង វិនប៊ីន និយាយថា៖ «ប្រទេសចិន យកចិត្តទុកដាក់យ៉ាងខ្លាំងចំពោះការប្រកាសរបស់តាលីបង់អំពីការបង្កើតរដ្ឋាភិបាលបណ្តោះអាសន្ន និងការរៀបចំបុគ្គលិកសំខាន់ៗមួយចំនួន»។
លោកបន្តទៀតថា៖ «នេះបានបញ្ចប់ភាពអនាធិបតេយ្យជាង ៣ សប្ដាហ៍ នៅអាហ្វហ្គានីស្ថាន និងជាជំហានចាំបាច់ដើម្បីស្ដារសណ្ដាប់ធ្នាប់ និងកសាងប្រទេសឡើងវិញ»។
ខណៈពេលដែលប្រទេសភាគច្រើននៅជុំវិញពិភពលោកនៅប្រកាន់ជំហរ «រង់ចាំមើលសិន» មុនការកសាងទំនាក់ទំនងជាមួយតាលីបង់ ប្រទេសចិន បាននិយាយរួចហើយថា ខ្លួនបានត្រៀមខ្លួនរួចជាស្រេច ដើម្បីបង្កើតទំនាក់ទំនងមិត្តភាពជាមួយក្រុមនេះ។
ក្រុមអ្នកវិភាគបាននិយាយថារដ្ឋបាលដែលមានស្ថិរភាព និងងាយធ្វើកិច្ចសហប្រតិបត្តិការនៅក្នុងទីក្រុងកាប៊ុល នឹងបើកឱកាសសេដ្ឋកិច្ចសម្រាប់ប្រទេសចិន ហើយអនុញ្ញាតឱ្យមានការពង្រីកគម្រោងហេដ្ឋារចនាសម្ព័ន្ធ «ក្រវាត់ និងផ្លូវ»។
ក្រុមតាលីបង់ក៏អាចមើលឃើញថា ចិនជាប្រភពដ៏សំខាន់នៃការគាំទ្រផ្នែកសេដ្ឋកិច្ច និងមានសក្ដានុពលជាសម្ព័ន្ធមិត្តដ៏សំខាន់។
បើទោះជាយ៉ាងនេះក៏ដោយ ការចូលកាន់អំណាចរបស់តាលីបង់នៅអាហ្វហ្គានីស្ថានក៏អាចនៅបង្កហានិភ័យដល់ប្រទេសចិន ផងដែរ ដោយក្រុមអាចនៅមានទំនាក់ទំនងជាមួយក្រុមឧទ្ទាមជនជាតិអ៊ុយហ្គ័រ ដែលមានសកម្មភាពនៅតំបន់ស្វយ័តស៊ីនជាំងនៅប្រទេសចិន៕
