.jpg)
កាលពីថ្ងៃសៅរ៍ទី ១១ កញ្ញា ប៉ូលិសអ៊ីស្រាអែល បានចាប់ខ្លួនជនជាតិប៉ាឡេស្ទីន ៤ នាក់ ក្នុងចំណោម ៦ នាក់ ដែលបានរត់ចេញពន្ធនាគារសន្តិសុខកម្រិតខ្ពស់ ដោយក្នុងនោះមានមេដឹកនាំក្រុមឧទ្ទាមដ៏ល្បីឈ្មោះ ១ រូប សម្រាប់ការដឹកនាំការវាយប្រហារទៅលើអ៊ីស្រាអែល។
ការចាប់ខ្លួនកាលពីថ្ងៃសៅរ៍ ធ្វើឱ្យអ៊ីស្រាអែលខិតជិតទៅការបិទរឿងដ៏អាម៉ាស់នេះ ដែលបង្ហាញពីគុណវិបត្តិដ៏ជ្រៅរបស់ប្រព័ន្ធពន្ធនាគាររបស់ខ្លួន ហើយធ្វើទណ្ឌិតទាំងនេះ ក្លាយជាឥស្សរជនរបស់ក្រុមឧទ្ទាមប៉ាឡេស្ទីន។ កាលពីថ្ងៃសុក្រ ក្រុមឧទ្ទាមនៅតំបន់ហ្គាហ្សា បានបាញ់រ៉ុក្កែតចូលដែនដីអ៊ីស្រាអែល ដោយហាក់បីដូចជាជាសញ្ញាគាំទ្រដល់ការរត់គេចខ្លួននេះ ដែលធ្វើឱ្យអ៊ីស្រាអែលឆ្លើយតបវិញ ដោយការវាយប្រហារតាមអាកាស។
ទណ្ឌិតទាំង ៤ រូប ត្រូវបានចាប់ខ្លួននៅភាគខាងជើងប្រទេសអ៊ីស្រាអែល ដែលសារព័ត៌មានក្នុងស្រុកអ៊ីស្រាអែលរាយការណ៍ថា ការចាប់ខ្លួនទាំងនោះធ្វើឡើងដោយមានតម្រុយពីប្រជាជននៅតាមមូលដ្ឋាន។ក្នុងចំណោមទណ្ឌិតទាំង ៤ មានលោក ហ្សាការីយ៉ា ហ្សូប៊ីឌី ដែលជាមេដឹកនាំក្រុមឧទ្ទាមក្នុងអំឡុងពេលការបះបោរប៉ាឡេស្ទីនលើកទី២កាលពីដើមទសវត្សរ៍ឆ្នាំ ២០០០។
វីដេអូមួយដែលកំពុងសាយភាយនៅលើបណ្ដាញសង្គម បង្ហាញប៉ូលិសអ៊ីស្រាអែល បានចាប់អ្នកទោសម្នាក់យ៉ាកគូ កាដារី ចូលក្នុងរថយន្តប៉ូលិស។ លោក កាដារី គឺត្រូវបានផ្ដន្ទាទោសឱ្យជាប់ពន្ធនាគារ ១ ជីវិតចំនួន ២ លើក ពីបទប៉ុនប៉ងមនុស្សឃាត និងការដាក់គ្រាប់បែក។
ទណ្ឌិតទាំង ៦ រូប ដែលភាគច្រើនត្រូវជាប់ពន្ធនាគារ១ជីវិត បានជីកផ្លូវរូងក្រោមដីចេញពីពន្ធនាគារហ្គីលបូអាកាលពីថ្ងៃចន្ទ ធ្វើឱ្យមានការរិះគន់ប្រព័ន្ធពន្ធនាគារអ៊ីស្រាអែលយ៉ាងខ្លាំង ខណៈពេលដែលប្រជាជនប៉ាឡេស្ទីនមានភាពសប្បាយអបអរចំពោះការគេចខ្លួនរបស់ទណ្ឌិតទាំងនេះ។
ក្នុងសេចក្ដីថ្លែងការណ៍មួយ នាយករដ្ឋមន្ត្រីអ៊ីស្រាអែលលោកណាហ្វតាលី បេននិត បានកោតសរសើរកងកម្លាំងសន្តិសុខអ៊ីស្រាអែលចំពោះការចាប់ខ្លួនទណ្ឌិតទាំង៤រូប។ លោកនិយាយថា៖ «យើងត្រូវរក្សាការត្រៀមខ្លួនឱ្យបានខ្ពស់ និងបន្តរហូតដល់បេសកកម្មត្រូវបានបញ្ចប់»។
រីឯក្រុមហាម៉ាសវិញ បានប្ដេជ្ញាផ្ដល់អាទិភាពដល់ «ឥស្សរជន» ទាំង ៦ រូបនេះ ក្នុងការដោះដូរចំណាប់ខ្មាំងណាមួយនៅពេលអនាគត។ គេជឿជាក់ថា ហាម៉ាសមានចំណាប់ខ្មាំងជាជនស៊ីវិលអ៊ីស្រាអែលចំនួន ២ រូប និងសាកសពទាហានអ៊ីស្រាអែល ២ រូប ដែលស្លាប់ក្នុងសង្គ្រាម ៥០ ថ្ងៃ កាលពីឆ្នាំ ២០១៤។ មកដល់ពេលនេះការចរចាដោះដូរចំណាប់ខ្មាំងទាំងនេះ មិនបានដើរទៅមុខទេ។ កាលពីឆ្នាំ ២០១១ អ៊ីស្រាអែលបានដោះដូរទណ្ឌិតជនជាតិប៉ាឡេស្ទីនចំនួន ១ ០០០ នាក់ ជាមួយនឹងចំណាប់ខ្មាំងជាទាហានអ៊ីស្រាអែល ១ រូប៕
