.jpg)
ឡូហ្គោអេបស្ទរបង្ហាញចេញពីទូរស័ព្ទ iPhone។ AFP
ចៅក្រមអាមេរិក ដែលជំនុំជម្រះរឿងក្ដីរវាងក្រុមហ៊ុនអេផល (Apple Inc.) និងក្រុមហ៊ុនវីដេអូហ្គេមអេពីកហ្គេម (Epic Games, Inc.) បានបដិសេធមិនបានផ្ដល់ឱ្យភាគីទាំង ២ នូវជ័យជម្នះពេញលេញ។
លោកស្រី ខេត អាដាម ប្រធានក្រុមមេធាវីតំណាងក្រុមហ៊ុនអេផលបាននិយាយថា សាលក្រមនេះ គឺ «ជ័យជម្នះដ៏ធំ ១» ដោយចង្អុលទៅសេចក្ដីសម្រេចរបស់តុលាការថា «អេផលមិនមែនជាអាជីវកម្មរកស៊ីផ្ដាច់មុខ ក្រោមច្បាប់ស្ដីពីការប្រកួតប្រជែងរបស់សហព័ន្ធ ឬរដ្ឋទេ»។
ប៉ុន្តែតុលាការបានរកឃើញថា ក្រុមហ៊ុនអេផលបានប្រព្រឹត្តអំពើប្រឆាំងការប្រកួតប្រជែង ហើយបានរារាំងជម្រើសរបស់អតិថិជនដោយខុសច្បាប់។
តុលាការបានបង្ខំក្រុមហ៊ុនអេផលឱ្យអនុញ្ញាតឱ្យក្រុមហ៊ុនផលិតកម្មវិធីនៅអាមេរិកចៀសវាងឧបករណ៍ទូទាត់ប្រាក់របស់អេបស្ទរ (App Store) ដើម្បីប្រើប្រាស់ឧបករណ៍ទូទាត់ប្រាក់នៅខាងក្រៅកម្មវិធីវិញ។ ការសម្រេចនេះមានន័យថាប្រតិបត្តិការហិរញ្ញវត្ថុចំនួន ៦០ ពាន់លានដុល្លារ ក្នុង ១ ឆ្នាំរបស់អេបស្ទរនឹងប្រឈមនឹងការប្រកួតប្រជែងនៅពេលឆាប់ៗនេះ ហើយមានន័យថា ក្រុមហ៊ុនអេផលនឹងបាត់បង់ចំណូលរាប់ពាន់លានដុល្លារពីថ្លៃសេវា ៣០ ភាគរយនៃប្រតិបត្តិការហិរញ្ញវត្ថុទាំងនេះ។
ក្រុមហ៊ុនអេផល នៅមិនទាន់បញ្ជាក់ថាពួកគេនឹងបន្តប្ដឹងទៅតុលាការឧទ្ធរណ៍ដែរ ឬទេ។
បើទោះជាយ៉ាងនេះក៏ដោយក្រុមហ៊ុនអេពីកនៅមានភាពមិនពេញចិត្ត ហើយបានបញ្ជាក់ថា ខ្លួននឹងបន្តប្ដឹងទៅតុលាការឧទ្ធរណ៍ ពីព្រោះគោលដៅរបស់ពួកគេគឺការរក្សាទុកឧបករណ៍ទូទាត់ប្រាក់ដោយផ្ទាល់នៅក្នុងកម្មវិធី ដោយលុបបំបាត់ថ្លៃសេវារបស់អេផល ជាជាងការរំពឹងទៅលើការទូទាត់ប្រាក់នៅខាងក្រៅកម្មវិធី។
បន្ថែមពីលើនេះ ក្រុមហ៊ុនអេពីកចង់មានសមត្ថភាពចែកចាយកម្មវិធីរបស់ខ្លួនដោយផ្ទាល់ ដោយមិនចាំបាច់រំពឹងលើក្រុមហ៊ុនអេផល ហើយពួកគេក៏ចង់ឱ្យតុលាការប្រកាសថា ក្រុមហ៊ុនអេផល គឺជាអាជីវកម្មរកស៊ីផ្ដាច់មុខ ដែលមិនអនុញ្ញាតឱ្យមានការប្រកួតប្រជែង៕
