ដាណឺម៉ាកបានក្លាយជាប្រទេសនៅអ៊ឺរ៉ុបតែ ១ គត់ ដែលមិនមានការរឹតត្បិតការទប់ស្កាត់ជំងឺកូវីដ ដោយសារអត្រាវ៉ាក់សាំងនៅប្រទេសនេះ បានឈានដល់ជាង ៧០ភាគរយនៃប្រជាជនសរុបក្នុងប្រទេស។ ប្រជាពលរដ្ឋម្នាក់ឈ្មោះ Klaus Sylvester បាននិយាយ៖ «វា (ជំងឺរាតត្បាត) មានរយៈពេល ២-៣ ឆ្នាំហើយ។ ខ្ញុំមានកូន៣នាក់ហើយពេលរៀននៅផ្ទះពិបាកខ្លាំងណាស់។ ខ្ញុំត្រេកអរណាស់ ដែលដាណឺម៉ាកលែងមានការរឹតត្បិតទៀតហើយ»។
ប្រទេសដាណឺម៉ាក បានណែនាំពីគោលការណ៍នៃការធ្វើលិខិតឆ្លងដែនកូវីដ ១៩ នៅខែមីនាឆ្នាំ ២០២១ ដែលជាផ្នែកមួយនៃការបន្ធូរបន្ថយច្បាប់តឹងរ៉ឹងបន្តិចម្តងៗ។
កាលពីថ្ងៃទី ១ ខែសីហា ប្រទេសនេះ បានបន្ថូរបន្ថយគោលការណ៍ ត្រូវការបង្ហាញបណ្ណបញ្ជាក់សុខភាពនៅសារមន្ទីរនិងព្រឹត្តិការណ៍ក្នុងស្រុក ដែលមានមនុស្សតិចជាង ៥០០ នាក់ ខណៈគោលការណ៍៦ពាក់ម៉ាស់ត្រូវបានបន្ថូរបន្ថយនៅទីសាធារណៈ នៅកន្លែងដឹកជញ្ជូនសាធារណៈ ចាប់តាំងពីពាក់កណ្តាលខែសីហា មកម្ល៉េះ។
គួរបញ្ជាក់ផងដែរថា ការចែកចាយវ៉ាក់សាំងនៅប្រទេសនេះ មានដំណើរការយ៉ាងឆាប់រហ័ស ដោយមាន ប្រជាជនជាង ៧៣ ភាគរយនៃប្រជាជនសរុបចំនួន ៥,៨ លាននាក់ បានចាក់វ៉ាក់សាំងពេញលេញហើយប្រជាជន ដែលមានអាយុលើសពី ៦៥ ឆ្នាំ បានទទួលបានវ៉ាក់សាំងពេញលេញ ប្រមាណជាង ៩៦ ភាគរយហើយ៕