.jpg)
អគ្គនាយកនទីភ្នាក់ងាអាតូមិចអន្តរជាតិ (IAEA) លោក Rafael Mariano Grossi ធ្វើសន្និសីទកាសែតក្រោយជំនួយក្រុមប្រឹក្សាភិបាល IAEAកាលពីថ្ងៃទី ១៣ កញ្ញា។ AFP
កាលពីថ្ងៃអាទិត្យ ទី ១២ កញ្ញា ប្រធានទីភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិ បានស្វាគមន៍កិច្ចព្រមព្រៀងជាមួយអ៊ីរ៉ង់ ដើម្បីថែទាំឧបករណ៍ឃ្លាំមើលនៅរោងចក្រនុយក្លេអ៊ែរ ដោយសាទរហើយនិយាយថា កិច្ចព្រមព្រៀងនេះ នឹងផ្ដល់ពេលវេលាដល់ការចរចាការទូត។
កិច្ចព្រមព្រៀងរវាងអ៊ីរ៉ង់ និងទីភ្នាក់ងារថាមពលអាតូមិចអន្តរជាតិ (IAEA) បានជួយបន្ធូរបន្ថយចំណុចតានតឹងក្នុងការចរចាជាប់គាំងដើម្បីស្ដារកិច្ចព្រមព្រៀងនុយក្លេអ៊ែរអ៊ីរ៉ង់ ២០១៥ ដែលត្រូវបានគេស្គាល់ថា JCPOA។
ខណៈពេលដែលសង្កត់ធ្ងន់ថាកិច្ចព្រមព្រៀងនេះគឺជា «ដំណោះស្រាយបណ្ដោះអាសន្ន» អគ្គនាយក IAEA លោក រ៉ាហ្វាអែល ហ្គ្រូស៊ី បានប្រាប់អ្នកសារព័ត៌មាននៅពេលវិលត្រឡប់ពីទីក្រុងតេអេរ៉ង់ថា«បញ្ហាបន្ទាន់បំផុត» ត្រូវបានកែតម្រូវដោយកិច្ចព្រមព្រៀងនេះ ដែលនឹង«ទុកពេលវេលាសម្រាប់ការទូត»។
ចាប់តាំងពីប្រធានាធិបតីអាមេរិកលោក ដូណាល់ ត្រាំ ដកអាមេរិកចេញពី JCPOA ហើយដាក់ទណ្ឌកម្មឡើងវិញលើប្រទេសអ៊ីរ៉ង់ ក្រុងតេអេរ៉ង់ បានឈប់អនុលោមតាមលក្ខខណ្ឌជាច្រើននៃ JCPOA ដោយចាប់ផ្ដើមការបន្សុទ្ធសារធាតុអ៊ុយរ៉ានីញ៉ូមដល់កម្រិតខ្ពស់។
អ្នកស្នងតំណែងពីលោកត្រាំ គឺលោកចូ បៃដិន បានបង្ហាញឆន្ទៈស្ដារ JCPOA ឡើងវិញ ប៉ុន្តែរដ្ឋបាលរបស់លោកបានបង្ហាញភាពមិនអត់ធ្មត់ចំពោះការជាប់គាំងនៃការចរចា។
កាលពីដើមឆ្នាំនេះ អ៊ីរ៉ង់ បានដាក់កម្រិតលើសមត្ថភាពរបស់ IAEA ក្នុងការតាមដានសកម្មភាពរបស់កម្មវិធីនុយក្លេអ៊ែរ ដែលជាចំណុចកកិតដ៏ធំមួយក្នុងការចរចាស្ដារ JCPOA។
ក្នុងកិច្ចព្រមព្រៀងខាងលើនេះ អ៊ីរ៉ង់នឹងអនុញ្ញាតឱ្យ IAEA ចូលក្នុងរោងចក្រនុយក្លេអ៊ែរនានាដើម្បីថែទាំឧបករណ៍ឃ្លាំមើល ដូចជាកាមេរ៉ាជាដើម ប៉ុន្តែទិន្នន័យ បានពីឧបករណ៍ទាំងនេះនឹងត្រូវបានថែរក្សាដោយអ៊ីរ៉ង់ ហើយនឹងមិនត្រូវលុបចោលដរាបណាកិច្ចព្រមព្រៀងនេះនៅមាន៕
